Diskussjonijiet dwar id-diskriminazzjoni waqt sessjoni fejn il-Hosts ta' Airbnb jistgħu jiksbu t-tweġibiet għall-mistoqsijiet tagħhom
Punti ewlenin
Il-Hosts jixtiequ li jkollhom xi informazzjoni importanti dwar il-klijenti tagħhom
Kien hemm xi tħassib li r-ritratti setgħu jintużaw b'mod li jmur kontra l-politika ta' nondiskriminazzjoni tagħna
Il-politika tar-ritratti tal-klijenti ta' Airbnb hija mod kif qed nippruvaw intaffu ftit minn dat-tħassib
Airbnb ta' sikwit torganizza diskussjonijiet mal-Hosts biex flimkien nitħaddtu dwar l-iktar suġġetti importanti għalihom. Kemm jekk inkunu qed niddiskutu r-ratings tal-post fejn ikun jinsab listing jew ir-reviews tal-Hosts, dad-diskussjonijiet kollha għandhom ħaġa komuni—huma onesti, diretti u post fejn nistgħu nitkellmu dwar suġġetti ibsin.
Nibbilanċjaw il-perspettivi differenti tal-komunità tal-Hosts
F'Ottubru tal-2018, Airbnb biddlet il-mod ta' kif jintwerew ir-ritratti tal-profil tal-klijenti biex tħeġġeġ lill-Hosts ikunu iktar objettivi meta jieħdu d-deċiżjonijiet tagħhom matul il-proċess tal-booking. Issa r-ritratti tal-profil tal-klijent jintwerew biss wara li jiġi kkonfermat il-booking.
F'April tal-2019, waqt sessjoni ġewwa Londra fejn il-Hosts ta' Airbnb setgħu jistaqsu l-mistoqsijiet tagħhom, il-Hosts iddiskutew l-effett ta' dal-bidliet u kellhom diskussjoni interessanti dwar il-preġudizzji u d-diskriminazzjoni. Aħniex konxji minnhom jew le, xorta waħda kollha kemm aħna għandna preġudizzji u twemmin dwar tipi differenti ta' nies u gruppi soċjali. Anke jekk nippruvaw nimxu sewwa ma' kulħadd, kultant il-preġudizzji—diretti jew indiretti—jwassluna biex nieħdu deċiżjonijiet li jolqtu ħażin lill-oħrajn.Xi Hosts qasmu magħna li ma tantx kienu kuntenti b'dal-aġġornament għax ir-ritratti huma importanti biex jagħtuhom l-informazzjoni dwar il-klijenti tagħhom. Iżda ħafna oħrajn, bħal Dennis, qalulna li dil-bidla kienet meħtieġa għax ir-ritratti jistgħu jwasslu għad-diskriminazzjoni.
"Kelli ħafna klijenti li qaluli, 'Ir-raġuni li bbukkjajna miegħek kienet li konna nafu li mhux se tirrifjuta l-booking tagħna minħabba li aħna min aħna'," jgħidilna Dennis.
Laura Chambers, id-Direttur Ġenerali ta' Airbnb ta' dak iż-żmien, għalqet id-diskussjoni billi qalet li tifhem li d-diskussjonijiet dwar id-diskriminazzjoni mhux faċli imma huma taħditiet li importanti jsiru. Id-diskriminazzjoni jaf tkun xi ħaġa tqila li titkellem dwarha imma jeħtieġ li nitkellmu dwarha b'mod ċar—flimkien—qabel inkunu nistgħu niġġielduha.
Kif jaħdmu r-ritratti tal-profil tal-klijenti fuq Airbnb
Kollha kemm aħna ftit jew wisq preġudikati. Imma l-kumpaniji bħal Airbnb jistgħu jgħinu billi joħolqu għodod li ma jħallux lin-nies jieħdu deċiżjonijiet fuq il-bażi tal-preġudizzji—ir-raġuni li minħabba fiha fl-2016 impenjajna ruħna li nibdlu l-mod kif ir-ritratti tal-profil tal-klijenti jintwerew matul il-proċess tal-booking. Issa r-ritratti tal-profil tal-klijenti mhux jintwerew lill-Hosts qabel jikkonfermaw il-booking biex b'hekk il-Hosts ikunu jistgħu jieħdu deċiżjonijiet iktar objettivi.
