Tweġibiet għall-mistoqsijiet tagħkom dwar kif tilqa' n-nies matul il-pandemija tal-COVID-19
Punti ewlenin
- Il-Hosts xorta huma meħtieġa jimxu mal-proċess għat-tindif imtejjeb f'5 passi
Fejn legalment tista' tagħmel hekk, fir-regoli tad-dar tiegħek tista' titlob li l-klijenti jkunu mlaqqma jew li jkollhom test tal-COVID-19 magħmul fl-aħħar jiem
Il-Hosts u l-klijenti għandhom jimxu mal-linji gwida dwar il-maskri u t-tbegħid soċjali tal-post fejn jinsab il-listing
Il-komunità tagħna ħabbtet wiċċha ma' sfidi kbar u żminijiet ta' inċertezza minn mindu f'Marzu tal-2020 l-Għaqda Dinjija tas-Saħħa ddikkjarat il-COVID-19 bħala pandemija dinjija. Nixtiequ nkomplu ngħinuk billi nwieġbu wħud mill-iktar mistoqsijiet komuni tal-Hosts dwar it-tilqim, il-varjanti tal-COVID-19, it-tindif u iktar.
X'pariri tistgħu tagħtu lill-Hosts li jinsabu mħassba dwar il-COVID-19—bħal pereżempju dwar xi varjanti ġodda?
Matul il-pandemija tal-COVID-19 tlabna l-pariri tal-esperti fil-qasam tal-mediċina biex jgħinuna fir-reazzjoni tagħna għall-COVID-19.
"Aħna u naraw il-ħolqien ta' varjanti ġodda madwar id-dinja, qed inkomplu naħdmu fil-qrib ma' Airbnb biex nifhmu l-impatt tagħhom u naġġornaw is-suġġerimenti tagħna għall-komunità tagħha skont il-ħtieġa," tgħid il-konsulent mediku Dr. Megan Coffee, tabiba speċjalizzata fil-mard infettiv, riċerkatriċi u epidemologa.
"Airbnb xorta teħtieġ li l-Hosts kollha jimxu mal-proċess għat-tindif f'5 passi obbligatorju u nħeġġu lill-Hosts u lill-klijenti jimxu mar-rekwiżiti lokali għas-saħħa u għall-vjaġġi kollha," tgħid.
Biex ngħinu lill-vjaġġaturi jibqgħu aġġornati dwar il-bidliet fil-linji gwida marbuta mal-pandemija tal-COVID-19, isseħibna wkoll ma' Sherpa, għodda onlajn fejn il-vjaġġaturi jistgħu jsibu l-iktar regoli għall-vjaġġi aġġornati għal postijiet minn madwar id-dinja kollha. Il-Hosts u l-klijenti jistgħu jużaw Sherpa biex isiru jafu dwar ir-rekwiżiti tat-testijiet, il-protokolli ta' kwarantina u r-restrizzjonijiet l-oħra.
X'nista' nagħmel jekk ma nistax nilqa' n-nies minħabba r-restrizzjonijiet marbuta mal-COVID-19 taż-żona tiegħi?
Tista' tuża Sherpa biex issir taf dwar ir-rekwiżiti tat-testijiet, il-protokolli ta' kwarantina u r-restrizzjonijiet l-oħra fil-qrib. Jekk taħseb li se jkollok tikkanċella booking mistenni għall-ġejjieni minħabba r-restrizzjonijiet imposti mill-gvern, nissuġġerulek tikkomunika mal-klijenti tiegħek mill-iktar fis possibbli biex tavżahom li l-vjaġġ tagħhom jaf jiġi mfixkel.
Il-Hosts b'esperjenza qalulna li jissuġġerixxu lill-klijenti biex jibdlu l-booking għal dati fil-ġejjieni u li xi kultant joffru xi ljieli żejda bla ħlas jew skontijiet oħra biex iżidu ċ-ċans li l-klijent jibdel id-dati minflok jikkanċella.
Jekk ikollok tikkanċella booking minħabba r-restrizzjonijiet fuq il-vjaġġi jew fuq li tilqa' n-nies imposti mill-gvern, inħeġġuk tikkuntattja lit-tim tal-Għajnuna lill-Komunità tagħna mill-iktar fis possibbli biex tgħinna nirrevedu s-sitwazzzjoni tiegħek. Jekk tikkanċella booking f'każ bħal dan, minbarra li ma titħallasx għall-booking, jaf tkun eliġibbli biex tevita konsegwenzi oħra—bħal pereżempju li l-kanċellazzjoni titqies matul il-valutazzjoni tas-Superhosts.
