Kif tħejji ruħek biex tilqa' lir-refuġjati ma' Airbnb.org

L-ewwel darba li jaslu f'pajjiż ġdid, ir-refuġjati u dawk li jkunu qed ifittxu ażil, minbarra li jsibu ma' wiċċhom kultura ġdida jkollhom ukoll jieħdu ħsieb ta' ħafna formalitajiet bħalma huma l-kisba tad-dokumenti u t-tfittxija għal xogħol. Ħafna drabi, il-ħaddiema tal-imsieħba mingħajr skop ta' qliegħ ta' Airbnb.org li jieħdu ħsieb il-każijiet tar-refuġjati jgħinuhom f'dal-biċċiet tax-xogħol kruċjali u jgħinuhom isibu dar permanenti. Drabi oħra, ir-refuġjati u dawk li jkunu qed ifittxu ażil ikollhom jiffaċċjaw dal-isfidi waħidhom.

Bħala Host tista' tagħti sehmek f'dal-mument importanti billi toffri post sigur u komdu fejn persuna tista' toqgħod sakemm issib postha fl-ambjent il-ġdid fejn tkun se tqatta' ftit żmien sakemm tippjana għal futur u ħajjitha terġa' tikseb ftit tan-normalità.

F'dal-artiklu se ssib xi pariri fuq kif tħejji ruħek biex tilqa' n-nies li jkunu qed jerġgħu jibnu ħajjithom mill-ġdid. Dawn is-suġġerimenti huma bbażati fuq il-pariri mogħtija kemm minn Hosts oħra li diġà laqgħu lir-refuġjati kif ukoll minn ħaddiema li jieħdu ħsieb il-każijiet tar-refuġjati f'isem l-għaqdiet mingħajr skop ta' qligħ.

Qabel tikseb booking, ħaddiem li jkun qed jieħu ħsieb il-każijiet tar-refuġjati għal waħda mill-imsieħba mingħajr skop ta' qligħ ta' Airbnb—bħal pereżempju l-IRC jew il-HIAS—jew persuna fil-bżonn li tixtieq tibbukkja u rċeviet kupun biex tħallas għall-booking jafu jikkuntattjawk biex jikkonfermaw id-dettalji dwar l-ispazju tiegħek. Biex tgħin tħaffef dal-proċess, jekk jogħġbok ara li d-dettalji tal-listing tiegħek ikunu kompluti u aġġornati u wieġeb fil-pront għall-mistoqsijiet li tirċievi.

Importanti li żżomm f'moħħok li matul kriżi tar-refuġjati bħal dik li bħalissa għaddej minnha l-poplu Ukren, il-postijiet fejn toqgħod meħtieġa minnufih b'urġenza. F'ċerti każijiet, it-talbiet għall-booking li jiġu minn Airbnb jafu jkunu għal żjarat ta' 30 jum jew iktar li jkunu meħtieġa fi żmien jum jew jumejn minn mindu l-persuna tressaq it-talba tagħha.

Matul il-proċess tal-booking se tkun tista' tistaqsi l-mistoqsijiet tiegħek lill-persuna fil-bżonn jew lill-ħaddiem li jkun qed jieħu ħsieb il-każ tar-refuġjati u se jkollok ukoll aċċess għat-tim tal-għajnuna mħarreġ apposta ta' Airbnb.org.

L-għaqdiet mingħajr skop ta' qligħ imsieħba magħna joffru lin-nies li jkunu qed jgħinu l-bżonnijiet ta' kuljum, bħall-ikel u t-trasport, kif ukoll aċċess għal servizzi importanti bħalma huwa s-servizz tas-saħħa, għajnuna biex isibu xogħol u għajnuna biex isibu dar permanenti.

Minħabba l-ħidma kbira meħtieġa biex ngħinu lir-refuġjati Ukreni li kellhom iħallu djarhom, id-domanda għal das-servizzi tal-għajnuna hija kbira ħafna. In-nies fil-bżonn jiġu mħeġġa biex kemm jista' jkun jaqdfu għal rashom fejn jidħlu dal-affarijiet bażiċi ħalli b'hekk inkunu nistgħu ngħinu lill-dawk li l-iktar jeħtieġu l-għajnuna.

Għalkemm ma nobbligawkx tagħmel hekk, bħala Host tista' tagħżel li tgħin lin-nies fil-bżonn li tkun qed tilqa' billi tispjegalhom x'riżorsi jistgħu jaċċessaw fil-komunità l-ġdida tagħhom.