Wasalna għal did-deċiżjoni wara li tkellimna ma' ħafna Hosts u klijenti. Għalkemm il-biċċa l-kbira tal-klijenti jtellgħu ritratt, xi wħud qalulna li jippreferu jekk ma jkunx hemm ritratt tagħhom huma u jibbukkjaw. Aħna nifhmu t-tħassib tagħhom li r-ritratti jistgħu jintużaw b'mod li jmur kontra l-politika ta' nondiskriminazzjoni tagħna.
Fl-istess waqt intom il-Hosts għedtulna li r-ritratti tal-profil huma importanti għalikom għax jgħinu biex il-klijent u l-Host isiru jafu lil xulxin qabel jibda l-vjaġġ u biex il-Host jagħraf lill-klijent waqt iċ-checkin. Innutajna wkoll li r-ritratti jistgħu jkunu għodda tajba biex ngħollu l-livell tal-fiduċja u nkabbru l-komunità tagħna.
Il-politika li qed nimxu magħha llum ġiet imfassla biex tipprova tilħaq bilanċ bejn il-ħtiġijiet tal-Hosts u dawk tal-klijenti. L-għan tagħna huwa wieħed: li noħolqu dinja fejn kulħadd ikun jista' jħossu li qiegħed id-dar, ikun fejn ikun. Li nuru r-ritratt tal-klijent lill-Hosts wara li jkunu aċċettaw il-booking huwa l-mod tagħna ta' kif qed nippruvaw nilħqu dak il-bilanċ. Sir af iktar dwar dal-bidlietBiex nagħtu lil Hosts bħalek iktar kontroll matul dal-proċess u ngħinuk tibni l-fiduċja fil-klijenti qabel vjaġġ, tista':
- Titlob li l-klijenti jibagħtu dokument tal-identità maħruġ mill-gvern lil Airbnb qabel ikunu jistgħu jibbukkjaw il-listing tiegħek
- Tibgħat messaġġ lill-klijenti u tistaqsihom x'kienet ir-raġuni li għażlu l-post tiegħek
- Taqra r-reviews li l-klijenti diġà kisbu biex issib x'kellhom xi jgħidu dwar l-esperjenza tagħhom ma' Hosts oħra
- Titlob li l-klijenti jkollhom ritratt tal-profil, anke jekk ir-ritratt se tkun tista' tarah biss wara li booking jiġi aċċettat
Dawn il-passi jistgħu jagħtu kontroll ikbar lill-Hosts filwaqt li xorta jgħinu biex titnaqqas id-diskriminazzjoni. Ħloqna wkoll gwida li tispjega t-tipi ta' preġudizzji u sterjotipi differenti, kif fuq il-pjattaforma ta' Airbnb jistgħu jaffettwaw l-esperjenza ta' membru tal-komunità u x'tista' tagħmel biex tegħlibhom.
Imma fadlilna ħafna iktar xogħol x'nagħmlu u nafu li din hija biss waħda mill-ħafna affarijiet importanti li għandhom isiru. Se nkomplu niltaqgħu mal-Hosts biex nifhmu kif nistgħu naħdmu flimkien u niżguraw li n-nies minn kull rokna tal-ħajja jħossuhom siguri, rispettati u milqugħin.
Punti ewlenin
Il-Hosts jixtiequ li jkollhom xi informazzjoni importanti dwar il-klijenti tagħhom
Kien hemm xi tħassib li r-ritratti setgħu jintużaw b'mod li jmur kontra l-politika ta' nondiskriminazzjoni tagħna
Il-politika tar-ritratti tal-klijenti ta' Airbnb hija mod kif qed nippruvaw intaffu ftit minn dat-tħassib