Kif tgħinna nwaqqfu t-traffikar tal-bnedmin

Airbnb issieħbet ma' Polaris biex inkabbru l-għarfien tal-komunità tagħna dwar dak li għandu x'jaqsam mat-traffikar tal-bnedmin ħalli ngħinuk tagħraf is-sinjali marbuta tat-traffikar tal-bnedmin u nispjegawlek x'għandek tagħmel f'każ li tissuspetta li xi ħaġa hekk qed issir fil-listing tiegħek. Għalhekk inħeġġuk biex, jekk ikun hemm sitwazzjonijiet fejn tissuspetta traffikar tal-bnedmin, tirrappurtahom minnufih lin-National Human Trafficking Hotline mmexxija minn Polaris. Jekk m'intix ġewwa l-Istati Uniti tal-Amerka, tista' tuża l-Global Modern Slavery Directory (GMSD) biex issib għaqdiet oħra minn madwar id-dinja li jaħdmu biex iwaqqfu t-traffikar tal-bnedmin.

X'inhu t-traffikar tal-bnedmin

Għalkemm it-tifsira ta' traffikar tal-bnedmin taf tkun differenti bejn pajjiż u ieħor, il-biċċa l-kbira tal-pajjiżi jużaw il-linji gwida maħruġa mill-Ġnus Magħquda u li magħmulin minn 3 oqsma ewlenin:

1. L-atti li għandhom iseħħu biex ikun hemm it-traffikar tal-bnedmin: it-tiftix, it-trasport, il-bejgħ, il-ħabi u x-xiri tal-persuni.
2. Kif iseħħ it-traffikar tal-bnedmin: bit-theddid jew l-użu tal-forza, bil-ħtif, bil-frodi, bir-rikatti u bl-abbuż ta' poter.
3. Għaliex iseħħ it-traffikar tal-bnedmin: għall-isfruttament (fost oħrajn, l-isfruttament tal-ħidma sesswali ta' nies oħra jew xorta oħra ta' sfruttament sesswali), għall-ħidma jew għas-servizzi sfurzati, għall-iskjavitù jew għal kundizzjonijiet li jixbhu l-iskjavitù, għall-qadi sfurzat jew għat-tneħħija tal-organi tal-ġisem.

Ħjiel li għandek toqgħod attent/a għalihom

Ħafna drabi, il-vittmi tat-traffikar tal-bnedmin ma jkunux jistgħu jirrappurtaw dak li jkun qed jiġrilhom u għalhekk, bħala Host, importanti li tkun taf tagħraf is-sinjali tat-traffikar tal-bnedmin. Dil-lista tagħti biss eżempji ta' ftit mill-ħjiel li għandek toqgħod attent għalihom, u importanti żżomm f'moħħok li anke jekk tinnota xi waħda minn dal-ħjiel, mhux bilfors ifisser li hemm xi traffikar tal-bnedmin:

Ħjiel tal-użu ta' vjolenza, frodi jew rikatt:

• Theddid tal-użu tal-forza jew tal-vjolenza
• Persuni fiżikament imrażżna
• Korrimenti
• Persuna li tiġi mġiegħla taċċetta xogħol b'kundizzjonijiet differenti minn dawk li qablet għalihom waqt il-proċess tal-għażla
• Persuna li ma tkunx ħielsa tmur fejn trid u li ma jkollha ebda kontroll fuq il-flus u l-propjetà tagħha
• Persuna li tiġi mġiegħla tieħu d-drogi jew tixrob l-alkoħol minn persuna oħra

Ħjiel ta' sfruttament:

• Ħidma sfurzata:
  • Il-ħaddiem huwa tifel jew tifla
  • Ħjiel ta' nuqqas ta' ndafa personali, nuqqas ta' ikel u għeja kbira
  • Ħaddiem li ngħata spazju mhux addattat fejn joqgħod minn min iħaddmu (l-ebda privatezza/post fejn jorqod mhux maħsub għall-irqad)
  • Ħaddiem li ma jistax jistrieħ kif suppost mix-xogħol
  • Ħaddiem li jaħdem f'kundizzjonijiet perikolużi jew ta' periklu għas-saħħa
• Traffikar għal skopijiet sesswali:
  • Issib l-indirizz tal-listing f'riklami fuq l-internet għas-sess bi ħlas
  • Rapporti ta' persuni mhux awtorizzati deħlin u ħerġin mil-listing tiegħek il-ħin kollu.
  • Kwantità mhux tas-soltu ta' oġġetti marbutin mas-sess fil-listing
  • Tagħmir professjonali għall-ġbid tal-vidjows u tar-ritratti fil-listing

