Il-Politika taċ-Ċirkostanzi Attenwanti u l-coronavirus (COVID-19)

Aġġornat f'did-data: 31 ta' Mejju 2022

Nhar il-11 ta' Marzu 2020, l-Organizzazzjoni Dinjija tas-Saħħa (WHO) iddikjarat li t-tifqigħa tal-coronavirus, magħrufa bħala COVID-19, hija pandemija globali. Minn dakinhar 'l hawn, it-tifqigħa kibret b'rata mgħaġġla u l-gvernijiet madwar id-dinja ħadu deċiżjonijiet fil-pront biex inaqqsu l-ħeffa tat-tixrid tal-COVID-19.

B'reazzjoni għal dan, konna qed noffru dal-ħarsien kontra l-COVID-19 taħt il-politika taċ-ċirkostanzi attenwanti tagħna biex ngħinu nħarsu l-komunità tagħna u noffru serħan il-moħħ.

Taqsira

Il-bookings għaż-żjarat u għall-Esperjenzi ta' Airbnb li saru sa dakinhar tal-14 ta' Marzu 2020 u li għandhom id-data taċ-checkin fi żmien 45 jum mil-lum jaqgħu taħt il-politika u jistgħu jiġu kkanċellati qabel iċ-checkin. Il-klijenti li jikkanċellaw se jingħataw l-għażla li jikkanċellaw u jitħallsu flushom lura u l-Hosts jistgħu jikkanċellaw mingħajr ebda tariffa jew impatt fuq l-istatus ta' Superhost tagħhom jekk jagħtu prova li għandhom raġuni tajba biex jikkanċellaw. Airbnb se troddlok lura t-tariffi tas-servizz kollha għall-kanċellazzjonijiet li jaqgħu taħt dil-politika jew inkella se toħroġlok kreditu għall-ivvjaġġar li jinkludi dawn it-tariffi tas-servizz. Biex tkun tista' tikkanċella taħt dil-politika, se nitolbuk tagħti kelmtek li l-fatti li semmejt huma veri u/jew biex tagħti prova tas-sitwazzjoni tiegħek.

Għall-bookings li saru wara l-14 ta' Marzu 2020 imma qabel il-31 ta' Mejju 2022, bl-eċċezzjoni tal-każijiet fejn il-klijent jew il-Host ikunu morda bil-COVID-19, il-kanċellazzjonijiet se jaqgħu taħt il-politika ta' kanċellazzjoni magħżula mill-Host.

Għall-bookings li saru mill-31 ta' Mejju 2022 'il quddiem, aħna se nimxu mal-politika ta' kanċellazzjoni tal-Host. Is-sitwazzjonijiet marbuta mal-COVID-19 mhux se jibqgħu jaqgħu taħt dil-politika.

Il-kanċellazzjonijiet se jitqiesu skont il-politika taċ-ċirkostanzi attenwanti fis-seħħ fil-ħin li l-booking jiġi kkanċellat u l-bookings li kienu diġà ġew ikkanċellati mhux se jitqiesu.

Jekk booking ikun diġà beda (il-ħin taċ-checkout ikun għadda), din iċ-ċirkostanza attenwanti ma tibqax tgħodd.

Hemm politiki oħra fis-seħħ għall-bookings mill-Korea t'Isfel għal listings ġewwa l-Korea t'Isfel u għall-bookings Luxe.

Liema bookings jaqgħu taħt il-politika

Il-bookings li saru sa dakinhar tal-14 ta' Marzu 2020

Il-bookings għaż-żjarat u għall-Esperjenzi ta' Airbnb li saru sa dakinhar tal-14 ta' Marzu 2020 u li għandhom id-data taċ-checkin fi żmien 45 jum mil-lum jistgħu jiġu kkanċellati qabel iċ-checkin. Dan ifisser li l-klijenti u l-parteċipanti li jikkanċellaw taħt dil-politika se jitħallsu flushom kollha lura jew se jiksbu kreditu tal-ivvjaġġar għas-somma li jkunu nefqu (meta l-kreditu tal-ivvjaġġar ikun disponibbli), il-Hosts u l-Organizzaturi jistgħu jikkanċellaw taħt dil-politika mingħajr ebda tariffa jew impatt fuq l-istatus ta' Superhost tagħhom u Airbnb jew se tħallas kollox lura jew se toħroġ kreditu tal-ivvjaġġar għas-somma kollha (inklużi t-tariffi tas-servizz).

