Kif tirranġa s-settings u l-prezz tiegħek skont id-domanda tal-post fejn jinsab il-listing tiegħek

Waħda mill-iktar affarijiet li jistgħu jgħinuk tirnexxi bħala Host hija li taddatta għall-bidliet fid-domanda. Tista' żżid id-dħul billi tiżgura li l-ispazju tiegħek ikun disponibbli għal dati popolari u billi tirranġa l-prezz tiegħek skont iż-żmien tas-sena, l-avvenimenti fil-qrib u x-xejriet fl-ivvjaġġar.

Is-sena l-oħra l-listings bi prezzijiet li nbidlu mill-inqas erba' darbiet fis-sena raw żieda ta' iktar minn 30% fl-iljieli bbukkjati meta mqabbla maż dawk li ma wettqux dal-bidliet.* Ġbarna ftit għodod u pariri u suġġerimenti mingħand il-Hosts biex ngħinuk tagħraf dawn l-opportunitajiet.

Ibda billi tfittex listings bħal tiegħek fuq Airbnb li jinsabu fl-istess żona. Iċċekkja kif u meta l-Hosts l-oħra jibdlu l-prezzijiet tagħhom biex tifhem kif l-aħjar taħdem fiż-żona tiegħek. Xi punti importanti li għandek iżżomm f'moħħok:

• Ix-Xejriet jum b'jum. Id-domanda tista' tinbidel skont il-jum tal-ġimgħa, l-iktar fejn jidħlu ż-żjarat għal żmien qasir. Nhar ta' Ġimgħa u nhar ta' Sibt huma l-iktar jiem popolari mal-klijenti li jivvjaġġaw għall-mistrieħ filwaqt li bejn nhar ta' Ħadd u nhar ta' Ħamis, ħafna drabi huma l-jiem imfittxija minn dawk li jivvjaġġaw fuq xogħol.

• Il-bidliet bejn żmien tas-sena ieħor. Il-post fejn jinsab il-listing tiegħek jista' jaffettwa d-domanda, l-iktar f'postijiet li f'ċerti żminijiet tas-sena jiġbdu folol ikbar. Tista' ddaħħal iktar flus meta tilqa' n-nies fl-iktar żmien imfittex mill-vjaġġaturi.

• L-Avvenimenti speċjali. Il-konferenzi, il-festivals u avvenimenti kbar oħra jistgħu joħolqu domanda kbira. Biex dejjem tkun taf x'qed jiġri fiż-żona, ikkuntattja lill-uffiċċju tat-turiżmu tal-post, issieħeb fil-gruppi tal-midja soċjali u rreġistra ma' xi siti li jbigħu l-biljetti għall-avvenimenti. Fuq il-gazzetti u x-xandir tal-post u fl-universitajiet tista' ssib wkoll informazzjoni siewja ħafna.

Tinsiex tqiegħed id-disponibbiltà tal-kalendarju tiegħek qabel tibdel l-prezzijiet biex b'hekk il-post ikun disponibbli matul id-dati li temmen li se jkunu popolari. Nissuġġerulek ukoll tiċċekkja t-tab Opportunitajiet tiegħek għal iktar perspettivi dwar dak li l-klijenti qed ifittxu fiż-żona ta' fejn jinsab il-listing tiegħek, fosthom l-iktar dati u tipi ta' postijiet fejn toqgħod popolari.

Kif tibda tifhem sew ix-xejriet tal-post fejn jinsab il-listing tiegħek, tista' toħloq prezzijiet personalizzati għal matul il-ġimgħa, tmiem il-ġimgħa u l-btajjel—jew tista' tbiddel ir-rata tiegħek meta jkunu se jiġu organizzati xi konferenzi jew avvenimenti kbar fiż-żona tiegħek.

Biex issib l-aħjar prezz li jgħodd għalik u għall-klijenti tiegħek, nissuġġerulek tipprova tuża l-għodda li tagħtik ħarsa minn qabel lejn il-prezz. Tista' ddaħħal firxa ta' dettalji u aħna nuruk rendikont tal-prezz li se jħallsu l-klijenti u tal-ħlas li se tirċievi int f'dawk is-sitwazzjonijiet differenti.

Fi żminijiet b'domanda baxxa ħafna spazji ma jiġux ibbukkjati. Ipprova ħajjar lill-klijenti jibbukkjaw il-listing tiegħek billi toffri offerta jew tbaxxi l-prezz.

Prezzijiet kompetittivi jistgħu jgħinu lil-listing tiegħek jintwera f'post aħjar fir-riżultati tat-tiftix u għalhekk tkun eħfef għall-klijenti li jsibu u jibbukkjaw il-post tiegħek. Nissuġġerulek toffri skontijiet skont it-tip ta' booking li jsir, fosthom:

• Skontijiet għal min jibbukkja kmieni. Tista' tħajjar lill-klijenti li jibbukkjaw kmieni jekk tiftaħ il-kalendarju tiegħek biżżejjed żmien bil-quddiem u toffri skont għal min jibbukkja kmieni.

• Skontijiet ta' kull ġimgħa u ta' kull xahar. Tista' tħajjar lill-klijenti jibbukkjaw żjarat itwal u fl-istess waqt tnaqqas il-jiem li matulhom il-post tiegħek ikun vojt jekk toffri prezz irħas.

• Skontijiet tal-aħħar minuta. Tista' żżid il-bookings u tnaqqas il-kanċellazzjonijiet jekk tbaxxi l-prezz tiegħek iktar ma toqrob id-data taċ-checkin.

Li tkun taf xi prezz għandek titlob u meta għandek tibdel il-prezz tiegħek hija arti. Dawn huma xi affarijiet li Hosts oħra ppruvaw:

• Aħseb bil-quddiem. "Is-soltu nibdew nirċievu l-bookings għal lejliet l-Ewwel tas-Sena saħansitra minn Awwissu." —Branka u Silvia minn Zagreb, il-Kroazja

• Agħżel l-inqas numru ta' ljieli li lest/a taċċetta. "Għal żmien il-Milied nitlob mill-inqas erbat iljieli għall-bookings, u nirranġa l-prezzijiet biex l-ogħla rata tkun Lejliet l-Ewwel tas-Sena." —Letti minn Atascosa, Texas

• Ħu kemm tista' meta d-domanda tkun baxxa. "Nissuġġerixxi li tnaqqas il-prezzijiet għall-istaġuni inqas popolari biex tibbilanċja ftit. Jew uża dak iż-żmien biex tagħmel xogħol ta' titjib jew ta' żamma għax żgur li mhux se jkollok ħin tagħmel hekk meta x-xogħol jerġa' jaqbad." —Sandra minn Daylesford, l-Awstralja

• Stenna li se jgħaddi ftit żmien qabel issib sistema li tgħodd għalik. "L-aħjar mod li tifhem kif sejjer huma l-bookings u r-reviews tajbin," —Jeff u Jess minn Durham, North Carolina

* Skont id-dejta minn listings minn madwar id-dinja kollha (ħlief miċ-Ċina, mir-Russja u mill-Ukrajna) li kellhom mill-inqas lejl wieħed disponibbli minn Jannar sa Settembru 2022 u ma kellhomx il-Prezzijiet Intelliġenti mixgħula. Setgħu kien hemm raġunijiet oħra għaliex l-iljieli ma ġewx ibbukkjati.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.