Mur 'il quddiem biex taċċessa r-riżultati suġġeriti
    Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

    Gwida fuq kif tieħu r-ritratti tal-faċilitajiet tal-aċċessibbiltà

    Ritratti mill-aqwa jgħinu lill-klijenti bi ħtiġijiet tal-aċċessibbiltà jifhmu x'jistgħu jistennew li jsibu.
    Minn Airbnb f'did-data: 22 ta’ Set 2020
    Qari ta' 5 minuti
    Aġġornat f'did-data: 14 ta’ Ġun 2022

    Punti ewlenin

    • Il-vjaġġaturi ta' spiss ifittxu għall-faċilitajiet tal-aċċessibbiltà bħal daħliet mingħajr għetiebi

    • Ritratti ta' kwalità għolja ta' dal-faċilitajiet jistgħu jgħinu lill-klijenti jiddeċiedu jekk l-ispazju tiegħek jgħoddx għalihom

      • Sir af iktar mill-gwida taċ-Ċentru tal-Għajnuna tagħna dwar kif iżżid il-faċilitajiet tal-aċċessibbiltà mal-listings

      Il-klijenti bi ħtiġijiet tal-aċċessibbiltà jridu jkunu jafu x'għandhom jistennew meta jaslu fl-ispazju tiegħek. Li ttella' ritratti ta' kwalità fit-taqsima tal-Aċċessibbiltà tal-listing tiegħek—minn ritratti tad-daħla sa ritratti ta' kif inhu mgħammar il-post tiegħek—hija xi ħaġa li tista' tgħin lill-klijenti jifhmu jekk jistgħux imorru minn post għal ieħor bil-kumdità madwar il-propjetà tiegħek.

      Bħala Host hija responsabbiltà tiegħek li tara li d-deskrizzjoni u r-ritratti tal-listing huma eżatti u aġġornati. U għalkemm mhix responsabbiltà tiegħek li tifhem il-bżonnijiet ta' kulħadd, il-fatt li tieħu ritratti tal-ispazju tiegħek b'mod ġenwin jgħin lill-klijenti li qed jaħsbu biex jibbukkjaw miegħek jifhmu jekk il-listing tiegħek jgħoddx għalihom.

      Airbnb tirrevedi l-faċilitajiet tal-aċċessibbiltà kollha qabel jiġu ppubblikati fuq il-listing tiegħek. Nistgħu nitolbuk ittella' ritratt ġdid jew inneħħu l-faċilità mil-listing tiegħek jekk ritratt ma jurix faċilità kif meħtieġ mil-linji gwida tagħna.

      Int u tqis kif taġġorna l-listing tiegħek, dawn huma xi affarijiet li għandek iżżomm f'moħħok:

      • Tista' ssemmi li huma biss numru ta' kmamar li joffru l-faċilitajiet tal-aċċessibbiltà. Pereżempju tista' ssemmi li kamra tal-banju waħda biss għandha daħla mingħajr turġien.
      • Ma teħtieġx ritratti professjonali—tista' tieħu r-ritratti b'mowbajl. Dar-ritratti se jintwerew fit-taqsima Aċċessibbiltà tal-paġna tal-listing tiegħek—li ma tagħmilx parti mill-gallerija tar-ritratti tal-listing tiegħek. Jeħtieġlek ittella' mill-inqas ritratt wieħed għal kull faċilità tal-aċċessibbiltà li tagħżel.
      • Uża rutella biex turi lill-klijenti li għandek bibien wisgħin biżżejjed għas-siġġijiet tar-roti jew tagħmir tal-mobbiltà ieħor (dil-ħaġa hija waħda mill-kriterji tagħna għar-ritratti).
      • Meta ttella' numru ta' ritratti tal-faċilità minn angoli u perspettivi differenti, tkun qed tgħin lill-klijenti jifhmu kif inhu mqassam l-ispazju tiegħek. Pereżempju, jekk qed turi daħla mingħajr turġien, ħu r-ritratti minn kull naħa tal-għatba biex il-klijent ikun jista' jara l-mogħdija kollha tal-ispazju tiegħek.

      Kif turi li l-mogħdija li tagħti għad-daħla hija waħda bla turġien

      Il-klijenti jistgħu jaslu mill-bankina jew mill-eqreb post tal-parkeġġ għall-bieb ta' barra tiegħek mingħajr ma jsibu għetiebi jew turġien? Minn fuq liema wċuħ jeħtiġilhom jgħaddu biex jaslu hemm? Ara li tieħu ritratti ċari tal-mogħdija li twassal minn barra għad-daħla tal-listing tiegħek.

