L-aqwa kumditajiet li tista' toffri bħalissa

Skont id-dejta l-ġdida li għandha Airbnb,* il-klijenti ta' spiss jiffiltraw ir-riżultati tat-tiftix tagħhom biex isibu dal-iktar 10 kumditajiet popolari. Jekk għandek dal-kumditajiet popolari, ara li ssemmihom fil-listing tiegħek biex il-klijenti jkunu jistgħu jsibu l-listing tiegħek huma u jfittxu.

Dar 'il bogħod mid-dar
Ir-riżultati tat-tiftix tal-klijenti minn madwar id-dinja kollha juru li dawn huma l-iktar 10 kumditajiet imfittxija bħalissa:

1. Pixxina
2. Wifi
3. Kċina
4. Parkeġġ bla ħlas
5. Jacuzzi
6. Magna tal-ħasil jew dryer
7. Arja kkundizzjonata jew tisħin
8. Self checkin
9. Spazju għal ħidma fuq laptop
10. Post li jaċċetta l-pets

Dan huwa dak li tista' tagħmel biex tiżgura li dal-kumditajiet li ġejjin huma lesti kemm jista' jkun biex il-klijenti jużawhom:

• Wifi: Iċċekkja sew li qed jaħdem u li l-klijenti jafu kif jistgħu jaqbdu. Nissuġġerulek biex fl-ispazju tiegħek tqiegħed messaġġ laminat (biex ikun faċli tnaddfu) bl-istruzzjonijiet ħalli tgħin lill-klijenti.
• Arja kkundizzjonata: Nafu li l-arja kkundizzjonata mhux xi ħaġa li tista' tistenna li ssibha f'kull reġjun. Jekk toffri dil-kumdità, spjega lill-klijenti kif u minn fejn jistgħu jikkontrollawha (f'dal-każ tista' wkoll tuża messaġġ laminat). Jekk le, nissuġġerulek toffri unità żgħira li tista' ġġorrha miegħek għax-xhur is-sħan tas-sajf.
• Kċina: Il-klijenti jafu jkunu jixtiequ jsajru matul iż-żjara tagħhom għalhekk ara li għandek platti, borom, twaġen u oġġetti għat-tisjir. Ma tagħmilx ħażin li ssemmi dal-affarijiet fid-deskrizzjoni tal-listing tiegħek.
• Parkeġġ: Jekk għandek post għall-parkeġġ għall-klijenti, tinsiex tagħti l-istruzzjonijiet dwaru lill-klijenti qabel jaslu u tinsiex anqas tagħżel il-parkeġġ bħala kumdità għal-listing tiegħek.

Spazji fuq barra
Ħafna klijenti jagħżlu li joqogħdu f'postijiet fejn hemm affarijiet x'tagħmel fuq barra. Jekk fiż-żona tiegħek hemm mogħdijiet tajbin għall-mixjiet fit-tul jew xi attivitajiet fuq barra oħra, avża lill-klijenti dwarhom fil-gwida tal-ivvjaġġar jew fl-informazzjoni dwar id-dar tiegħek.

Mod ieħor kif tista' tħajjarhom jużaw l-ispazju fuq barra huwa billi żżejjen ftit iż-żoni fuq barra tal-ispazju tiegħek. Ara li l-ġnien ikun miżmum sew u nissuġġerulek iżżid (jew taġġorna) dal-kumditajiet li ġejjin:

• Għamara tat-terrazzin
• BBQ
• Kikkri u platti maħsuba għal barra
• Logħob u forom ta' divertiment oħra

Prodotti għat-tindif
Ħafna klijenti jkunu jixtiequ jżommu l-post nadif. Ma tagħmilx ħażin li tixtri biżżejjed:

• Xugamani tal-karti li jintremew wara li jintużaw
• Ingwanti li jintremew wara li jintużaw
• Prodott għat-tindif ta' ħafna tipi ta' wċuħ
• Sprej jew wipes li jiddiżinfettaw
• Sanitizer antibatteriku għall-idejn
• Sapun għall-idejn

