Ikkomunika awtomatikament grazzi għal dal-aġġornamenti tal-inbox tiegħek

Aħna ta' Airbnb nafu li dil-aħħar sena ma kinetx waħda faċli. Qattajna ħafna ħin nistaqsu lilna nfusna (u lilkom!) kif nistgħu nħejju ruħna għal meta l-vjaġġi jerġgħu jibdew jaqbdu u kif nistgħu ngħinukom tagħtu merħba mill-isbaħ lill-klijenti.

Bdilna l-inbox tal-Hosts tagħna ta' taħt fuq biex niffrankawlek ħafna ħin prezzjuż. Issa l-inbox taħdem 10 darbiet iktar malajr u għandha faċilitajiet aġġornati bħall-messaġġi skedati, tweġibiet ta' malajr personalizzati u fittex u ffiltra—kull faċilità maħsuba biex tgħinek tħaffef il-komunikazzjoni tiegħek mal-klijenti.

Dawn l-aġġornamenti tal-inbox biex jiffrankawlek il-ħin huma parti minn aġġornament ikbar tas-servizz ta' Airbnb li ħabbarna f'Mejju biex, issa li se sseħħ bidla kbira fil-mod ta' kif in-nies jivvjaġġaw, inkunu qed nagħmluhielek eħfef li tilqa' n-nies.

Ara kif qed ngħinuk tikkomunika aħjar mal-klijenti tiegħek:

Meta twieġeb lill-klijenti fil-pront tkun qed tgħin biex tinħoloq esperjenza tal-klijenti mill-aqwa—imma nifhmu li dil-ħaġa tista' tieħu ħafna ħin.

Issa tista' tuża l-messaġġi skedati. Tista' tuża dil-faċilità biex tibgħat lill-klijenti tiegħek messaġġi awtomatiċi f'mumenti importanti bħal wara li jibbukkjaw, wara li jagħmlu ċ-checkin u wara ċ-checkout.

Żidna wkoll shortcodes personalizzati biex iddaħħal awtomatikament xi dettalji bħal isem il-klijent u d-data taċ-checkin. Dan kollu jfisser li issa l-messaġġ "Grazzi tal-booking!" jista' jsir "Grazzi tal-booking, Anna!" —mingħajr ebda xkiel.

Ibda uża l-messaġġi skedati

Messaġġi tat-tip "Tista' tgħidli kif nasal fil-post tiegħek?" mingħand il-klijenti u "X'inhi l-password tal-wifi?" huma messaġġi komuni ħafna.

Għalhekk ħloqna l-faċilità tat-tweġibiet ta' malajr li tagħmilhielek eħfef twieġeb malajr għall-iktar mistoqsijiet komuni. Kemm tagħżel il-messaġġi li tkun ħejjejt qabel u tagħfas ibgħat. L-istess bħall-messaġġi skedati, it-tweġibiet ta' malajr issa jista' jkollhom shortcodes li jgħinuk tippersonalizza kull messaġġ li tibgħat.

"[It-tweġibiet ta' malajr] jagħtuni l-opportunità li nikteb tweġiba maħsuba—tweġiba ċara, li ġiet iċċekkjata sew u, skont il-każ, li tkun adattata għall-ħtiġijiet tal-klijenti tagħna," tgħid Sally, Host ġewwa Snoqualmie, Washington.

Oħloq it-tweġibiet ta' malajr

L-inbox hija eħfef biex tużaha grazzi għall-faċilitajiet tat-tiftix u tal-filtri li jagħmluhielek eħfef li ssib dak li teħtieġ, meta teħtieġu. Mhux se tkompli taħli l-ħin tqalleb il-messaġġi biex issib il-konverżazzjoni li tkun qed tfittex.

Fittex
Issa tista' tfittex l-inbox tiegħek aħjar billi tuża isem il-klijent, il-kodiċi ta' konferma jew il-kliem ewlieni. Biex tfittex bil-kliem ewlieni, kemm tikteb xi ħaġa fil-kaxxa tat-tiftix—l-inbox tiegħek se tipprova tifhem x'qed tipprova tikteb u int u tikteb se tibda tara r-riżultati. (Żomm xi ħaġa f'moħħok: il-kliem ewlieni tiegħek irid jiġi miktub mingħajr żbalji inkella l-inbox mhux se tkun tista' ssib il-messaġġi li qed tfittex.)

Organizza
Biex ngħinuk tiffoka dawk il-konverżazzjonijiet u problemi li l-iktar jeħtieġu attenzjoni, tista' wkoll torganizza l-messaġġi tiegħek billi timmarka l-messaġġi bħala mhux moqrija, timmarkahom bi stilla jekk ikunu importanti jew tarkivjahom.

Iffiltra
Wara li l-messaġġi tiegħek ikunu ġew immarkati bħala mhux moqrija jew bi stilla, se tkun tista' tiffiltrahom aħjar biex issib il-messaġġ li teħtieġ. Fuq in-naħa tal-lemin tal-kaxxa tat-tiftix se jkollok ikona ta' filtru li se tgħinek tiffiltra l-messaġġi skont it-tip u/jew fejn wasal il-vjaġġ. Il-filtru tal-istilel se jgħinek tiffoka fuq il-messaġġi li mmarkajt bħala importanti filwaqt li l-filtru tal-messaġġi mhux moqrija se jurik biss il-messaġġi li għadek ma qrajtx jew li mmarkajt bħala mhux morqrija.

Tista' tiffiltra wkoll skont il-listing (jekk għandek iktar minn listing wieħed) u skont fejn ikun wasal il-vjaġġ, pereżempju:

• Mistoqsijiet jew talbiet
• Review meħtieġa
• Checkin jew checkout
• Qabel, waqt jew wara l-vjaġġ

Meta tkun tista' tuża l-filtri u tfittex fl-inbox se tkunlek eħfef kemm li ssib u twieġeb għall-messaġġi kif ukoll li tikkomunika mal-klijenti.

Skopri l-inbox il-ġdida tiegħek

Fassalna l-inbox il-ġdida tal-Hosts u aġġornajna l-għodod tal-messaġġi tagħna biex ngħinuk tikkomunika mal-klijenti aħjar u biex niffrankawlek il-ħin. U meta tikseb lura ftit ħin liberu, nisperaw li tkun tista' tiffoka fuq l-iktar ħaġa importanti: li tgawdi l-benefiċji talli tilqa' n-nies.