"Bħala omm bdejt nipprova nkun prattika," tgħid Sarah, Host ġewwa Vancouver, il-Kanada. "Kienu se jiġu bżonn il-ħwejjeġ? Għandna nħallulhom ikel fil-friġġ? Se jkollhom bżonn xi għajnuna bix-xirja?" Hija bagħtet dal-mistoqsijiet lill-ħaddiem li kien qed jieħu ħsieb il-każ ta' dal-persuni fil-bżonn u rċeviet tweġiba li l-familja li kienet se tilqa' probabbli tapprezza ftit kutri żejda u xi ġugarelli żgħar għat-tfal.

Grazzi għall-għeruq Ukreni tiegħu u l-esperjenza li għandu dwar kif għandu jilqa' r-refuġjati permezz ta' Airbnb.org, Adam, Host ġewwa Ontario, il-Kanada kien wieħed minn tal-ewwel li offra li jilqa' lin-nies li kienu qed jaħarbu mill-gwerra ġewwa l-Ukrajna. Minbarra li jilqa' n-nies fl-ispazju tiegħu u fil-propjetajiet li jieħu ħsieb, Adam jgħid li jgħin lir-refuġjati jerġgħu jibnu ħajjithom mill-ġdid billi jurihom fejn jistgħu jsibu l-kultura u l-komunità Ukrena fiż-żona tiegħu—ħwienet, knejjes u lezzjonijiet għall-iżvilupp professjonali fiċ-ċentru tal-komunità Ukrena tal-post. "Nistaqsihom x'kienu jagħmlu f'pajjiżhom u nispjegalhom x'jistgħu jagħmlu hawn," jgħidilna.

Il-livell ta' privatezza mfittex minn kull persuna jew familja se jkun differenti, l-istess bħal meta tilqa' lill-klijenti ta' Airbnb. Il-fatt li jkollok żoni fid-dar tiegħek fejn ir-refuġjati jistgħu jirrilassaw privatament jew iqattgħu ftit ħin flimkien bħala familja—bħal pereżempju xi kamra, bitħa jew spazju ieħor—jista' jgħinhom biex iħossuhom milqugħin u jaddattaw għall-bidla.

"Il-membri tal-familja [li lqajna] setgħu jagħżlu huma stess kif iqattgħu l-ħin tagħhom, kemm jekk riedu jkunu waħidhom kif ukoll jekk xtaqu jissoċjalizzaw magħna," tgħid Sarah. "Konna nkomplu ftit magħhom meta narawhom fil-ġnien jew meta jkunu deħlin bix-xirja imma għall-bqija ħallejniehom ikomplu waħidhom."

Airbnb ħolqot linji gwida u programmi biex tgħin lill-Hosts joffru żjarat iktar siguri. Hawn għandek xi wħud mill-iktar punti importanti:

• Meta l-liġijiet u l-linji gwida tal-post fejn jinsab il-listing jeħtiġuk tagħmel hekk, ilbes maskra u żomm it-tbegħid soċjali
• Bejn żjara u oħra, uża l-proċess għat-tindif imtejjeb f'5 passi ta' Airbnb
• Tivvjaġġax u tilqax nies jekk kont qrib ta' xi ħadd marid bil-COVID-19 jew jekk għandek xi sintomi tal-COVID-19

Ir-refuġjati jafu jkunu għaddew minn tbatija kbira matul il-vjaġġ tagħhom. Jekk titħajjar issir taf iktar dwar l-esperjenzi tar-refuġjati, agħti titwila lejn dar-riżorsi suġġeriti mill-imsieħba mingħajr skop ta' qligħ tagħna:

• Sir af iktar kif taħdem mar-refuġjati
• Ikseb l-informazzjoni dwar il-kriżi tar-refuġjati Ukreni li għaddejja bħalissa mingħand l-Għaqda Internazzjonali għall-Migrazzjoni, imsieħba ta' Airbnb.org
• Sir af dwar il-kriżi li għaddejjin minnha n-nies tal-Afganistan grazzi għall-informazzjoni mingħand-Kumitat Internazzjonali tas-Salvataġġ (IRC), imsieħba ta' Airbnb.org

Kif jistgħu jibbukkjaw postijiet fejn toqgħod temporanji dawk li qed jaħarbu mill-Ukrajna?
Malli nikkonfermaw li persuna jew familja jeħtieġu post fejn joqogħdu għal ftit żmien, ħaddiem ta' għaqda mingħajr skop ta' qligħ li jkun qed jieħu ħsieb il-każ tagħhom jaf jgħinhom jibbukkjaw post fejn joqogħdu jew inkella n-nies fil-bżonn jistgħu jirċievu kupun għall-booking biex ikunu jistgħu jibbukkjaw huma stess il-post fejn joqogħdu għal ftit żmien.