Nista' neħtieġ li l-klijenti tiegħi jkunu mlaqqma jew li jagħmlu test għall-COVID-19?
Il-Hosts jistgħu joħolqu r-regoli tad-dar tagħhom, inkluż li jitolbu li l-klijenti jkunu mlaqqma jew li ma jkunux ilhom li għamlu test għall-COVID-19 sakemm il-liġijiet jew ir-regolamenti tal-post fejn jinsab il-listing ma jżommuhomx milli jagħmlu hekk.
Jekk teħtieġ li l-klijenti jkunu mlaqqma jew li ma jkunux ilhom li għamlu test għall-COVID-19, ara li ssemmi dil-ħaġa bl-iktar mod ċar u prominenti fid-deskrizzjoni tal-listing tiegħek u fir-regoli tad-dar tiegħek biex il-klijenti jkunu jafu x'qed tistenna.
X'inhuma l-aħħar linji gwida dwar it-tindif, it-tbegħid soċjali u l-maskri?
Aħna u nkomplu bil-ħidma tagħna biex inħarsu l-komunitajiet tagħna u nevitaw il-firxa tal-COVID-19, il-Hosts huma meħtieġa jimxu mal-proċess għat-tindif imtejjeb f'5 passi bejn żjara u oħra. Tista' tniżżel il-gwida għat-tindif tagħna għall-istruzzjonijiet u ċ-checklists dettaljati li ħloqna fi sħubija ma' esperti fil-qasam tal-mediċina.
Billi Airbnb għandha listings madwar id-dinja kollha u kull reġjun jaf jinsab fi stadju differenti tal-ħidma tiegħu kontra t-tixrid tal-COVID-19, aħna qed nitolbu lill-Hosts u lill-klijenti jimxu mal-liġijiet u l-linji gwida tal-post fejn jinsab il-listing għal dak li għandu x'jaqsam mal-maskri u t-tbegħid soċjali. Meta l-liġijiet jew il-linji gwida tal-post fejn jinsab il-listing jitolbu hekk, meta jiltaqgħu wiċċ imb wiċċ il-Hosts u l-klijenti għandhom jilbsu għata tal-wiċċ u jżommu mill-inqas żewġ metri (sitt piedi) 'l bogħod minn xulxin.
Sir af iktar dwar ir-regoli tas-sigurtà tagħna marbuta mal-COVID-19
X'inhi l-politika taċ-ċirkostanzi attenwanti? Il-kanċellazzjonijiet marbuta mal-COVID-19 għadhom jaqgħu taħtha?
Il-politika taċ-ċirkostanzi attenwanti tintuża fil-każ li avvenimenti mhux mistennija bħal diżastri naturali jew emerġenzi tas-saħħa pubblika jagħmluha impossibbli jew illegali li tagħmel użu minn booking. Il-Hosts u l-klijenti milquta minn avveniment li jaqa' taħt dil-politika jafu jkunu eliġibbli li jikkanċellaw il-booking tagħhom mingħajr ebda penali.
Il-politika taċ-ċirkostanzi attenwanti tagħna hija maħsuba biex tħarsek f'każ ta' sitwazzjonijiet mhux mistennija imma l-COVID-19 issa hija parti mill-ħajja tagħna ta' kuljum. Għall-bookings li jsiru mill-31 ta' Mejju 2022 'il quddiem, is-sitwazzjonijiet marbuta mal-COVID-19 mhux se jibqgħu jaqgħu taħt il-politika tagħna. Dan ifisser li, sakemm il-politika ta' kanċellazzjoni tiegħek ma tgħidx xorta oħra, il-klijenti mhux se jkunu jistgħu jitħallsu flushom kollha lura jekk jikkanċellaw booking għax ikunu morda bil-COVID-19.
Għall-bookings li saru qabel il-31 ta' Mejju 2022, għall-bookings mill-Korea t'Isfel għal listings ġewwa l-Korea t'Isfel u għall-bookings miċ-Ċina kontinentali għal listings ġewwa ċ-Ċina kontinentali, ċerti sitwazzjonijiet marbuta mal-COVID-19 se jibqgħu jaqgħu taħt dil-politika.
