Pariri fuq kif tevita l-parties fil-propjetà tiegħek

Waħda mill-prijoritajiet ta' Airbnb hija li tgħin tħares lill-Hosts u lill-klijenti. Biex nevitaw imġiba li ddejjaq lin-nies fil-propjetajiet ippubblikati fuq Airbnb, aħna ma naċċettawx li jsiru parties jew avvenimenti li jagħtu fastidju, fosthom laqgħat miftuħa għal kulħadd.

Il-projbizzjoni fuq il-parties u l-avvenimenti li daħħalna fis-seħħ għall-bookings kollha madwar id-dinja wasslet biex, minn Awwissu tal-2020 'l hawn, kull sena r-rapporti dwar parties naqsu b'bejn wieħed u ieħor 44%. Intlaqgħet tajjeb ukoll mill-Hosts, mill-mexxejja tal-komunità u mill-uffiċjali pubbliċi.

Nixtiequ li tkun tista' tilqa' n-nies fl-ispazju tiegħek b'moħħok mistrieħ—kemm jekk ilek tilqa' n-nies kif ukoll jekk għadek tibda. Dawn huma sitt affarijiet li tista' tagħmel biex tevita li l-klijenti jorganizzaw il-parties u biex tnaqqas xi wħud mir-riskji marbutin magħhom.

Biex tgħinna nevitaw il-problemi qabel jibdew, inħeġġuk taqra l-politika għall-parties u l-avvenimenti tagħna. Xi punti ewlenin:

• La jistgħu jsiru parties u avvenimenti li jagħtu fastidju u lanqas laqgħat miftuħa għal kulħadd.
• F'ċerti pajjiżi u reġjuni daħħalna fis-seħħ xi restrizzjonijiet marbuta ma' bookings li jsiru minn klijenti taħt l-età ta' 25 sena, li joqogħdu fl-istess belt fejn ikunu qed jibbukkjaw listing ta' dar sħiħa u li għandhom reviews ħżiena jew inqas minn 3 reviews pożittivi.
• Fix-xhur li ġejjin se nkunu qed inneħħu l-limitu ta' 16-il persuna fil-listing, limitu li ħloqna fl-2020 minħabba raġunijiet ta' saħħa pubblika marbuta mal-COVID-19.
• Il-Hosts li jilqgħu n-nies fi stabbilimenti tal-ospitalità tradizzjonali (bħal pereżempju boutique hotels) jistgħu, jekk jixtiequ, jaċċettaw ċerti tipi avvenimenti.
• Il-Hosts ma jistgħux jaċċettaw li jsiru laqgħat li jmorru kontra l-politika.

Airbnb tista' tieħu azzjoni kontra l-klijenti u l-Hosts li jiksru l-politiki tagħna.

Kun ċar/a mal-klijenti tiegħek għax dan wieħed mill-modi kif iżżomm lilek innifsek, il-propjetà tiegħek u l-komunità tiegħek siguri. Wara li tirċievi talba għal booking jew booking ikkonfermat, iċċekkja l-informazzjoni dwar il-klijent u staqsi ftit mistoqsijiet bażiċi dwar iż-żjara tiegħu bħal pereżempju:

• X'inhu l-għan tal-vjaġġ tiegħek?
• Min se jkun qed jivvjaġġa miegħek?
• Tista' tikkonferma li qrajt ir-regoli tad-dar?

Hawn se jkollok ukoll l-opportunità li tfakkar lill-klijenti dawk l-affarijiet li tridhom iżommu f'moħħhom jew li ma tridhomx jinsew (bħal pereżempju l-ħin li matulu ma jistax isir storbju). Tista' wkoll tgħarraf lill-klijenti b'dak li jgħidu l-liġijiet jew ir-restrizzjonijiet tal-post marbuta mal-istorbju, mal-parkeġġ u mas-saħħa pubblika.

Għarraf lill-ġirien tiegħek li tilqa' n-nies. Nissuġġerulek tagħti d-dettalji tiegħek lil xi ġirien li tafda u titlobhom jikkuntattjawk jekk tinqala' xi problema mhux mistennija.

Jekk ikunu mħassba dwar il-fatt li tilqa' n-nies, tista' sserrħilhom moħħhom li l-biċċa l-kbira assoluta tal-klijenti ma jaqilgħux problemi. Fil-fatt, 99.92% tal-bookings fl-2021 ma wasslu għall-ebda rapport ta' problema marbuta mas-sigurtà.*

Anki jekk toffri self checkin, xorta tista' turi lill-klijenti tiegħek li int hemm għalihom. Dan huwa dak li tista' tagħmel qabel, waqt u wara ċ-checkin:

• Avża lill-klijenti kif jistgħu jċemplulek f'każ ta' emerġenza. B'hekk tkun tista' tieħu ħsieb l-affarijiet aħjar f'każ ta' xi aċċident—u l-klijenti żgur se japprezzaw li ma tħallihomx jistennew.
• Offri li tmur fuq il-post—jew li tibgħat lil xi ħadd—jekk il-klijenti jiġu bżonn xi ħaġa. Jekk ma tgħixx fil-qrib, tagħmel tajjeb li tqabbad maniġer tal-propjetà jew Co-Host biex, f'każ li jinqala' xi ħaġa, ikun hemm xi ħadd jieħu ħsieb l-affarijiet fuq il-post.

Jekk temmen li klijent beħsiebu jorganizza party, tista' tikkanċella l-booking tiegħu qabel iċ-checkin mingħajr ebda konsegwenza. Se nitolbuk tagħtina prova biex tiġġustifika d-deċiżjoni tiegħek—pereżempju kopja tal-messaġġi mal-klijent u provi oħra.

Ejja ngħidu li pereżempju klijent li joqgħod qrib il-post tiegħek, jibbukkja żjara ta' lejl wieħed biss fl-aħħar minuta matul tmiem il-ġimgħa. Il-klijent jibgħatlek messaġġ u jistaqsik jekk fuq barra hemmx biżżejjed postijiet tal-parkeġġ għal sħabu—u taqra wkoll review mingħand Host ieħor dwar l-istess klijent fejn issemma party. Jekk taqsam il-messaġġ tal-klijent u kopja tar-review magħna, jaf tkun tista' tikkanċella l-booking mingħajr ebda konsegwenzi.

Jekk taċċetta l-Bookings Immedjati u għadek ma lħaqtx il-limitu ta' 3 kanċellazzjonijiet matul dik is-sena, jaf tkun tista' tikkanċella direttament onlajn. Jekk iċ-checkin tal-klijent mistenni f'inqas minn 24 siegħa, jeħtieġlek tikkuntattjana biex tikkanċella l-booking.

Biex isir taf iktar dwar is-sigurtà u dak li nistennew mingħandek meta tilqa' n-nies, aqra l-politiki tal-komunità tagħna.

*Skont id-dejta interna li Airbnb ġabret bejn l-1 ta' Jannar u l-31 ta' Diċembru tal-2021.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.