Madwar id-dinja huwa stmat li hemm 40.3 miljun persuna li jistgħu jitqiesu vittma ta' xi forma ta' skjavitù moderna. Fost dawn, madwar 4 miljun minnhom jafu huma vittmi tat-traffikar għal skopijiet sesswali—il-biċċa l-kbira tagħhom nisa u bniet. It-traffikar tal-bnedmin huwa reat li ħafna drabi ma jiġix irrappurtat u għalhekk is-satra tiegħu tagħmilha diffiċli li wieħed jifhem il-firxa tiegħu. Filwaqt li kull xorta ta' nies jistgħu jisfaw vittma tat-traffikar tal-bnedmin, ir-riskju li jiġu sfruttati jaf ikun ikbar għal dawk li m'għandhomx saqaf fuq rashom, għal dawk li ntlaqtu minn xi diżastru naturali jew kunflitt, għall-vittmi tal-vjolenza domestika u l-abbuż sesswali u għal dawk li jinsabu f'xi pajjiż bla permess jew b'permess tar-residenza temporanju.

X'għandek tagħmel f'każ li tissuspetta sitwazzjoni ta' traffikar tal-bnedmin

Int tista' tagħti sehmek biex twaqqaf it-traffikar tal-bnedmin. Jekk tissuspetta li xi ħaġa li tkun qed isseħħ fil-listing tiegħek tista' tkun marbuta mat-traffikar tal-bnedmin, tista' tirrappurtaha lin-National Human Trafficking Hotline ta' Polaris billi ċċempel fuq +1-888-373-7888, tibgħat SMS lil 233733 bil-kliem "BeFree" jew billi titħaddet direttament ma' aġent fuq humantraffickinghotline.org/chat. In-numru jitwieġeb 24 siegħa kuljum, huwa bla ħlas, kunfidenzjali u tista' tikkomunika b'iktar minn 200 lingwa. Għalkemm in-nies li jwieġbu se jkunu jistgħu jgħinuk anke jekk tinsab barra l-Istati Uniti tal-Amerka, għal pajjiżi oħra nissuġġerulek tuża l-Global Modern Slavery Directory (GMSD) biex issib u tikkuntattja lil xi għaqda li taħdem fil-post fejn jinsab il-listing tiegħek . Il-Global Modern Slavery Directory (GMSD) immexxi minn Polaris huwa magħmul minn database u mappa pubbliċi li minnhom kulħadd jista' jsib id-dettalji ta' għaqdiet u aġenziji madwar id-dinja li jiġġieldu kontra l-iskjavitù moderna u t-traffikar tal-bnedmin. Fil-GMSD tista' ssib id-dettalji ta' aġenziji tal-gvernijiet, aġenziji taż-żamma tal-ordni, gruppi ta' attivisti u għaqdiet li minbarra li jistgħu jgħinu lill-vittmi tat-traffikar tal-bnedmin, jistgħu jgħinu wkoll f'każ ta' sfruttament fuq il-post tax-xogħol, bil-ħarsien tat-tfal u f'każijiet ta' vjolenza domestika.

Tista' wkoll tirrapporta sitwazzjonijiet li jafu jkunu marbuta ma' traffikar tal-bnedmin lil Airbnb. Iċ-Ċentru tas-Sigurtà ta' Airbnb huwa l-post fejn tista' ssib l-iktar materjal importanti direttament mill-app tiegħek. Miċ-Ċentru tas-Sigurtà tista' tikkuntattja kemm lin-Numru għall-Għajnuna Urġenti ta' Airbnb kif ukoll lis-servizzi tal-emerġenza tal-post, tkun fejn tkun madwar id-dinja.