10 modi kif tieħu kemm tista' mill-ħidma ta' Host fi żmien il-Milied

Il-Milied dalwaqt magħna. Lest/a għall-iktar staġun popolari għall-bookings? Hemm ħafna affarijiet li tista' tagħmel biex tieħu kemm tista' minn daż-żmien tas-sena fosthom billi toħloq atmosfera tal-Milied fil-post tiegħek u tifhem kif l-aħjar taddatta għaż-żieda fid-domanda. Dawn huma l-10 pariri tagħna.

Kont taf li lejliet l-Ewwel tas-Sena huwa wieħed mill-iktar iljieli bbukkjati tas-sena fuq Airbnb? "Is-soltu nibdew nirċievu l-bookings għal lejliet l-Ewwel tas-Sena saħansitra minn Awwissu," jgħidu Branka u Silvia minn Zagreb, il-Kroazja. U dan ma jiġrix għall-Ewwel tas-Sena biss. Il-klijenti ta' spiss jibdew jippjanaw il-vjaġġi tagħhom ħafna xhur bil-quddiem—għalhekk qatt mhu kmieni wisq biex taġġorna l-kalendarju tiegħek għall-iktar żminijiet popolari. Li trid tevita hu li xi ħadd jilħaq jibbukkja l-ispazju tiegħek qabel tkun bdilt il-prezzijiet, id-disponibbiltà u r-rekwiżiti l-oħra.

Diġà ħejjejt kollox għal żmien il-Milied? Ara li fil-kalendarju tiegħek timblokka d-dati li matulhom ma tistax—jew mhux ċert/a jekk tistax—tilqa' n-nies. U jekk qed toffri l-ispazju tiegħek fuq pjattaformi oħra, uża l-faċilità tas-sinkronizzazzjoni tal-kalendarju biex tevita bookings doppji u l-kanċellazzjonijiet marbuta magħhom.

Minbarra l-festi bħal Diwali, Hannukkah, il-Milied u Kwanzaa, xi bliet jorganizzaw avvenimenti speċjali li jiġbdu lejhom ħafna vjaġġaturi. Se jiġu organizzati xi festivals jew kunċerti importanti? Dad-dati huma importanti għax b'hekk tifhem kif l-aħjar torganizza l-kalendarju tiegħek. Żomm ruħek aġġornat/a b'dak li hu mistenni jseħħ fiż-żona tiegħek billi tikkuntattja lill-uffiċju tat-turiżmu tal-post, tingħaqad mal-gruppi tal-midja soċjali u tirreġistra fuq app jew websajt li tavżak bl-avvenimenti.

Agħmel ftit riċerka tas-suq biex issib l-aħjar prezz għal żmien il-Milied għall-ispazju tiegħek. Dan jiġifieri li ssib xi prezzijiet qed joffru l-kompetituri tiegħek, kemm jekk huma lukandi tal-post kif ukoll Hosts ta' Airbnb oħra. Għażla oħra? Ixgħel Prezzijiet Intelliġenti li, skont is-settings tiegħek, id-domanda staġjonali u iktar minn 70 fattur ieħor, jibdlu l-prezzijiet ta' kull lejl tiegħek awtomatikament. Biss tinsiex tagħżel l-inqas prezz li lest/a taċċetta biex ir-rata tiegħek qatt ma jkun inqas minn dak li tħossok komdu/a bih.

Wara li tieħu idea ta' żmien il-festi u dati importanti oħra, ippersonalizza s-settings fil-kalendarju tiegħek. Għad-dati b'domanda ikbar, ħafna Hosts jagħżlu li jżidu r-rekwiżit għall-inqas tul ta' żjara. Meta teħtieġ li l-klijenti jibbukkjaw iktar iljieli, filwaqt li tkun qed tkabbar id-dħul tiegħek, tispiċċa tqatta' inqas ħin tieħu ħsieb il-bookings u tnaddaf l-ispazju tiegħek.

