Mur 'il quddiem biex taċċessa r-riżultati suġġeriti
    Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

    Kif tikteb deskrizzjoni tal-post tiegħek li tolqot lil min jaqraha

    Għin lill-klijenti jimmaġinaw lilhom infushom fl-ispazju tiegħek billi tuża dettalji ċari u preċiżi.
    Minn Airbnb f'did-data: 18 ta’ Nov 2020
    7 minuti biex taqrah
    Aġġornat f'did-data: 11 ta’ Ott 2022

    Punti ewlenin

    • Iffoka fuq dak li jagħmel l-ispazju tiegħek uniku

    • Agħti deskrizzjoni onesta tal-post tiegħek biex il-klijenti jkunu jafu eżatt x'għandhom jistennew li jsibu

    • Aġġorna d-deskrizzjoni tal-listing tiegħek

    Is-Superhosts qalulna li l-propjetà m'għandhiex għalfejn tkun perfetta biex tkun tintagħżel mill-klijenti; l-importanti li tgħid lill-klijenti sewwa sew x'se jsibu meta jaslu.

    Deskrizzjoni tal-listing tajba hija waħda mill-aqwa modi li għandek biex tikseb il-bookings u tgħarraf lill-klijenti dwar dak li għandhom jistennew. Dan huwa kif għandek tħajjar lill-vjaġġaturi joqogħdu fl-ispazju tiegħek.

    Ikteb isem interessanti

    L-isem tal-listing huwa l-ewwel ħaġa li l-klijenti jaqraw u, flimkien mar-ritratt tal-qoxra tal-listing tiegħek, huwa dak li jwassal biex il-klijenti jkomplu jaqraw il-paġna tal-listing tiegħek. Użah biex issemmi l-iktar affarijiet interessanti tal-ispazju tiegħek.

    Dawn huma xi eżempji ta' ismijiet tajbin:

    • Kabina komda bi kċina ta' kok
    • Studio qrib LAX—klieb aċċettati
    • Villa ħdejn il-bajja bil-kayaks

    Tista' tuża 32 karattru, li jinkludu l-ispazji, biex tħeġġeġ lill-klijenti jsiru jafu iktar dwar il-post tiegħek. Għaliex daqshekk ftit? Ismijiet iqsar jidhru aħjar fuq l-ismartphones u t-tablets (li jintużaw għal 75% tat-tfittxijiet fuq Airbnb).

    Tużax emojis u simboli u uża l-ittri l-kbar għan-nomi propji (bħal "Ħaż-Żabbar") u għat-taqsiriet deskrittivi standard (bħal "MLA") biss.

    Aqra l-linji gwida tagħna fuq kif tikteb l-ismijiet tal-listings

    Iffoka fuq il-faċilitajiet speċjali

    Hemm miljuni ta' postijiet fejn toqgħod fuq Airbnb. Biex turi għaliex il-post tiegħek huwa dak speċjali fosthom, qatta' ftit ħin biex tipprova tifhem x'inhuma dawk il-faċilitajiet li jgħinuh jispikka—pereżempju l-post fejn jinsab jew il-kumditajiet li joffri.

    Skont il-każ tiegħek, tista' pereżempju tikteb:

    • "Il-post tagħna jinsab 10 minuti mixi bogħod minn tnejn mill-aqwa birreriji atriġjanali tal-belt."
    • "Tista' tasal għall-mogħdijiet għar-rota leġġendarji fil-muntanji taż-żona fi kwarta bir-rota jew f'ħames minuti bil-karozza."

    Għal iktar ideat nissuġġerulek taqra d-deskrizzjonijiet miktuba minn Hosts oħra u biex tagħti ħarsa lejn ir-reviews li kisbu. Dawn se jgħinuk tifhem x'tip ta' informazzjoni u kumditajiet in-nies jistennew li jsibu f'listing.

    Irrakkonta l-istorja tal-ispazju tiegħek

    Id-deskrizzjoni tal-listing tiegħek hija fejn tirriklama l-ispazju tiegħek u l-istejjer huma parti importanti minn marketing tajjeb. M'għandekx għalfejn tkun kittieb mill-aqwa biex tikteb deskrizzjoni li tolqot lil min jaqraha. L-importanti li tikteb deskrizzjoni ċara u mexxejja.

    Jekk ma tafx kif għandek tibda, immaġina li qed titħaddet ma' sieħbek biex tħajru joqgħod fil-post tiegħek. Wisq probabbli, hekk tispiċċa tikteb l-iktar dettalji importanti minnufih u l-istil li tuża jkun dak meħtieġ għal deskrizzjoni tajba.

