Offri checkin eħfef grazzi għat-tab Vjaġġi b'disinn ġdid

Wieħed mill-iktar mumenti importanti tal-vjaġġ huwa l-wasla, meta l-klijenti jidħlu għall-ewwel darba fl-ispazju tiegħek. Dan jista' jkun mument eċitanti imma jekk ma jkollhomx ċerta informazzjoni, dawn jista' jkollhom proċess ta' checkin li jħalli togħma qarsa fuq il-bqija taż-żjara—u dil-ħaġa tista' taffettwa r-review li tikseb.

Hawn fejn tintuża t-tab Vjaġġi: Hija l-post fejn il-klijenti jistgħu jsibu l-informazzjoni kollha li jeħtieġu qabel jagħmlu ċ-checkin fl-ispazju tiegħek. 48 siegħa qabel il-wasla tagħhom il-klijenti se jsibu gwida għaċ-checkin utli fit-tab Vjaġġi li se jkun fiha bl-iktar mod ċar l-iktar dettalji importanti bħal pereżempju l-kodiċi għall-bieb u l-password tal-wifi.

Qed inġeddu t-tab Vjaġġi mhux biss biex nuru dad-dettalji aħjar lill-klijenti imma biex nagħmlu l-almu tagħna ħalli l-esperjenza taċ-checkin tmur tajjeb kemm għall-klijenti kif ukoll għall-Hosts. Biex infakkru lill-klijenti jħejju ruħhom għall-vjaġġ, fid-dettalji tal-booking żidnielhom ukoll countdown biex jurihom kemm fadal jiem għall-wasla tagħhom.

It-tab Vjaġġi tagħmilha eħfef biex il-klijenti jsibu dad-dettalji minn post wieħed—b'hekk ngħinuk tiżgura li jibdew iż-żjara tagħhom bl-aqwa mod possibbli. Kompli aqra għal ftit pariri fuq kif tgħin lill-klijenti tiegħek isibu l-iktar informazzjoni importanti.

L-ewwel neħtieġu ftit informazzjoni mingħandek. Imlejt kull taqsima f'Informazzjoni għall-klijenti li tinsab fit-tab Listings tiegħek? Biex tiċċekkja, żur it-tab Listings, agħżel listing li tixtieq taġġorna u ara li għandek kull taqsima f'Informazzjoni għall-klijenti mimlija. Hemm 3 oqsma ewlenin li għandhom jimtlew biex il-klijenti jkollhom l-informazzjoni kollha dwar il-vjaġġ tagħhom

• Id-direzzjonijiet għall-ispazju tiegħek
• L-istruzzjonijiet għaċ-checkin
• L-informazzjoni tal-wifi
  

Biex tgħin tiżgura li kollox imur sew, xorta tista' tibgħat messaġġ lill-klijenti bi struzzjonijiet dettaljati jew bl-informazzjoni dwar l-ispazju qabel il-wasla tagħhom. Tista' tilqa' lill-klijenti wkoll b'mod virtwali jew wiċċ imb wiċċ biex tgħinhom iħossuhom milqugħa.

Meta timla t-taqsimijiet kollha f'Informazzjoni għall-klijenti, jaf tkun qed tgħin lill-klijenti tiegħek isibu l-ispazju tiegħek mingħajr problemi. Dawn jinkludu l-indirizz tiegħek kif ukoll xi struzzjonijiet oħra li jistgħu jkunu jeħtieġu l-klijenti.

Ħafna drabi l-apps tal-mapep jistgħu jwasslu l-klijenti tiegħek qrib il-post permezz tal-indirizz biss. Għalhekk normalment m'għandekx għalfejn tispjega d-direzzjonijiet pass pass għax dil-ħaġa tista' tħawwad lill-klijenti.

Biss tista' żżid xi dettalji oħra li jafu ma jkunux disponibbli fl-apps tal-mapep standard biex b'hekk tgħin lill-klijenti jaslu sal-ispazju tiegħek. Pereżempju jekk il-bini ta' fejn jinsab l-appartament tiegħek għandu xi daħla sekondarja jew jekk għandek kaxxa tal-posta b'kulur aħmar jgħajjat barra d-dar tiegħek, ma tagħmilx ħażin li tagħti dik l-informazzjoni.

Wara li l-klijenti jsibu l-propjetà tiegħek, għandhom ikunu jafu kif jiftħu l-bieb biex jidħlu fil-post. Fit-taqsima informazzjoni għall-klijenti tista' taqsam affarijiet bħal:

• Il-metodu taċ-checkin tiegħek (pereżempju jekk hux smart lock, lockbox jew merħba wiċċ imb wiċċ mingħandek)
• Istruzzjonijiet taċ-checkin ċari. Jekk tuża l-app ta' Airbnb fuq iOS jew Android, tista' wkoll iżżid istruzzjonijiet għaċ-checkin pass pass bir-ritratti

Wara li tgħarraf lill-klijenti jekk għandhomx jistennew merħba wiċċ imb wiċċ jew jekk hux se jagħmlu self checkin, nissuġġerulek tispjegalhom l-affarijiet aħjar fl-istruzzjonijiet taċ-checkin. Jekk tuża kodiċi ta' lockbox wieħed għal kulħadd, tista' tiktbu hawn (il-kodiċi se jinqasam mal-klijent tiegħek 48 siegħa qabel il-wasla). Jekk toħloq kodiċi personalizzat għal kull klijent, hawn tista' tikteb li se tibgħat il-kodiċi f'messaġġ ieħor.

Biex tikkomunika aħjar u b'mod eħfef, nissuġġerulek tuża l-għodod tal-messaġġi awtomatiċi u tat-tweġibiet ta' malajr tagħna li jgħinuk twieġeb lill-klijenti malajr u li jistgħu jibagħtulhom tfakkiriet matul l-iktar mumenti importanti tal-vjaġġ.

Illum il-ġurnata, il-wifi huwa importanti daqs l-elettriku għalhekk importanti tiżgura li l-klijenti jistgħu jaqbdu mal-wifi malajr. Faċli ħafna żżid dil-informazzjoni taħt Dettalji tal-WiFi—tinsab fit-taqsima Informazzjoni għall-klijenti tat-tab Listings u tinkludi:

• Isem in-netwerk tal-wifi tiegħek
• Il-password tan-netwerk tal-wifi tiegħek
  

Filwaqt li mhux idea ħażina li tagħti d-dettalji tal-wifi fl-istruzzjonijiet dwar id-dar, jekk iżżidhom fit-taqsima Informazzjoni għall-klijenti wkoll, il-klijenti se jkunu jistgħu jsibuhom iktar malajr fuq il-mowbajls tagħhom—u tkun qed tagħmilhielhom eħfef li jaqbdu mal-internet.

Nixtiequ nirċievu l-ħsibijiet tiegħek u nisperaw li maż-żmien tgħidilna kif nistgħu ntejbu l-esperjenza taċ-checkin. Nistednuk iżżur iċ-Ċentru tal-Komunità biex tgħidilna x'taħseb.

Meta żżid dil-informazzjoni tkun qed tgħin biex kull klijent, kull darba, jikseb l-iktar dettalji importanti qabel il-vjaġġ tiegħu.