Issa li żmien il-Milied dalwaqt magħna, ma tagħmilx ħażin li tiċċara dak li l-klijenti jistgħu u ma jistgħux jagħmlu fl-ispazju tiegħek. Jistgħu jorganizzaw party lejliet l-Ewwel tas-Sena? Jistgħu jistiednu lill-familja għall-ikla ta' Jum ir-Ringrazzjament? Matul daż-żmien tas-sena jaf tkun tixtieq tillaxka jew tissikka r-Regoli tad-Dar tiegħek—u tinsiex tfakkar lill-klijenti li jeħtiġilhom jaqblu ma' dar-regoli qabel jibbukkjaw. Messaġġ mingħand l-Editur: Aġġornajna l-Politika għall-Parties u l-Avvenimenti tagħna f'Diċembru tal-2019—inħeġġuk biex tiċċekkja l-bidliet, iktar u iktar issa li qed tħejji ruħek biex tilqa' lill-klijenti fi żmien il-festi.

Għall-ġenituri li jkunu qed jivvjaġġaw bit-tfal, post addattat għall-familji jaf ikun sorpriża fih innifsu. Ħajjar iktar klijenti jibbukkjaw miegħek u agħmel iż-żjara tagħhom waħda isbaħ billi toffri dawk il-kumditajiet imfittxija mill-familji—bħal benniena, siġġu għoli, ġugarelli u logħob tal-mejda. Nissuġġerulek ukoll tagħti lill-klijenti tiegħek xi informazzjoni fuq kif jistgħu jieħdu kemm jistgħu miż-żjara tagħhom ġewwa l-belt tiegħek. Elise, Superhost ġewwa Nashville, tqiegħed dil-informazzjoni fil-gwida tal-ivvjaġġar tagħha. "Il-fatt li fil-gwida tal-ivvjaġġar ikollok taqsima marbuta mal-attivitajiet li tista' tagħmel mat-tfal jagħmel differenza kbira."

Trid toffri lill-klijenti żjara iktar speċjali? Ispira ruħek minn daż-żmien tas-sena, kemm fejn jidħol l-armar tal-Milied kif ukoll għall-ikel u t-tradizzjonijiet lokali li taqsam mal-klijenti. "Il-klijenti japprezzaw ħafna dal-affarijiet żgħar u l-atmosfera 'tad-dar' li jsibu fil-post tagħna," jgħidu Kelly u Larry, Hosts ġewwa New Braunfels, Texas. "Nieħu gost ħafna narahom fil-parapett bil-qargħa aħmar mixgħul jew ħdejn is-siġra tal-Milied huma u jixorbu l-kokkotina sħuna fil-maggijiet li nkun ħallejtilhom."

Fi żmien il-Milied tagħmel ħafna borra fiż-żona tiegħek? Jew inkella s-sajf jibda f'Diċembru? Il-vjaġġaturi jistgħu ma jkunux jafu x'temp għandhom jistennew li jsibu fir-reġjun tiegħek. Nissuġġerulek tħalli l-affarijiet meħtieġa fl-ispazju tiegħek bħal pereżempju umbrelel, pali għall-borra jew krema kontra x-xemx—il-klijenti japprezzaw ħafna dat-tip ta' kumditajiet. U tinsiex taqsam magħhom l-istruzzjonijiet kollha li għandhom ikunu jafu. Pereżempju Monica, Host ġewwa Ormstown, il-Kanada tgħid lill-klijenti: "Għalkemm wara li l-borra tieqaf, din titneħħa minn wieħed mit-tratturi tagħna, l-għatba ta' barra u l-parapett huma f'idejn il-klijent".

Minħabba t-temp, il-heaters tal-gass, il-ġeneraturi u ċ-ċmieni tiegħek jistgħu jintużaw iktar matul ix-xhur kesħin. Dawn jistgħu jwasslu għal riskju ikbar ta' nirien u avvelenament bil-monossidu tal-karbonju (CO). Waħħal allarm tad-duħħan, allarm tal-CO u mill-inqas apparat tat-tifi tan-nar wieħed fl-ispazju tiegħek. Ma tagħmilx ħażin anqas li kull sena tqabbad lil xi ħadd jiċċekkjalek iċ-ċmieni u l-fetħiet tal-arja sħuna biex tkun ċert/a li mhux misduda jew imsadda. Dan wieħed mill-iktar żminijiet popolari tas-sena—ħu ftit prekawzjonijiet biex ma jkollokx għalfejn tinkwieta iktar dwar is-sigurtà.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.