Kif tiżbarazza l-ispazju tiegħek biex tikkuntenta lill-klijenti

Il-klijenti jixtiequ jsibu spazju nadif mingħajr imbarazz. Kemm jekk tilqa' l-klijenti f'kamra privata kif ukoll jekk tħallilhom il-post kollu għalihom, dawn huma xi pariri mingħand il-Hosts fuq kif tiżbarazza l-ispazju tiegħek.

"Għalija, inqas ma jkun hemm geġwiġija ta' oġġetti fid-dar, il-post jidher iktar nadif u pulit," tgħid Kath, Host ġewwa Albany, l-Awstralja. L-indafa importanti ħafna għall-klijenti. Skont l-informazzjoni li għandha Airbnb, waħda mill-iktar raġunijiet li twassal għal reviews ħżiena hija n-nuqqas ta' ndafa fil-post.

"Importanti li tneħħi l-imbarazz kollu u kemm jista' jkun tħallix oġġetti fuq uċuħ mimduda," jgħidu Jay u Lynne, Superhosts ġewwa Blanco Texas. "Dil-ħaġa tagħmilhielek eħfef li tnaddaf, tagħti iktar spazju lill-klijenti fejn iqiegħdu ħwejjiġhom u tgħin lill-klijenti biex ma jinsew xejn warajhom għax malajr isibu dak li jkunu nsew meta jagħtu l-aħħar daqqa t'għajn lill-post qabel jitilqu."

Il-klijenti jeħtieġu post fejn iħallu l-ilbies, il-prodotti għall-indafa personali u ħwejjeġ personali oħra tagħhom. Nissuġġerulek tħalli xi kxaxen u gwardarobbi vojta billi teħles minn dak li m'għadekx teħtieġ. "Jekk xi ħaġa nkun ili ma nużaha jew nilbisha xi sena jew tnejn, neħles minnha," tgħid Sarah, Host ġewwa Sayulita, il-Messiku.

Nissuġġerulek tħalli iktar spazju kif tagħmel Jessica, Host ġewwa Seoul, il-Korea t'Isfel—l-iktar jekk il-klijenti li tilqa' jibbukkjaw żjarat fit-tul. "Nista' nobsor li se jkollhom il-kotba, il-tifkiriet, ir-ritratti tal-familja u l-"imbarazz" tagħhom li jkunu jixtiequ jqiegħdu fuq il-komodina, fuq l-iskrivanija jew fuq l-ixkafef," tgħidilna.

Qis fejn jista' jkun l-aħjar post biex tħalli l-kumditajiet biex il-klijenti jkunu jistgħu jsibuhom malajr. Chantal, Host ġewwa Yvignac-la-Tour, Franza għandha cupboard għall-klijenti: "Inħallilhom kollox hemm—minn fliexken tal-ilma sa toilet paper, kollox organizzat fi qfief fuq xkakfef differenti, skont it-tip ta' oġġett."

Wara li tkun organizzajt kollox, tinsiex tiċċekkja x'lożor u prodotti oħra għandek u agħti jew armi kull ħaġa li ma tkunx għadha fi stat tajjeb.

"Ma tantx nieħu gost nidħol fi kċina ta' listing u nsib kċina llapazzata b'oġġetti li qishom inġabru bl-addoċċ jew li ħallewhom f'dik il-kċina minflok ħelsu minnhom mod ieħor," tgħid Alexandra, Host ġewwa Lincoln, California.

Lill-klijenti ħallilhom dak li żgur se jkunu jeħtieġu fil-kċina u l-kamra tal-banju u neħħi l-bqija. Filwaqt li l-biċċa l-kbira tagħhom se jieħdu gost jekk tħallilhom trabuxù jew conditioner, m'għandhomx għalfejn isibu tliet tipi ta' trabuxù jew conditioners.

Għalkemm taf taħseb li tkun qed tnaqqas il-ħela jekk iżżomm il-prodotti li jkunu ħallew il-klijenti ta' qabel għal klijenti oħra, mhux il-klijenti kollha jieħdu gost b'xi ħaġa hekk. Michelle, Host ġewwa Chicago, lill-klijenti tħallilhom ikel u xorb "magħluq eżatt kif ikun inxtara"—pereżempju ilma u luminata fil-fliexken u prodotti oħra ppakkjati porzjon porzjon.

"Kull ħaġa fil-kamra għandha tkun ta' siwi," tgħid Kelly, Host ġewwa Austin, Texas. "Ma jfissirx li l-kamra m'għandhiex tkun imżejna jew m'għandhiex tkun mgħammra biex tilqgħek."

Għalkemm il-bilanċ li għandek tilħaq bejn siwi u disinn jiddependi mill-post, dawn huma xi pariri bażiċi li tista' żżomm f'moħħok:

• Tħallix ħafna ħwejjeġ personali. Tħallix oġġetti bħal ritratti tal-familja, tpinġijiet magħmula mit-tfal u żraben u lbies ieħor fiż-żoni li se jużaw il-klijenti.
• Tiddejjaqx tagħti ftit kulur. L-ispazju tiegħek jaf jispikka jekk iżżidlu xi biċċa arti maħduma minn artist tal-post, xi biċċa għamara mhux tas-soltu jew mera unika.
• Żejjen ftit. Oġġetti bħal xtieli u cushions jistgħu joħolqu atmosfera sabiħa fil-post tiegħek—l-importanti li ma tesaġerax u li jitqiegħdu bi ħsieb.