Familji bit-tfal
Tista' tgħin lill-ġenituri bi tfal żgħar iħossuhom iktar komdi fl-ispazju tiegħek billi tara li l-listing tiegħek ikollu wħud mill-affarijiet li l-iktar jiġu bżonn, fosthom:

• Benniniet
• Siġġijiet għoljin
• Gradi tat-trabi
• Kikkri, platti u pożati għat-tfal
• Mejda fejn tbiddel lit-trabi
• Monitors tat-trabi
• Għata għas-sockets tad-dawl

Għandek tara li jkollok ukoll biżżejjed prodotti bażiċi bħal pereżempju:

• Sapun
• Shampoo
• Toilet paper
• Bjankerija tas-sodda u xugamani żejda

Sir af iktar dwar kif tilqa' l-familji

Klijenti bil-pets
Ħafna klijenti jixtiequ jieħdu lill-pets magħhom meta jivvjaġġaw. Nifhmu li mhux kull Host jista' joffri spazju addattat għall-pets. Imma jekk tista', issa ż-żmien li tibda taċċetta l-pets.

Il-klijenti li qed jivvjaġġaw mal-pets jistgħu jixtiequ jkunu jafu x'jistgħu jistennew li jsibu fl-ispazju tiegħek—bħal jekk għandekx bitħa magħluqa jew terrazzin privat. Tista' wkoll toffri kumditajiet maħsuba għal pets bħal:

• Skutelli għall-ikel u l-ilma
• Għata għall-għamara
• Xugamani apposta biex timsaħ saqajn il-pets qabel jidħlu fil-post
• Iktar prodotti għat-tindif

Nissuġġerulek ukoll taġġorna r-regoli tad-dar tiegħek. Tista' tispjega lill-klijenti kemm taċċetta pets waqt żjara, x'tip ta' pets taċċetta u jekk jistgħux iħallu lill-pets waħidhom fl-ispazju tiegħek.

Sir af iktar dwar kif tilqa' l-pets

Persuni li jaħdmu mid-dar
Ħafna nies baqgħu jaħdmu mid-dar u jafu jagħżlu li jaħdmu meta jkunu qed jivvjaġġaw. Tista' tgħinhom jaħdmu bl-aħjar mod billi toffri dal-kumditajiet li ġejjin:

• Wifi tajjeb ħafna: Illum li ħafna iktar minnhom qed jaħdmu mid-dar, ħafna iktar klijenti qed jistennew li jsibu internet tajjeb ħafna. Tista' tiċċekkja l-veloċità tal-wifi tiegħek permezz tal-app ta' Airbnb—u nissuġġerulek taġġorna għal servizz aħjar jekk ir-riżultat jurik li għandek internet batut.
• Spazju għal ħidma fuq laptop: Ara jekk għandekx skrivanija jew mejda b'siġġu komdu (aħjar jekk ikun ergonomiku) qrib socket tad-dawl. Tixtieq toffri xi ħaġa iktar? Żid stapler, ftit sticky notes u tazza bi ftit biros ġodda. Jekk għandek printer jew photocopier, tinsiex issemmihom fid-deskrizzjoni tal-listing tiegħek.
• Magna tal-kafè u kitla għat-te: Dal-klijenti probabbli japprezzaw xi ftit għajnuna biex tgħinhom matul il-jum tax-xogħol tagħhom.
Sir af kif iżżid kumditajiet ġodda

Tinsiex issemmi l-bidliet li tkun għamilt billi taġġorna l-kumditajiet, id-deskrizzjoni tal-listing u r-ritratti tal-listing tiegħek. Meta żżid ftit affarijiet li l-klijenti qed ifittxu, jaf tagħmel differenza kbira biex tgħin lill-klijenti jħossuhom iktar komdi fl-ispazju tiegħek—u għalhekk tista' tikseb review mill-aqwa.

*Skont id-dejta interna ta' Airbnb li kejlet kemm ġew imfittxija ta' spiss il-kumditajiet madwar id-dinja kollha mill-1 ta' Jannar sal-31 ta' Diċembru 2021.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.