    L-istorja li tirrakkonta tista' tkun marbuta mal-esperjenza li qed toffri lill-klijenti. Għandek appartament f'sular għoli b'siġra twila ħdejh? "Se tħossok qisek qed toqgħod fi treehouse!" Kamra sempliċi fiċ-ċentru tal-belt tista' ssir "il-bażi ideali biex tiskopri l-belt".

    Tereasa u David, Superhosts ġewwa Elkhorn, Wisconsin jgħidulna kif l-istorja tal-propjetà tagħhom laqtet lill-klijenti li qrawha. Huma jissuġġerixxu li int u tikteb ir-rakkont, issir taf aħjar il-komunità tal-madwar u tiskopri x'inhuma l-iktar affarijiet interessanti dwar id-dar u l-belt tiegħek.

    Ikteb fil-qosor

    Biex jifhmu l-faċilitajiet ewlenin ta' listing, il-klijenti li jkunu qed ifittxu post fejn joqogħdu ħafna drabi jagħtu ħarsa fuq fuq lejn id-deskrizzjoni mingħajr ma jaqraw kelma b'kelma. Ittawwalx iżżejjed id-deskrizzjonijiet tal-listing tiegħek—ikteb l-iktar informazzjoni importanti fil-bidu biex in-nies li jkunu qed jitħajru jagħżlu l-post tiegħek ma jkollhomx għalfejn jaħlu l-ħin ifittxuha.

    Għalhekk ipprova tirrepetix id-dettalji li tkun diġà tajt xi mkien ieħor. Tista' pereżempju tuża l-lista tal-kumditajiet biex timmarka l-faċilitajiet kollha li jinsabu fl-ispazju tiegħek bħall-wifi, il-parkeġġ u l-arja kkundizzjonata. B'hekk tevita li ttawwal id-deskrizzjoni tal-listing u tkun tista' sserraħ moħħok li l-listing tiegħek se jintwera meta l-klijenti jiffiltraw ir-riżultati tat-tiftix tagħhom b'dawk il-kumditajiet.

    Ikteb b'mod ġenwin u onest

    Tesaġerax int u tiddeskrivi l-post tiegħek għax il-klijenti jafu jisfaw diżappuntati u jħallulek reviews ħżiena. Ikteb deskrizzjonijiet realistiċi biex qabel jibbukkjaw, il-klijenti jkunu jistgħu jifhmu jekk l-ispazju tiegħek jgħoddx għalihom.

    "Ara li fid-deskrizzjoni tal-listing issemmi dawk l-affarijiet mhux tas-soltu li hemm fil-propjetà tiegħek," tgħid Nikki, Superhost ġewwa San Francisco. "Spjegahom b'mod li huwa onest u ċar, mingħajr ma tgerrex lill-klijenti. Għandek tkun ġenwin biżżejjed biex tgħin lill-klijenti tiegħek jagħżlu l-propjetà li jixtiequ."

    Importanti ħafna żżid il-faċilitajiet tal-aċċessibbiltà li toffri u li ssemmi dawk l-affarijiet tal-propjetà li jistgħu jkunu ta' xkiel għal xi klijenti fosthom dawk bi problemi tal-mobbiltà, tfal żgħar jew pets. Tista' tagħti dil-informazzjoni fl-oqsma "Dettalji oħra li għandek issemmi" u "L-Ispazju" tad-deskrizzjoni tal-listing tiegħek.

    Ħu kemm tista' mill-captions tar-ritratti

    Ir-ritratti tal-listing jagħmlu differenza kbira meta klijent ma jkunx ċert għandux jibbukkja l-ispazju tiegħek jew le u l-captions jagħtuk l-opportunità torbot ir-ritratti mal-epserjenza li se toffri lill-klijent. Jekk issibha diffiċli biex tikteb caption dwar ritratti, aħseb ftit dwar dawk id-dettalji li l-kamera ma tistax turi.

    Jekk qed turi kamra tas-sodda, għid lill-klijenti tiegħek kemm hi kbira s-sodda u semmi t-tip ta' saqqu, jekk is-sodda għandha saqqu. Għandek ritratt li juri rokna komda ħdejn tieqa? Tista' ssemmi li huwa l-post ideali biex taqbad taqra ktieb waqt inżul ix-xemx.

    Skopri iktar grazzi għall-gwida tagħna dwar kif toħloq listing li jirnexxi

    L-informazzjoni li tinsab f'dal-artiklu jaf laħqet inbidlet minn meta ġie ppubblikat.

    Punti ewlenin

    • Iffoka fuq dak li jagħmel l-ispazju tiegħek uniku

    • Agħti deskrizzjoni onesta tal-post tiegħek biex il-klijenti jkunu jafu eżatt x'għandhom jistennew li jsibu

    • Aġġorna d-deskrizzjoni tal-listing tiegħek
    Airbnb
    18 ta’ Nov 2020
    Dan kien ta' għajnuna għalik?