Kif tgħin lill-klijenti ta' Kmamar jivvjaġġaw daqslikieku kienu nies tal-post

Airbnb bdiet bħala pjattaforma fejn il-vjaġġaturi setgħu joqogħdu ġewwa d-dar ta' ħaddieħor mingħajr ma jonfqu ħafna flus. Il-proġett tagħna kompla jikber hekk kif il-Hosts u l-klijenti minn madwar id-dinja kollha bdew jibnu rabtiet ġenwini bejniethom.

Il-kategorija Kmamar tiċċelebra dan kollu. Għadd dejjem ikbar ta' Hosts qed jgħinu lill-klijenti jivvjaġġaw qishom kienu nies tal-post. Hemm ħafna modi kif jagħmlu hekk, fosthom li jaqsmu l-pariri fuq il-postijiet li l-klijenti għandhom iżuru u li jżommu moħħ miftuħ u jitgħallmu mingħand il-klijenti.

Dawn huma l-istejjer ta' kif tliet Hosts bnew rabtiet ġenwini mal-klijenti.

Tista' tgħin lill-klijenti tiegħek jiskopru ż-żona tiegħek billi toħloq gwida għall-ivvjaġġar għal-listing tiegħek. Dan mod ħafif kif taqsam is-suġġerimenti mal-klijenti. Innutajna li l-Hosts bi gwida tal-ivvjaġġar għandhom ċans ikbar jiksbu booking.

Ħafna Hosts jagħtu wkoll is-suġġerimenti tagħhom wiċċ imb wiċċ meta jiltaqgħu mal-klijenti. Reed, li flimkien ma' martu huwa Host ta' Kamra ġewwa Philadelphia, jistieden lill-klijenti jingħaqdu miegħu u ma' martu għall-ikla tal-Ħadd. Reed isajjar stuffat u jistaqsi lill-klijenti jekk hemmx xi ħaġa li jixtiequ jagħmlu. Imbagħad jaqsam magħhom "dawk il-postijiet tal-ġenn li mhux tas-soltu", bħal pereżempju kaffetterija fil-qrib b'ħitan miksija bil-kotba.

Kultant Reed jistieden lill-klijenti biex jingħaqdu miegħu għaż-żfin, wieħed mill-iktar passatempi li jħobb. "Ħadna għadd ta' klijenti jiżfnu f'post b'mużika Latina biex inqumu ftit fuq tagħna," jgħidilna. Xi klijenti "saru qishom parti mill-familja", żied jgħidilna.

Il-klijenti jafu jibbukkjaw il-Kamra tiegħek għax il-Passaport tal-Hosts jgħinhom isiru jafu ftit aħjar min int u għalhekk jafu jħossuhom iktar komdi joqogħdu għandek.

Nicola, Host ta' Kamra ġewwa Fitzroy, l-Awstralja, tgħidilna li tieħu gost issir taf dwar kulturi u ikel ġdid. Sabet li xi klijenti jagħżlu li jqattgħu l-ħin tagħhom magħha u jħossuhom komdi qishom kienu d-dar tagħhom.

Hi u ħuha, kok magħruf ġewwa Melbourne, kultant jistaqsu lill-klijenti jekk ikunux iridu jsajru xi ħaġa flimkien. "Għandna kċina industrijali u għalhekk il-klijenti jistgħu jagħmlu l-għaġin jew il-ħobż tagħhom stess," tgħidilna.

Grupp minnhom tant ħassewhom milqugħa li spiċċaw jagħmlu l-yoga fis-salott ta' Nicola. "Ħadt gost ħafna nara li l-post tiegħi għoġobhom," tgħidilna. Hekk kif fehmet li l-klijenti jħobbu l-eżerċizzju fiżiku, Nicola wriethom park fil-qrib u qattgħu l-waranofsinhar hemm flimkien—jixxabbtu mas-siġar u jitkellmu dwar postijiet oħra li setgħu jiskopru.

Aħseb ftit fuq kif tixtieq tqatta' l-ħin mal-klijenti u għarrafhom b'dak li tippreferi. Jekk titħajjar tqatta' ftit ħin mal-klijenti tiegħek, dil-ħaġa taf twasslek tibni rabta magħhom.

Garth, Host ta' Kamra ġewwa Auckland, New Zealand, jgħid li meta jilqa' n-nies ġewwa daru jkun jista' jqatta' iktar ħin ma' nies minn kulturi oħra mingħajr il-ħtieġa li jivvjaġġa. Ħaseb bejn u bejn ruħu, "Mhux aħjar jiġu jżuruni huma?".

Waħda mis-sitwazzjonijiet li Garth ma jinsa' qatt seħħet ma' xi klijenti li kienu ġejjin minn Franza. L-omm staqsietu jekk binha setax joqgħod jarah jaħdem fil-garaxx. "Lit-tifel għoġbitu kull ħaġa li kont qed nagħmel," jgħid Garth.

Għalhekk ħaseb f'xi ħaġa li setgħu jaħdmu fuqha t-tnejn li huma. "Ħdimna dgħajsa żgħira u żbajnieha," jgħidilna. "Vera ħadt gost. Hu ma kienx jitkellem bl-Ingliż imma xorta sibna mod kif nikkomunikaw."

Tista' tiskopri iktar stejjer u pariri mingħand il-Hosts billi tingħaqad mal-Klabb tal-Hosts ta' fejn għandek il-listing tiegħek. Dawn il-klabbs immexxijja mill-Hosts għall-Hosts u joffru laqgħat virtwali u wiċċ imb wiċċ, għajnuna matul l-avventura tiegħek int u tilqa' n-nies u l-aħħar aħbarijiet dwar Airbnb u s-servizzi tagħha.

L-informazzjoni f'dal-artiklu jaf laħqet inbidlet minn meta ġie ppubblikat.