Sir af iktar dwar it-tneħħija tal-COVID-19 minn ċirkostanza attenwanti
X'jiġri jekk jien jew xi ħadd mill-klijenti tiegħi nimirdu bil-COVID-19?
Jekk fl-aħħar 14-il jum Host jew klijent jirċievu test pożittiv għall-COVID-19 jew ikollhom xi sintomi tal-COVID-19, il-politika ta' Airbnb hija li l-klijenti m'għandhomx jagħmlu ċ-checkin u l-Hosts m'għandhomx jidħlu fil-post jew jiltaqgħu mal-klijenti wiċċ imb wiċċ.
Jekk klijent ikun jixtieq jikkanċella l-booking tiegħu li sar mill-31 ta' Mejju 2022 'il quddiem għax ikun marid bil-COVID-19, aħna se nimxu mal-politika ta' kanċellazzjoni tal-Host.* Jekk il-klijent ikun diġà għamel iċ-checkin u int jew il-klijent timirdu bil-COVID-19, ikkuntattja lil Airbnb biex tavżana ħalli nkunu nistgħu ngħinuk.
L-istatus ta' Superhost tiegħi se jiġi affettwat jekk nikkanċella booking minħabba li jien marid bil-COVID-19?
Inħeġġuk tikkuntattja lit-tim tal-Għajnuna tal-Komunità mill-iktar fis possibbli jekk jeħtieġlek tikkanċella booking għax marid/a bil-COVID-19—b'hekk tkun qed tgħinna nirrevedu s-sitwazzjoni tiegħek. Jekk tikkanċella booking f'każ bħal dan, minbarra li ma titħallasx għall-booking, jaf tkun eliġibbli biex tevita konsegwenzi oħra—bħal pereżempju li l-kanċellazzjoni titqies matul il-valutazzjoni tas-Superhosts.
X'għandi nkun naf iktar dwar kif inżomm l-istatus ta' Superhost tiegħi waqt il-pandemija tal-COVID-19?
Meta fl-2020 bdiet il-pandemija tal-COVID-19, għażilna li għal ftit żmien ma nagħtux kas ta' xi kriterji għal dawk li kienu diġà Superhosts. Biss issa erġajna bdejna nitolbu r-rekwiżiti standard għas-Superhosts tagħna, għalhekk, biex jiksbu jew iżommu l-istatus ta' Superhost, il-Hosts għandhom ikollhom kull wieħed mill-4 kriterji.
Sir af iktar dwar il-bidliet fil-valutazzjoni tas-Superhosts
Għad għandi xi mistoqsijiet. Lil min għandi nikkuntattja?
Għal iktar informazzjoni nissuġġerulek li taqra r-riżorsi tagħna dwar is-sigurtà għall-COVID-19 jew żur iċ-Ċentru tal-Għajnuna. Jekk għandek xi mistoqsijiet urġenti jekk jogħġbok ikkuntattja lit-tim tal-Għajnuna lill-Komunità tagħna.
*Għall-bookings li saru qabel il-31 ta' Mejju 2022, għall-bookings mill-Korea t'Isfel għal listings ġewwa l-Korea t'Isfel u għall-bookings miċ-Ċina kontinentali għal listings ġewwa ċ-Ċina kontinentali, ċerti sitwazzjonijiet marbuta mal-COVID-19 se jibqgħu jaqgħu taħt il-politika taċ-ċirkostanzi attenwanti tagħna.
L-informazzjoni li tinsab f'dal-artiklu jaf laħqet inbidlet minn meta ġie ppubblikat.
Punti ewlenin
- Il-Hosts xorta huma meħtieġa jimxu mal-proċess għat-tindif imtejjeb f'5 passi
Fejn legalment tista' tagħmel hekk, fir-regoli tad-dar tiegħek tista' titlob li l-klijenti jkunu mlaqqma jew li jkollhom test tal-COVID-19 magħmul fl-aħħar jiem
Il-Hosts u l-klijenti għandhom jimxu mal-linji gwida dwar il-maskri u t-tbegħid soċjali tal-post fejn jinsab il-listing