Kif tipprova tilħaq għanijiet biex ittejjeb kif sejjer il-listing tiegħek

Jannar mhux l-unika xahar meta tista' tagħmel riżoluzzjoni biex tkabbar in-negozju tiegħek. Importanti li tiċċekkja ta' spiss kif sejrin l-affarijiet—u taddatta l-istrateġija tiegħek skont ma jkun meħtieġ—biex tirnexxi matul is-sena kollha.

L-għodod u r-riżorsi tal-ospitalità tiegħek jagħmluhielek eħfef iżżomm kont ta' kif sejjer il-listing tiegħek, tifhem x'qed jaħdem għal Hosts oħra u toħloq l-għanijiet tiegħek biex tikseb ir-riżultati li tixtieq.

Diffiċli tkun taf x'qed jaħdem jekk ma żżommx kont tal-progress tiegħek. Biex tiġbor l-informazzjoni, uża d-dashboard tal-hosting tiegħek biex:

• Tifhem il-bookings u d-dħul tiegħek
• Taqra l-ħsibijiet u l-kummenti mir-reviews tal-klijenti
• Tifhem ix-xejriet tal-vjaġġi ġewwa l-post fejn jinsab il-listing

It-taqsima Perspettivi tad-dashboard tal-hosting tagħtik ftit dettalji bażiċi fosthom id-dħul ta' kull xahar, l-iljieli bbukkjati, ir-reviews li ksibt mingħand il-klijenti u r-rating ġenerali tiegħek. Hemm tista' ssib ukoll iċ-Ċentru tal-Opportunitajiet li jagħtik ix-xejriet tal-vjaġġi għall-post fejn jinsab il-listing tiegħek bħal pereżempju x'tipi ta' postijiet fejn toqgħod u x'kumditajiet qed ifittxu l-iktar il-klijenti.

Int u tifhem in-numri tiegħek, qis jekk l-istrateġija tal-prezzijiet u d-disponibbiltà tal-kalendarju tiegħek bħalissa humiex addattati għax-xejriet u għall-iktar żminijiet popolari għall-vjaġġi tal-post fejn jinsab il-listing tiegħek. Tista' tqis ukoll il-kummenti u l-ħsibijiet li ħallewlek il-klijenti tiegħek.

"Agħti kas ta' dak li jgħidulek il-klijenti," tissuġġerixxi Elaine, Superhost ġewwa l-Ġżejjer Baleari, Spanja. "Il-kummenti u l-ħsibijiet tagħhom juruk fejn tista' tirranġa. Jekk ittejjeb il-mod ta' kif tilqa' n-nies, tkun tista' titlob prezzijiet ogħla."

Biex tifhem id-dejta tiegħek aħjar u taċċessa d-dashboard tal-prestazzjoni tiegħek, nissuġġerixxu li tixgħel l-għodod professjonali tagħna. (Tista' treġġa' l-affarijiet lura meta trid mis-settings tal-konttiegħek.)

Dal-għodod professjonali jgħinuk tifhem kif mort matul l-aħħar sena—ir-rata tal-okkupanza, il-prezz medju ta' kull lejl, kemm-il darba l-klijenti fetħu l-listing tiegħek u iktar—għal-listings kollha tiegħek. Tista' tqabbel ukoll in-numri tiegħek ma' dawk ta' listings li jixbħu lil-listings tiegħek biex b'hekk ngħinuk tifhem liema mill-istrateġiji tal-ospitalità tiegħek qed jaħdmu l-aħjar.

Wara li tkun sibt kif tista' tipprova ttejjeb kif sejjer il-listing tiegħek, il-mistoqsija li jmiss jaf tkun kif tista' twettaq dawk il-bidliet. Biex ma tibdiex mix-xejn, tista' taqra l-esperjenzi ta' Hosts oħra li rnexxew.

Fiċ-Ċentru tar-Riżorsi tista' ssib il-pariri tas-Superhosts fuq suġġetti bħal kif toħloq pjan għan-negozju u kif iżżid il-kumditajiet mingħajr ma tonfoq ħafna flus. Jew inkella agħti titwila lejn il-gwida kompluta tagħna fuq kif ittejjeb il-mod ta' kif tilqa' n-nies.

Tista' wkoll titgħallem mingħand Hosts oħra billi tfittex għal artikli marbuta mal-ħtiġijiet tiegħek fiċ-Ċentru tal-Komunità. Pereżempju ejja ngħidu li qed tipprova ssib modi oħra kif tieħu ħsieb il-finanzi tiegħek. Ann, Superhost ġewwa l-Belt ta' New York taqsam il-mod kif taħdem hi f'artiklu fiċ-ċentru tal-komunità.

