Mur 'il quddiem biex taċċessa r-riżultati suġġeriti
    Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

    Kif tkabbar in-negozju tiegħek bl-Esperjenzi

    Il-Hosts jistgħu jagħmlu iktar billi joffru attivitajiet li jispiraw lill-klijenti.
    Minn Airbnb f'did-data: 17 ta’ Jan, 2019
    Qari ta' 3 minuti
    Aġġornat f'did-data: 21 ta’ Apr, 2021

    Kolazzjoni mħejjija d-dar, ġiti bil-mixi, attivitajiet fil-viċinat u ħafna iktar—is-Superhosts joffru iktar minn dak li hu mistenni minnhom biex il-klijenti jħossuhom milqugħin. Filfatt madwar 30%* tal-Hosts tad-djar ta' Airbnb offrew ġiti u attivitajiet lill-klijenti tagħhom. U xi Hosts għamlu dal-offerti uffiċjali billi offrewhom bħala Esperjenza.

    Ara l-eżempju tas-Superhosts Patricia Ramos u Oscar Fernandez li kienu fost l-ewwel Organizzaturi tal-Esperjenzi ġewwa Kuba. Il-koppja, it-tnejn li huma professuri tal-ekonomija fl-Università ta' Havana, bdew bħala Hosts tad-djar. Illum qed jorganizzaw ukoll erba' Esperjenzi: avventura kulturali fuq jumejn ġewwa Havana u ż-żoni rurali; ġita bil-mixi dwar il-vera Havana li tieħu nofs jum; ġita ta' jum fiż-żoni rurali ta' Kuba biex il-parteċipanti jkunu jafu x'jiġifieri li tgħix mir-raba u mit-tkabbir tal-annnimali u t-tkabbir tal-kafè; kif ukoll taħdita ta' sagħtejn b'Cuba Libre jew ix-xarba tal-għażla tal-parteċipanti dwar l-ekonomija u s-soċjetà Kubana. Mhux hekk biss imma "ħeġġiġna lil sħabna jibdew jorganizzaw 15-il Esperjenza oħra," qalilna Oscar.

    Patricia u Oscar spjegawlna kif kabbru n-negozju tagħhom.

    Allura kif bdejtu bl-Esperjenzi?
    Oscar: "Mela, konna qed inqattgħu madwar sagħtejn ma' kull klijent matul iċ-checkin għax xtaqna naqsmu magħhom kull ħaġa li konna nafu dwar Kuba. U dil-ħaġa kienet togħġobna għax konna nħossuna qisna professuri, ovvjament bi studenti ta' xorta oħra."

    Patricia: "Imbagħad in-nies bdew jiktbu r-reviews dwarna u kitbu dwar il-ġiti [spontajni li organizzajna]. Għalhekk meta Airbnb nediet Esperjenzi ġewwa Kuba, ħsibna, 'Għaliex ma noħolqux Esperjenza bħal dik li diġà qed noffru matul iċ-checkin?'"

    Irrakkontalna dwar l-ewwel Esperjenza tiegħek, Being Cuban Adventure. X'jagħmilha unika?
    Patricia: "Il-biċċa l-kbira tad-drabi, il-vjaġġaturi internazzjonali li jżuru Kuba jkunu qed jistennew li se jisimgħu dwar it-tabakk, ir-rum u l-mużika salsa. Imma aħna xtaqna nuru xi ħaġa iktar lill-parteċipanti: kif jaħdmu s-sistemi tal-edukazzjoni u tas-saħħa kif ukoll is-swieq tagħna; u kif in-nies jirnexxielhom jgħixu fuq pagi daqshekk baxxi. Aħna neħduhom mixja madwar il-belt u nuruhom postijiet li mhux turistiċi, bħal Coppelia - il-ġenna tal-ġelat. Ħamest iblalen tal-ġelat jiswew biss madwar 25 ċenteżmu ta' dollaru amerikan. Biex tidħol trid tagħmel madwar nofs siegħa tistenna u n-nies jissoċjalizzaw, u saħansitra jorganizzaw il-laqgħat huma u jistennew fil-kju—huwa ritratt ħelu tas-soċjetà Kubana. Nieħdu wkoll lill-parteċipanti tagħna fuq it-trasport pubbliku, li hija xi ħaġa pjuttost rari [għat-turisti]. Fl-aħħar tal-jum iħossuhom li għamlu xi ħaġa kbira u jkunu jistgħu jiddiskutu dwar dak li verament jaħsbu l-Kubani dwar il-ħajja f'soċjetà soċjalista."

    X'inhi l-isbaħ ħaġa li tiltaqa' magħha bħala Organizzatur ta' Esperjenza?
    Oscar: "L-ammont ta' għarfien u kultura li tikseb huma tal-għaġeb. Kull darba tkun qed taqsam il-kultura tiegħek. Aħna xorta għadna professuri tal-università għalhekk inħeġġu lill-kollegi ż-żgħar tagħna biex jorganizzaw l-Esperjenza magħna. Inħossu wkoll li Airbnb ħolqot ix-xogħol u tejbet il-ħajjiet tan-nies. Għall-Esperjenza tagħna "Life in the Countryside", aħna nieħdu lill-parteċipanti tagħna f'żona rurali fejn jiltaqgħu mal-ħbieb tal-familja li jgħixu mis-sajd u mir-raba permezz tal-frott u l-kafè li jkabbru. Illum il-ġurnata qed nieħdu lill-parteċipanti madwar tliet darbiet fil-ġimgħa u sħabna issa saru huma wkoll intraprendituri."

    Għandek xi parir għal Hosts oħra li qed jaħsbu biex jorganizzaw Esperjenza?
    Patricia: "Kollox jiddependi fuq jekk għandekx xi ħaġa x'taqsam mal-oħrajn u jekk tridx taqsamha ma' ħaddieħor."

    Oscar: "Għax l-iktar ħaġa importanti hija li tkun disponibbli għall-klijenti. Disponibbli fis-sens li tkun awtentiku għax inkella mhux se tirnexxi."

    *Skont stħarriġ intern ta' Airbnb ta' iktar minn 100 Host.

    L-informazzjoni li tinsab f'dal-artiklu jaf tkun inbidlet minn meta ġie ppubblikat.

    Airbnb
    17 ta’ Jan, 2019
    Dan kien ta' għajnuna għalik?