Checkout ċar u sempliċi

Il-proċess taċ-checkout m'għandux ikun proċess ikkumplikat għall-klijenti u l-Hosts. S'issa l-Hosts kellhom ifakkru lill-klijenti dwar il-ħin taċ-checkout u jgħidulhom wieħed wieħed dwar x'biċċiet tax-xogħol jistennew mingħandhom qabel iċ-checkout, bħal pereżempju li jitfu d-dwal u jbaxxu t-tisħin.

Għedtulna li xtaqtu sistema eħfef biex taqsmu dawn l-istruzzjonijiet għaċ-checkout mal-klijenti. Grazzi għall-kummenti u l-ħsibijiet li qsamtu magħna, fassalna bidliet maħsuba biex jagħmlu l-proċess taċ-checkout eħfef kemm għalik kif ukoll għall-klijenti tiegħek.

Issa tista' żżid l-istruzzjonijiet taċ-checkout fuq Airbnb direttament, l-istess kif iżżid ir-regoli tad-dar standard.

Oħloq lista għaċ-checkout malajr billi tagħżel fost dawn il-biċċiet tax-xogħol komuni:

• Iġbor ix-xugamani użati
• Armi ż-żibel
• Itfi kollox
• Sakkar warajk
• Agħti ċ-ċwievet lura

Tista' tikteb id-dettalji għal kull biċċa tax-xogħol. Tista' pereżempju titlob lill-klijenti jqiegħdu ż-żibel kollu f'landa waħda u kull ħaġa li għandha tiġi riċiklata f'landa oħra. Tista' taddatta t-talbiet għad-dar tiegħek billi pereżempju titlob lill-klijenti jgħattu l-BBQ wara li jużawh.

Il-klijenti jistgħu jsibu l-istruzzjonijiet taċ-checkout mit-tab Vjaġġi ta' Airbnb. L-istruzzjonijiet se jkunu mad-direzzjonijiet li jwasslu għall-post tiegħek, mar-regoli tad-dar, mad-dettalji tal-wifi u ma' dettalji importanti oħra. Bħalma jiġri bir-regoli tad-dar tiegħek, il-klijenti se jkunu jistgħu jaqraw l-istruzzjonijiet taċ-checkout qabel jibbukkjaw il-post tiegħek.

Żomm f'moħħok li l-klijenti jistennew checkout ħafif mingħajr ma jintalbu jnaddfu warajhom. Min-naħa l-oħra, skont ir-regoli bażi għall-klijenti, m'għandhomx iħallu l-post tiegħek fi stat li jkun jeħtieġ tindifa fil-fond jew tindif esaġerat.

"Għalina l-proċess taċ-checkout għandu jkun ħafif kemm jista' jkun," jgħid Keshav, membru tal-Bord Konsultattiv tal-Hosts ġewwa New Delhi. "Dawk li jgħinuna nnaddfu jagħmlu dak li hu meħtieġ huma stess."

Se nibagħtu tfakkira awtomatika lill-klijenti bil-ħin u l-istruzzjonijiet taċ-checkout tiegħek. Dit-tfakkira tintbagħat bħala notifika push lill-mowbajl tal-klijenti fil-17:00 tal-aħħar jum qabel iċ-checkout, fiż-żona tal-ħin tal-post fejn ikun jinsab il-listing.

Biex ikunu jistgħu jirċievu dit-tfakkira, il-klijenti jeħtieġ li jkollhom l-app ta' Airbnb installata u n-notifiki push mixgħula. Wara ċ-checkout il-klijenti jistgħu jagħfsu jew jikklikkjaw buttuna waħda biex javżawk li jkunu ħarġu mill-post.

Nissuġġerulek tagħmilha ċara għaliex importanti li jagħmlu ċ-checkout fil-ħin. "Jien ngħid lill-klijenti li fil-11:00 ikun ġej xi ħadd biex iħejji l-appartament għall-klijenti li jmiss u għalhekk importanti li jħallu l-post fil-ħin," jgħidilna Joh, Superhost ġewwa San Francisco.

Il-kartolini taċ-checkout il-ġodda se jagħmluhielek eħfef li tibgħat lill-klijenti d-dettalji taċ-checkout. Wara li tikteb l-istruzzjonijiet taċ-checkout tista' żżid il-kartolini taċ-checkout mat-tweġibiet ta' malajr u mal-messaġġi skedati. Il-kartolina se tieħu lill-klijent għall-istruzzjonijiet tiegħek.

Għalkemm Airbnb se tibgħat awtomatikament tfakkira lill-klijenti fl-aħħar lejl qabel iċ-checkout, xorta int se tkun responsabbli mill-esperjenza tiegħek mal-klijenti. Nissuġġerulek toħloq messaġġ skedat biex tibgħat tfakkira taċ-checkout direttament fl-inbox tal-klijenti ta' Airbnb għax mhux il-klijenti kollha jkunu niżżlu l-app ta' Airbnb jew xegħlu n-notifiki push.

Wara li l-klijenti jħallu l-post, jistgħu jagħtu rating bl-istilel lill-mod ta' kif il-Host ikkomunika magħhom u jispjegaw x'mar tajjeb u x'seta' sar aħjar. Jistgħu pereżempju jirrappurtawlna li kien hemm "biċċiet tax-xogħol esaġerati għaċ-checkout" huma u jiktbu r-review dwar il-booking tagħhom. Listings li jibqgħu jiksbu ratings baxxi minħabba biċċiet tax-xogħol esaġerati jistgħu jitneħħew mill-pjattaforma ta' Airbnb.

Il-klijenti xorta se jagħtu rating ġenerali ta' bejn stilla u ħames stilel għaż-żjara tagħhom. Il-kummenti, il-ħsibijiet u r-ratings bl-istilel għal kategoriji partikolari (bħal pereżempju l-komunikazzjoni) mhu se jkollhom l-ebda effett fuq l-istatus ta' Superhost.

Dawn il-faċilitajiet taċ-checkout huma parti mill-Aġġornament tas-Sajf 2023 ta' Airbnb, b'25 bidla ġdida għall-Hosts. Ikseb Aċċess Bikri biex tibda tuża dal-għodod il-ġodda minn issa.

L-informazzjoni f'dal-artiklu jaf laħqet inbidlet minn meta ġie ppubblikat.