Kif tħares it-tfal mill-isfruttament sesswali

Bħala Host tista' tgħin biex fil-listing tiegħek tħares lit-tfal mill-isfruttament sesswali. Għalhekk jekk tissuspetta li xi tfal ikunu qed jiġu sfruttati sesswalment, inħeġġuk bil-kbir li tirrapporta dawn l-abbużi lil CyberTipline. Minbarra dan, jekk għandek xi kameras madwar il-listing tiegħek, jeħtieġlek timxi mal-politika ta' Airbnb fuq l-użu tal-kameras u t-tagħmir li jirrekordja. Kif issib miktub fil-politika, il-kameras u t-tagħmir tar-reġistrazzjoni l-ieħor ma jistgħux ikunu jagħtu fuq ġewwa tal-listing u jekk hemm xi tagħmir fuq barra, għandek tgħarraf lill-klijenti bih fid-deskrizzjoni tal-listing.

X'jiġifieri sfruttament sesswali tat-tfal

Hemm ħafna affarijiet li jistgħu jwasslu għall-isfruttament sesswali tat-tfal u normalment bi sfruttament sesswali tat-tfal nifhmu li:

1. It-tifel jew it-tifla jiġu mġiegħla jew imħeġġa jwettqu xi atti sesswali
2. It-tfal jintużaw għall-prostituzzjoni jew atti sesswali oħra
3. It-tfal jintużaw għal atti, spettakli jew materjal pornografiku

Ħjiel li għandek toqgħod attent/a għalihom

It-tfal li jkunu qed jiġu abbużati sesswalment jistgħu jġibu ruħhom bħalma ta' sikwit iġibu ruħhom in-nies li jkunu għaddew minn trawma. Hawn taħt tista' ssir taf iktar dwar il-ħjiel li ta' sikwit jagħtu tifel jew tifla li jistgħu jkunu qed jiġu sfruttati sesswalment:

• Sinjali ta' abbuż fiżiku
• Ikunu taħt l-effett tax-xorb jew tad-drogi
• It-tifel jew it-tifla u adult imissu lil xulxin b'mod li ma jkunx xieraq

L-isfruttament sesswali tat-tfal jista' jseħħ onlajn jew wiċċ imb wiċċ. L-istudji juru li 1 minn kull 5 ibniet u 1 minn kull 20 tifel se jgħaddu minn xi forma ta' abbuż sesswali qabel jagħlqu t-18-il sena. Għaż-żgħażagħ LGBT, iċ-ċans li jgħaddu minn esperjenza ta' vjolenza sesswali huwa madwar 740 fil-mija iktar meta mqabbla ma' żgħażagħ eterosesswali li ma jkollhomx saqaf fuq rashom.

Kif tnaqqas ir-riskju ta' sfruttament sesswali tat-tfal

Il-Hosts li jużaw il-kameras ma jistgħux iħallu dawn il-kameras jagħtu fuq ġewwa tal-listing, anki jekk ikunu mitfija jew mhux imqabbda. Il-klijenti għandhom jiġu mgħarrfa b'kull kamera jew tagħmir ieħor li jirrekordja li jkun hemm fuq barra biex b'hekk ikunu jistgħu jieħdu l-passi meħtieġa u jevitaw li l-kameras jieħdu ritratti jew vidjows tat-tfal li jkunu qed joqogħdu fil-listing waqt li dawn ikunu għarwenin. Il-Hosts għandhom jiżguraw ukoll li l-kameras ikunu mħarsa sew biex jitnaqqas iċ-ċans li jiġu ħħekkjati u użati biex jiġbdu ritratti jew vidjows ta' tfal għarwenin.

Għal iktar dettalji dwar kif tevita li t-tfal jiġu sfruttati sesswalment tista' taqra l-materjal edukattiv li tista' tikseb mingħand in-National Center for Missing and Exploited Children, l-ECPAT-USA u l-International Center for Missing and & Exploited Children.