"L-għan ewlieni tiegħi huwa li bħala medja, kuljum indaħħal iktar flus milli nonfoq," tikteb Ann. "Inżomm spreadsheet bin-numri, jum b'jum. Dawn l-aħħar sentejn għamilt profitt u l-għan tiegħi huwa li nkompli sejra hekk."

Il-pass li jmiss huwa li tibdel dik l-informazzjoni kollha li ġbart fl-għanijiet tiegħek għas-sena li ġejja. Qis liema huma dawk l-affarijiet li ħaqqhom l-ikbar attenzjoni u x'tista' tagħmel biex tagħti bidu għall-ħidma tiegħek.

Dawn huma xi eżempji ta' wħud mill-iktar għanijiet komuni u ta' kif tilħaqhom:

1. Iktar bookings u dħul ikbar
Probabbli mhux se jirnexxielek issib prezz tajjeb minnufih. Biex tilħaq l-għanijiet finanzjarji tiegħek filwaqt li żżomm prezz kompetittiv għall-klijenti, nissuġġerulek iżżid tariffa għall-pets jew toffri skont għal żjarat itwal.

Il-fatt li żżomm il-listing tiegħek aġġornat jista' jkun importanti ħafna biex tirnexxi bħala Host. Int u tippjana d-disponibbiltà tal-kalendarju tiegħek, żomm f'moħħok ix-xejriet tal-vjaġġi matul l-istaġuni differenti ta' matul is-sena ġewwa l-post fejn jinsab il-listing.

Sakemm tifhem l-aħjar strateġija għalik, Andrew, Superhost ġewwa Berlin jissuġġerixxi li tistenna u tara li l-klijenti tiegħek ikunu sodisfatti: "Xi listings ta' Airbnb jiġu bbukkjati tul is-sena kollha imma biex jiġri hekk, trid mill-inqas sena sakemm tifhem ix-xejriet għal-listing tiegħek u tikseb biżżejjed reviews biex tibni reputazzjoni tajba".

2. Ikseb reviews aħjar mingħand il-klijenti
Tejjeb id-deskrizzjoni tal-listing tiegħek biex il-klijenti jkunu jafu eżatt x'għandhom jistennew li jsibu u semmi l-iktar kumditajiet li jfittxu, bħal pereżempju wifi b'veloċità tajba ħafna u kċina mgħammra b'kollox. Ara li ttella' ritratti ta' kwalità tajba li juru l-ispazju tiegħek bl-aħjar mod possibbli.

"Ir-ritratti ewlenin huma l-iktar ritratti li kapaċi jħajru lill-klijenti jibbukkjaw listing," jgħid Andrew. "Importanti li r-ritratti jkunu ċari, b'kuluri sbieħ u mqasqsa b'mod li fiċ-ċokon tagħhom jibqgħu jiffukaw fuq is-suġġett tar-ritratt."

Għall-klijenti, l-indafa hija importanti ħafna wkoll: Jekk l-ispazju jkun nadif tazza, dan jaf jikseb reviews tajba. Serraħ moħħ il-klijenti billi tispjegalhom il-proċess li tuża biex tnaddaf u tissanitizza l-ispazju tiegħek.

3. Agħmilha eħfef li tilqa' n-nies
Sib modi iktar effiċjenti ta' kif tieħu ħsieb l-iktar biċċiet tax-xogħol li tagħmel ta' sikwit biex ikunlek eħfef li tilqa' n-nies u tilħaq l-għanijiet tiegħek. Ipprova uża t-tweġibiet ta' malajr u l-messaġġi skedati biex tikkomunika mal-klijenti tiegħek b'mod awtomatiku.

Biex tiffranka iktar ħin tista' tuża proċess taċ-checkin eħfef, ittejjeb ir-rutina tat-tindif u tikteb regoli tad-dar li jinfthiemu. "Ir-regoli tad-dar għandhom jinkitbu b'mod sempliċi u li jinftiehmu," jgħid J Renato, Superhost ġewwa Rio de Janeiro. "Inkella ħadd mhu se jaqrahom."

Huma x'inhuma l-għanijiet tal-ospitalità tiegħek, aħna qegħdin hawn biex ngħinuk tilħaqhom—u ngħinuk ikollok l-aħjar sena li qatt kellek.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.