Mur 'il quddiem biex taċċessa r-riżultati suġġeriti
    Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

    Pariri utli fuq kif tilqa' l-klijenti internazzjonali

    Uża dal-pariri ta' Superhost ġewwa l-Ġappun biex tifhem kif għandek tikkomunika ma' klijenti ta' kulturi differenti minn tiegħek.
    Minn Airbnb f'did-data: 19 ta’ Lul 2021
    3 minuti biex taqrah
    Aġġornat f'did-data: 19 ta’ Lul 2021

    Punti ewlenin

    • Qed niċċelebraw il-fatt li l-Hosts jilqgħu lil klijenti minn madwar id-dinja kollha

    • Shinya Nishide, mill-Bord Konsultattiv tal-Hosts, jaqsam xi pariri fuq kif toħloq żjarat pjaċevoli għal klijenti ta' kulturi differenti

    • Irċievi l-aħħar aħbarijiet dwar il-ħidma tal-Bord Konsultattiv tal-Hosts fl-2021

    Hello lil kulħadd,

    Jien Shinya, Superhost minn Osaka, il-Ġappun u jien ukoll membru tal-Bord Konsultattiv tal-Hosts. Biex inkomplu ngħixu l-ispirtu tal-Esperjenzi Onlajn Olimpiċi u Paralimpiċi li qed iqarrbu lin-nies minn madwar id-dinja kollha lejn dak li qed iseħħ f'Tokyo 2020, xtaqt niffoka fuq il-ħafna nies differenti li jagħmlu parti mill-komunità ta' Airbnb.

    Kompli aqra biex issir taf x'għallmitni dwar kif tilqa' n-nies l-esperjenza tiegħi bħala klijent u biex tiskopri l-pariri tiegħi dwar kif il-Hosts jistgħu jilqgħu n-nies li ġejjin minn kulturi differenti.

    Il-benefiċċji li taqsam darek mal-oħrajn

    L-ewwel darba li użajt Airbnb kien fl-2015 għal vjaġġ tax-xogħol ġewwa Shanghai, iċ-Ċina. Kien hemm kumpanija kbira li kienet qed torganizza avveniment kbir u l-lukandi tal-post kienu bbukkjati kollha u għalhekk għażilt li noqgħod f'post li sibt fuq Airbnb.

    Malli wasalt, kelli taħdita interessanti mal-Host, li spjegali kull ħaġa dwar l-ispazju. L-esperjenza ma kellha xejn x'taqsam ma' lukanda imma għoġbitni ħafna. Dil-esperjenza wrietni li meta l-Hosts u l-klijenti jibnu rabta, iż-żjara ssir waħda iktar unika u speċjali.

    Irnexxieli nibni rabtiet tajba ħafna mal-Hosts li ltqajt magħhom matul il-vjaġġi tiegħi. Mingħandhom tgħallimt li mhux kulħadd jara d-dinja bl-istess mod li kont qed naraha jien. Meta nivvjaġġa dejjem inħoss li qed inrawwem l-empatija tiegħi u li nkun qed nifhem aħjar lill-kulturi l-oħra.

    Kif sibt il-missjoni ta' ħajti bħala Host

    Xtaqt insir Host biex nitgħallem iktar dwar id-dinja u noffri lill-klijenti mumenti u rabtiet speċjali, l-istess kif għamlu miegħi dawk il-Hosts li laqgħu lili.

    Inħobb il-belt ta' Osaka u ili nilqa' n-nies għal ħames snin. L-ispazju tiegħi mgħammar bi stil Ġappuniż skont il-filosofija Żen.

    Għalkemm naħdem fin-negozju tal-familja, is-sejħa tiegħi hija fil-qasam tal-ospitalità—għax tinħass iktar bħala passatemp milli ħidma.

    Nemmen li meta tilqa' lil xi ħadd m'għandekx biss toffrilu post fejn joqgħod, imma għandek ukoll tibni rabta ma' dil-persuna u taqsam il-kultura tiegħek magħha.

    Pariri fuq kif tilqa' n-nies minn kulturi differenti

    Dawn huma ftit pariri mill-esperjenza tiegħi wara li dort id-dinja u lqajt mijiet ta' klijenti:

    Aqleb id-deskrizzjoni tal-listing tiegħek f'lingwi oħra
    Il-fatt li jkollok id-deskrizzjoni tal-listing tiegħek miktuba bil-lingwa tal-klijent jgħin biex il-klijent iħossu iktar milqugħ. Jien bdejt b'6 lingwi u maż-żmien bqajt inżid magħhom.