Matul il-proċess tal-booking, il-Hosts jafu jiġu avżati li t-talba għall-booking hija talba għal post fejn toqgħod ta' emerġenza li tkun ġejja minn Airbnb.org.

Għal kemm żmien għandi nistenna li nilqa' għandi lir-refuġjati?
Il-bookings ta' Airbnb.org normalment idumu minn ftit jiem sa ftit ġimgħat. Biss, minħabba li hemm miljuni ta' nies li qed jaħarbu mill-Ukrajna u l-għaqdiet mingħajr skop ta' qligħ u l-aġenziji tal-gvernijiet qed jirċievu numru kbir ta' talbiet għall-għajnuna, xi refuġjati jafu jkunu jeħtieġu post fejn joqogħdu għal 30 jum jew anke iktar.

Xi bliet neħħew il-limiti taż-żjarat għall-postijiet li jkunu qed jintużaw mir-refuġjati. Biex issir taf xi jgħidu r-regoli taż-żona tiegħek, jekk jogħġbok ikkuntattja lill-awtoritajiet tal-post.

X'jiġri wara li tintemm iż-żjara ta' refuġjat?
Waqt li refuġjat ikun qed jagħmel użu minn post fejn toqgħod temporanju, dan jaf ikun qed jippjana kif se jsib post fejn joqgħod b'mod iktar permanenti biex jibda ħajja ġdida f'post ġdid.

Il-persuni fil-bżonn għandhom aċċess għat-tim tal-għajnuna b'taħriġ apposta ta' Airbnb.org, tim li jaħdem fil-qrib mal-għaqdiet mingħajr skop ta' qligħ tal-post biex ikun jista' joffri iktar għajnuna lil dan-nies jekk ikunu jeħtiġuha.

Minħabba d-daqs tal-kriżi ġewwa l-Ukrajna, l-għaqdiet mingħajr skop ta' qligħ jeħtiġilhom jiffukaw il-ħidma tal-għajnuna fit-tul tagħhom għal dawk in-nies li jqisu li l-iktar jeħtiġuha. Bħalissa ma nistgħu nagħtu l-ebda garanzija li kull persuna fil-bżonn se tkun tista' tirċievi għajnuna fit-tul.

Fil-każ li persuna tkun teħtieġ l-għajnuna b'post fejn toqgħod għal iktar żmien wara li jintemm il-booking tagħha, din tista' tikkuntattja lil Airbnb.org biex titlob post fejn toqgħod għal sa ġimgħatejn oħra.

Min hu eliġibbli għall-postijiet fejn toqgħod ta' emerġenza?
Ta' sikwit Airbnb.org taħdem ma' għaqdiet mingħajr skop ta' qligħ u aġenziji li jaħdmu biex isibu postijiet fejn in-nies fil-bżonn ikunu jistgħu joqogħdu li jaħdmu mar-refuġjati—li kapaċi jgħinu fi żminijiet ta' kriżi fil-ħidma wiċċ imb wiċċ mar-refuġjati—biex jifhmu l-ħtiġijiet u l-eliġibbiltà tan-nies fil-bżonn li jkunu jixtiequ jibbukkjaw post fejn joqogħdu.

In-nies fil-bżonn li jibbukkjaw post fejn joqogħdu għal ftit żmien fuq Airbnb.org waħidhom huma meħtieġa joħolqu kont ta' Airbnb—u jafu wkoll ikollhom jivverifikaw l-identità tagħhom.

L-istatus ta' Superhost tiegħi se jiġi affetwat jekk nilqa' n-nies fuq Airbnb.org?
Għall-valutazzjoni tas-Superhosts tal-1 ta' April 2022 (li tinkludi d-dejta miġbura mill-1 ta' April 2021 sal-31 ta' Marzu 2022):

• Il-bookings ta' Airbnb.org jgħoddu meta ngħoddu n-numru taż-żjarat li tkun ilqajt.
• Il-bookings ta' Airbnb.org ma jgħoddux għal fatturi oħra bħar-reviews, kanċellazzjonijiet u r-rata ta' rispons li nqisu għall-valutazzjonijiet tas-Superhosts li jseħħu kull 3 xhur.

Nibdew? Ingħaqad ma' komunità dejjem tikber li grazzi għal Airbnb.org lesta tagħti l-għajnuna tagħha matul żminijiet ta' bżonn.