      Kif tieħu r-ritratti tad-daħla għall-post tiegħek:
      1. Oqgħod fuq il-bankina jew fl-eqreb żona tal-parkeġġ, mill-inqas 6 metri (20 pied) 'l bogħod mid-daħla tal-bini, biex turi kemm jista' jkun mill-mogħdija u mejjel il-kamera ftit 'il quddiem lejn l-art biex turi l-wiċċ tal-mogħdija. Jekk il-listing tiegħek jinsab fi blokka appartamenti jew f'lukanda, ara li turi l-mogħdija mid-daħla tal-bini sal-lobby—u minn hemm sad-daħla tal-unità tiegħek. Jekk ikun il-każ, importanti wkoll li ttella' ritratti tal-lifts u tar-rampi li hemm.

          2. Ara li turi d-daħla tal-bini fi tmiem il-mogħdija.

          Kif issemmi d-daħliet mingħajr turġien għall-ispazju tiegħek

          Uri lill-klijenti li jistgħu jidħlu mill-bieb ta' barra, fil-kamra tas-sodda, fil-kamra tal-banju, fid-doċċa u fl-ispazji komuni mingħajr ma jsibu turġien, għetiebi, bankini jew ħġur tal-bibien għolja (ogħla minn 5 ċm jew 2 pulzieri).

          Kif tieħu r-ritratti tad-daħliet:
          1. Iftaħ il-bieb tad-daħla li tixtieq turi u mejjel il-kamera ftit 'il quddiem lejn l-art biex turi b'mod ċar il-mogħdija ċatta fuq kull naħa tal-bieb.

              2. Ara li tkun mill-inqas metru u nofs (5 piedi) bogħod mid-daħla biex turi l-bieb kollu. Jekk l-ispazju tiegħek għandu iktar minn daħla waħda, ara li turihom kollha kemm huma fir-ritratti.

              3. Jekk timmarka li tista' tasal għal xi kamra mingħajr ma ssib għetiebi (il-kamra tas-sodda, il-kamra tal-banju, is-salott, eċċ.), tkun qed tikkonferma wkoll li l-kamra tinsab fuq il-pjan terran jew li tista' tasal għaliha permezz ta' lift jew rampa. Tella' numru ta' ritratti li juru l-mogħdija li tagħti mill-bieb ta' barra sa dik il-kamra.

                4. Jekk għandek doċċa mingħajr għetiebi, iftaħ il-purtieri jew il-bibien tad-doċċa u mejjel il-kamera ftit lejn l-art tad-daħla biex turi li m'hemmx turġien jew għetiebi ogħla minn 2.5 ċentrimetri (madwar pulzier).

                Pariri: Għal iktar modi ta' kif tista' tieħu ritratti mill-aqwa permezz tal-mowbajl tiegħek, agħti ħarsa lejn it-taħriġ għar-ritratti tagħna.

                Kif tieħu r-ritratti tad-daħliet wiesa'

                Għall-klijenti b'tagħmir tal-mobbiltà bħalma huma s-siġġijiet tar-roti, li jkunu jafu kemm huma wisgħin il-bibien tiegħek jgħinhom jifhmu jekk hux se jkunu jistgħu jiċċaqalqu fl-ispazju tiegħek. Għal Airbnb, "daħla wiesgħa" hija meqjusa bħala daħla wiesgħa mill-inqas 81 ċentimetri (32 pulzier).

                Iftaħ il-bieb u uża rutella biex turi l-wisa' tal-bieb. Nissuġġerulek tieħu żewġ ritratti: wieħed li juri r-rutella kollha mill-bogħod u ieħor iktar qrib tar-rutella biex il-klijent ikun jista' jaqra l-kejl.

                  Kif turi l-faċilitajiet tal-aċċessibbiltà l-oħra

                  Hemm ħafna faċilitajiet oħra li jistgħu jgħinu lill-klijenti jidħlu u jduru mal-ispazju tiegħek b'mod komdu. Jekk toffri wħud minn dal-faċilitajiet, ara li tieħu ritratt ta' kull waħda minnhom u żżid dar-ritratti mal-listing tiegħek biex il-klijenti jkunu jafu x'għandhom jistennew.

