Kif Brenda, Host ta' Airbnb, iddaħħal il-flus issa li waqfet mix-xogħol
Brenda, Host ta' Airbnb, tagħti merħba sabiħa lill-klijenti fit-tieni dar tagħha li tinsab fil-viċinat ta' Gentilly ġewwa New Orleans. Brenda twieldet u trabbiet ġewwa New Orleans u tħossha kburija li tista' taqsam darha u l-belt tagħha ma' vjaġġaturi minn madwar id-dinja kollha. "Qattajt 66 sena hawn, ħajti kollha, u dil-propjetà ilha tiegħi għal dal-aħħar 32 sena," tgħid. "Mort l-iskejjel tal-gvern ġewwa New Orleans u llum nieħu gost nuri l-belt tiegħi lin-nies." Meta marret toqgħod mat-tieni raġel tagħha, Brenda ma xtaqitx tbigħ id-dar fejn kienet rabbiet lill-familja tagħha. Il-fatt li tilqa' n-nies għenha żżomm darha u ddaħħal il-flus biex, issa li waqfet mix-xogħol, tkun tista' tieħu ħsieb il-ħtiġijiet tagħha.
Brenda skopriet lil Airbnb meta kienet qed tgħin lil bintha biex tmur toqgħod Spanja. "Qgħadna fid-dar ta' waħda mara u kienet dħulija ħafna magħna. Saħansitra għenet lil binti ġġorr l-affarijiet sad-dar il-ġdida tagħha. Kienet waħda mill-isbaħ esperjenzi li qatt kelli u ħsibt li nista' noffri l-istess esperjenza lil ħaddieħor." Irnexxielha. Mal-wasla tal-klijenti, Brenda tagħtihom pakkett ta' merħba bi ftit snacks u lista ta' suġġerimenti. Hi tara wkoll li jafu fejn għandhom imorru u kif jistgħu jgawdu kull rokna tal-belt. "Lill-klijenti nagħmlilhom il-priedka tiegħi tas-soltu. Wieħed mill-klijenti tiegħi qal li ħassu qisu qed joqgħod għand iz-zija favorita tiegħu."
Brenda tħobb taqsam mal-klijenti tagħha dak li taf dwar il-postijiet ta' madwar il-belt—u tissuġġerilhom iżuru postijiet li n-nies li jżuru New Orleans mhux soltu jkunu jafu dwarhom. "Dejjem nissuġġerixxi lin-nies biex imorru sa Lakefront Airport fejn jinżlu l-ajruplani privati. Hemm ristorant żgħir gustuż ħafna jismu Messina's—hemm issib l-aqwa pancakes tad-dinja. Tordna tnejn u tinduna li tkun ordnajt wisq għax kull pancake daqs platt," tgħid Brenda bid-daħka. "Imbagħad nissuġġerixxi wkoll Sassafras fejn tista' ssib l-iktar gumbo awtentiku ġewwa New Orleans. Kuljum issibilhom gumbo awtentiku frisk li jkunu ħejjew dakinhar stess."
Brenda tinnota li l-klijenti tagħha jgħinu lin-negozji tal-post bil-flus li jiffrankaw meta joqogħdu fil-post li tellgħet fuq Airbnb. "In-nies li joqogħdu għandi jaf ma jkollhomx $600 USD biex jonfqu għal 3 ijiem f'lukanda fiċ-ċentru imma dak li jkunu jistgħu jonfqu, imorru u jonfquh ġewwa New Orleans. Jonfqu l-flus fil-ħwienet u b'hekk itejbu l-ekonomija tal-belt."
Għal Brenda, il-fatt li tilqa' n-nies jgħinha żżomm id-dar tagħha u tlaħħaq mal-ispejjeż tal-ħajja. Wara li korriet b'mod serju, Brenda kellha tħalli l-karriera tagħha qabel il-waqt. "Għamilt operazzjoni f'għonqi u ma stajtx inkompli naħdem." Wara l-Uragan Katrina, il-prezz tal-assigurazzjoni u t-taxxi fuq il-propjetà tagħha għolew b'iktar mid-doppju. "X'jibqagħlek wara li tħallas it-taxxi tal-propjetà u l-kontijiet għoljin tad-dawl, tal-ilma u tal-assigurazzjoni? L-unika ħaġa li jifdallek huma l-ħbieb u l-familja."
Il-fatt li tilqa' n-nies s'issa għenha ddaħħal biżżejjed flus biex tkun tista' tagħmel tajjeb għal dal-ispejjeż kbar. "Li nilqa' n-nies huwa s-sors ewlieni tad-dħul tiegħi, dak u l-Benefiċċji Soċjali." Brenda inkwetata li l-awtoritajiet tal-belt jistgħu jiddeċiedu li ma jħalluhiex tkompli bin-negozju tagħha. Jekk l-awtoritajiet tal-belt ma jkomplux joħorġu permessi għaż-żjarat għal żmien qasir fiż-żoni residenzjali, "tkun ħasra kbira u nispiċċa nmur minn taħt. Mhux hekk biss imma l-awtoritajiet tal-belt għandhom iżommu f'moħħhom ukoll minn fejn se jagħmlu tajjeb għan-nuqqas tad-dħul, dak id-dħul li bħalissa ġej miż-żjarat għal żmien qasir. Xi ħaġa hekk tolqot bil-kbir id-dħul tiegħi. Sitwazzjoni frustranti ħafna."
Brenda għadha tittama li l-awtoritajiet tal-belt jagħmlu deċiżjoni għaqlija u jħallu nies bħalha, li għandhom il-permessi għall-kiri għal żmien qasir jew iktar minn dar waħda, ikomplu jilqgħu n-nies billi joffrulhom listings ta' djar sħaħ. "Nispera li jieħdu deċiżjoni li tqis il-ħtiġijiet tas-sidien tad-djar, dawk in-nies li bħali ilhom jgħixu hawn żmien twil." B'regolamenti dwar il-kirjiet għal żmien qasir ġusti li jagħmlu sens, Brenda tista' tkompli ddaħħal il-flus li tant teħtieġ biex tlaħħaq mal-ħajja u tkompli tkun ambaxxatriċi mill-aqwa tal-belt sabiħa tagħha.
L-informazzjoni li tinsab f'dal-artiklu jaf laħqet inbidlet minn meta ġie ppubblikat.