    Jekk tixtieq issib liema huma dawk il-lingwi mitkellma mill-klijenti taż-żona tiegħek, staqsi lill-Klabb tal-Hosts jew lill-għaqda tat-turiżmu tal-post fejn jinsab il-listing tiegħek. Imbagħad tista' tuża għodda għat-traduzzjonijiet bla ħlas fuq l-internet biex taqleb id-deskrizzjoni tal-listing tiegħek f'dawk il-lingwi.

    Ikkomunika qabel il-vjaġġ
    Nemmen li wieħed ma jistax ma jikkomunikax qabel jibda l-vjaġġ għax inkella jkun qed jitlef ħafna opportunitajiet biex itejjeb kemm ir-rabta bejn il-Host u l-klijent kif ukoll l-opportunità li ż-żewġ naħat jifhmu x'qed tistenna l-parti l-oħra. Meta nikkomunika mal-klijenti qabel il-vjaġġ, nifhem għaliex ikunu ġejjin fil-post tiegħi, x'jixtiequ jagħmlu u kif nista' ngħinhom.

    Oħloq proċess taċ-checkin ħafif
    Xi vjaġġaturi jafu jkunu stressjati meta jżuru pajjiż ġdid. Jien inħobb naqsam informazzjoni utli dwar il-biljetti, il-ħinijiet u l-prezzijiet tal-ferroviji biex ngħin lill-klijenti jħossuhom iktar komdi.

    Fejn nista', dejjem nipprova niltaqa' magħhom wiċċ imb wiċċ u kultant anke mmur niltaqa' magħhom ġewwa l-istazzjoni tal-ferrovija li jinsab fil-qrib. Jekk ma nkunx nista' nilqagħhom jien, nitlob lil xi ħadd tal-familja tiegħi biex jgħinhom. Il-klijenti qaluli li l-laqgħa wiċċ imb wiċċ kienet xi ħaġa li tfisser ħafna għalihom.

    Offri ospitalità mill-qalb
    Nemmen li parti mill-fatt li tkun Host dħuli hija li tkun xi ħadd li l-klijenti jistgħu jafdaw. Dan ma jfissirx biss li toffri ambjent sigur ġewwa d-dar imma li toffrilhom ukoll serħan il-moħħ barra d-dar.

    Wara li nitħaddet mal-klijenti dwar il-vjaġġ tagħhom, ta' sikwit nagħtihom xi suġġerimenti dwar l-affarijiet li jistgħu jagħmlu li jkunu jgħoddu għall-vjaġġ tagħhom, flimkien mad-direzzjonijiet ta' kif jistgħu jaslu għalihom. Nipprova wkoll nagħtihom informazzjoni utli dwar bliet oħra, mhux biss Osaka u nagħtihom id-direzzjonijiet ta' kif jistgħu jaslu għall-akkomodazzjoni li jmiss tagħhom.

    Aqsam il-kultura teigħek
    Jien noffri lill-klijenti tiegħi l-opportunità li jidħlu bis-sħiħ fil-kultura Ġappuniża. L-iskop tiegħi huwa li jkollhom żjara mill-aqwa li twassalhom biex jaraw l-affarijiet minn perspettiva ġdida—u fl-istess waqt jibnu rabta fonda mal-Ġappun u n-nies li jgħixu hawn. Għalhekk ngħin lill-klijenti jifhmu lill-komunità, id-differenzi kulturali u l-etikett lokali biex ikunu jistgħu jikkomunikaw mar-residenti u man-negozji tal-post.

    Sir af iktar dwar il-ħidma li kien qed jagħmel il-Bord Konsultattiv tal-Hosts u ħejji ruħek għall-aġġornamenti u l-pariri ta' kull xahar mingħand il-membri tal-bord.

    L-informazzjoni li tinsab f'dal-artiklu jaf laħqet inbidlet minn meta ġie ppubblikat.

    Punti ewlenin

    • Qed niċċelebraw il-fatt li l-Hosts jilqgħu lil klijenti minn madwar id-dinja kollha

    • Shinya Nishide, mill-Bord Konsultattiv tal-Hosts, jaqsam xi pariri fuq kif toħloq żjarat pjaċevoli għal klijenti ta' kulturi differenti

    • Irċievi l-aħħar aħbarijiet dwar il-ħidma tal-Bord Konsultattiv tal-Hosts fl-2021
    Airbnb
    19 ta’ Lul 2021
    Dan kien ta' għajnuna għalik?