                  1. Fir-ritratti tiegħek uri kemm tista' minn kull faċilità.

                  2. Ipprova daħħal fir-ritratt kemm jista' jkun miż-żona tal-madwar biex il-klijenti jkunu jistgħu jaraw fejn tinsab il-faċilità u kemm hi kbira. Pereżempju jekk qed turi siġġu tad-doċċa, ara li turi kif inhu mqiegħed fid-doċċa.

                    Eżempji ta' kull faċilità tal-aċċessibbiltà

                    Vireg biex iżżomm magħhom fid-doċċa u qrib it-toilet: Dawn huma vireg li jifilħu l-piż ta' persuna, imwaħħlin sew mal-ħajt biex in-nies ikunu jistgħu jibbilanċjaw bl-għajnuna tagħhom. Ma jistgħux ikunu xkafef tax-xugamani, l-apparat li jsaħħan ix-xugamani jew parti mill-bieb tad-doċċa.

                    Siġġu tad-doċċa/tal-banju: Normalment dan ikun oġġett fejn tpoġġi bilqiegħda li mhu mwaħħal ma' mkien jew bank maħsub biex jgħin lin-nies b'mobbiltà limitata jinħaslu. Dil-ħaġa tista' tkun ukoll bank mibni fil-ħajt imma ma tistax tkun għamara li mhux maħsuba għall-banju/għad-doċċa (bħal għamara ta' barra jew siġġijiet tal-plastik li jingħalqu u li jistgħu jiżolqu meta jintużaw fuq uċuħ imxarrba).

                    Irfigħ mas-saqaf jew li jiċċaqlaq: Dan huwa lift imwaħħal mas-saqaf jew tagħmir li jista' jiċċaqlaq li jgħin lin-nies jidħlu f', u joħorġu minn, siġġu tar-roti.

                    Post għall-parkeġġ aċċessibbli: Dan huwa post pubbliku għall-parkeġġ maħsub għan-nies b'diżabbiltà jew żona privata għall-parkeġġ fil-propjetà tal-listing tiegħek li għandha mill-inqas 3.5 metri (11-il pied) spazju għal karozza waħda. Fir-ritratt uri l-post pubbliku tal-parkeġġ bis-simboli li juru li huwa parkeġġ għan-nies b'diżabbiltà jew iż-żona privata tal-parkeġġ b'karozza pparkjata ħdejn l-ispazju tal-parkeġġ għall-klijenti biex il-klijenti jkunu jistgħu jieħdu idea tad-daqs. Tista' wkoll tuża rutella biex turi l-wisa' fir-ritratt.

                    Irfigħ tal-pool: Dat-tagħmir jerfa' minn, u jniżżel persuna, f'pool jew jacuzzi.

                    Mogħdija mdawla sew li twassal għad-daħla li jużaw il-klijenti: Dan ifisser il-mogħdija ta' barra mid-daħla privata jew mill-mogħdija ta' barra sad-daħla li jużaw il-klijenti biex jidħlu fil-listing tiegħek, imdawla bil-lampi tat-triq, bid-dwal tal-ġnien jew b'sorsi oħra ta' dawl artifiċjali. Nissuġġerulek tieħu ritratt tal-mogħdija billejl, jew kmieni filgħodu, biex il-klijenti jkunu jistgħu jifhmu l-post u l-qawwa tad-dawl.

                    Nissuġġerulek ukoll tgħin lill-klijenti bi ħtiġijiet tal-aċċessibbiltà b'modi oħra. Tista' tagħmel differenza kbira lil ħafna klijenti jekk tikkomunika b'mod ċar u tagħmel ftit bidliet fl-ispazju u fil-listing tiegħek.

                    Jake, klijent b'mobbiltà limitata, jispjega dil-ħaġa hekk: "Il-fatt li jkollok informazzjoni eżatta mill-bidu nett jgħin lill-persuni b'diżabbiltà jkunu esploraturi."

                    *Skont id-dejta ta' Airbnb li nġabret bejn Jannar u Mejju tal-2019

                    Punti ewlenin

                    • Il-vjaġġaturi ta' spiss ifittxu għall-faċilitajiet tal-aċċessibbiltà bħal daħliet mingħajr għetiebi

                    • Ritratti ta' kwalità għolja ta' dal-faċilitajiet jistgħu jgħinu lill-klijenti jiddeċiedu jekk l-ispazju tiegħek jgħoddx għalihom

                      • Sir af iktar mill-gwida taċ-Ċentru tal-Għajnuna tagħna dwar kif iżżid il-faċilitajiet tal-aċċessibbiltà mal-listings

                      Airbnb
                      22 ta’ Set 2020
                      Dan kien ta' għajnuna għalik?