Il-bookings għaż-żjarat u l-Esperjenzi ta' Airbnb li saru sa dakinhar tal-14 ta' Marzu 2020 u li għandhom data taċ-checkin wara 45 jum mil-lum bħalissa mhux imħarsa kontra s-sitwazzjonijiet marbuta mal-COVID-19. Il-politika ta' kanċellazzjoni tal-Host se tibqa' tgħodd bħas-soltu.

Jekk booking ikun diġà beda (il-ħin taċ-checkout ikun għadda), din iċ-ċirkostanza attenwanti ma tibqax tgħodd.

Bookings li saru wara l-14 ta' Marzu 2020 u qabel il-31 ta' Mejju 2022

Fil-każ taż-żjarat u l-Esperjenzi ta' Airbnb li ġew ibbukkjati wara l-14 ta' Marzu 2020 imma qabel il-31 ta' Mejju 2022, bħas-soltu dawn se jkomplu jaqgħu taħt il-politika ta' kanċellazzjoni tal-Host u, bl-eċċezzjoni tal-każijiet fejn il-klijent jew il-Host ikunu morda bil-COVID-19, dawn is-sitwazzjonijiet marbuta mal-COVID-19 mhux se jaqgħu taħt il-politika taċ-ċirkostanzi attenwanti tagħna. Fost is-sitwazzjonijiet marbuta mal-COVID-19 li ma jaqgħux taħt il-politika hemm: tfixkil u kanċellazzjonijiet fis-servizz tat-trasport; avviżi u restrizzjonijiet dwar l-ivvjaġġar; avviżi tas-saħħa u kwarantini; bidliet fil-liġi u deċiżjonijiet eżekuttivi oħra tal-gvernijiet—bħal ordnijiet ta' evakwazzjoni, għeluq tal-fruntieri, projbizzjonijiet fuq kirjiet għal żmien qasir u ordnijiet biex in-nies ma joħorġux mid-dar.

Bookings li saru mill-31 ta' Mejju 2022 'il quddiem

Għaż-żjarat u l-Esperjenzi ta' Airbnb ibbukkjati mill-31 ta' Mejju 2022 'il quddiem, aħna se nimxu mal-politika ta' kanċellazzjoni tal-Host. Is-sitwazzjonijiet marbuta mal-COVID-19 mhux se jibqgħu jaqgħu taħt il-politika taċ-ċirkostanzi attenwanti tagħna.

Il-politika taċ-ċirkostanzi attenwanti tagħna hija maħsuba biex tħares lill-klijenti u l-Hosts minn sitwazzjonijiet mhux mistennija li jinqalgħu wara li jkunu bbukkjaw. Wara li l-Organizzazzjoni Dinjija tas-Saħħa ddikjarat lill-COVID-19 bħala pandemija globali, il-politika taċ-ċirkostanzi attenwanti m'għadhiex tgħodd minħabba li l-COVID-19 u l-konsegwenzi tagħha m'għadhomx mhux mistennija. Jekk jogħġbok, qabel tibbukkja dejjem irrevedi sew il-politika ta' kanċellazzjoni tal-Host u qis jekk jaqbillekx tagħżel għażla li tagħtik il-livell ta' flessibbiltà li teħtieġ.

Kif taħdem

Jekk int klijent, tista' ssib l-għażliet ta' kanċellazzjoni u ħlas lura billi tmur fil-paġna Vjaġġi u tagħżel il-vjaġġ tiegħek—sir af kif. Jekk int Host, se ssib l-informazzjoni fid-dashboard tal-hosting tiegħek.

Aħbarijiet u riżorsi marbuta mal-coronavirus

Fiċ-Ċentru tar-Riżorsi ġbarna numru ta' artikli maħsuba biex ngħinu lill-komunità tagħna matul daż-żmien. Tista' ssib l-aħħar informazzjoni dwar ir-reazzjoni tagħna għall-COVID-19, minn aġġornamenti tal-politiki sa riżorsi għall-Hosts u l-klijenti.

Tista' taqra wkoll il-politika taċ-ċirkostanzi attenwanti biex issir taf iktar dwar il-ħarsien li tgawdi minnu f'każijiet li mhux marbuta mal-COVID-19.

Nitolbu lill-membri kollha tal-komunità biex juru rispett, ikunu inklussivi u jimxu skont mal-politika ta' nondiskriminazzjoni tagħna huma u jikkomunikaw ma' membri oħra tal-komunità.

Se nkomplu nirrevedu l-mod kif tintuża dil-politika. Jekk jogħġbok żur dil-paġna ta' sikwit biex issib l-aħħar aġġornamenti u informazzjoni.