Tweġiba għall-mistoqsijiet ewlenin dwar il-proċess għat-tindif f'5 passi

L-indafa importanti għall-klijenti—mill-prodotti li qed tuża sal-passi l-oħra li qed tieħu, huma jridu jkunu jafu x'qed tagħmel biex iżżommhom siguri. U mhux huma biss. L-uffiċjali tal-gvern u dawk li jfasslu l-politiċi qed jiffukaw fuq ir-regoli għat-tindif biex iħarsu l-komunitajiet tagħhom hekk kif in-nies qed jerġgħu jibdew jivvjaġġaw u l-komunitajiet qed jerġgħu jibdew jilqgħu l-vjaġġaturi fosthom.

Fil-bidu tal-pandemija, smajna mingħand ħafna minnkom fejn tlabtuna iktar gwida dwar kif għandkom tnaddfu u tissanitizzaw l-ispazji tagħkom. Din kienet waħda mill-iktar talbiet komuni fis-sessjonijiet li organizzajna dal-aħħar biex nisimgħu x'għandhom xi jgħidu l-Hosts minn madwar id-dinja, u l-pariri dwar it-tindif għadhom suġġett popolari fid-diskussjonijiet taċ-Ċentru tal-Komunità u hawnhekk fiċ-Ċentru tar-Riżorsi tagħna.

Għal din ir-raġuni ħloqna l-proċess għat-tindif imtejjeb f'5 passi, li jgħin lil Hosts bħalek inaddfu b'mod iktar effettiv matul il-COVID-19 u lil hinn minnha. Il-proċess f'ħames passi huwa bbażat fuq il-gwida għat-tindif ta' Airbnb, li nħolqot bl-għajnuna tal-esperti. Nifhmu li jaf ikun diffiċli li tibda tuża rutina tat-tindif ġdida u għalhekk ħloqna gwida għat-tindif dettaljata li fiha tista' ssib linji gwida, pariri tas-sigurtà u checklists approvati mill-esperti.

Nafu li probabbli għandek ħafna mistoqsijiet dwar il-proċess, għalhekk għamilna l-almu tagħna biex inwieġbuhom hawn.

Fejn nista' naċċessa l-informazzjoni dwar it-tindif imtejjeb?
Il-proċess għat-tindif imtejjeb f'5 passi huwa bbażat fuq il-gwida għat-tindif ta' Airbnb, li nkitbet bl-għajnuna tal-esperti. Il-gwida dettaljata fiha linji gwida, lista ta' prodotti li għandek tixtri, pariri dwar is-sigurtà u checklists approvati mill-esperti. Tista' ssib iktar pariri, checklists għat-tip ta' post ieħor u iktar materjal fit-taqsima tat-tindif tat-tab Perspettivi tiegħek.

X'inhi d-differenza bejn il-proċess għat-tindif imtejjeb f'5 passi u r-regoli tas-sigurtà għall-COVID-19?
Il-proċess għat-tindif imtejjeb f'5 passi huwa biss parti waħda mir-regoli tas-sigurtà għall-COVID-19. Il-Hosts u l-klijenti għandhom ukoll jilbsu maskra u jżommu mat-tbegħid soċjali meta jiltaqgħu wiċċ imb wiċċ jekk il-liġijiet jew il-linji gwida tal-post fejn jinsab il-listing jitolbu hekk.

Ir-regoli tas-sigurtà għall-COVID-19 jgħoddu għall-klijenti wkoll?
Iva, meta l-liġijiet jew il-linji gwida tal-post fejn jinsab il-listing jitolbu hekk, ir-regoli tas-saħħa u s-sigurtà ta' Airbnb jeħtieġu li l-klijenti jilbsu maskra tal-wiċċ u jżommu 2 metri (6 piedi) bogħod meta jikkomunikaw wiċċ imb wiċċ mal-Hosts jew ma' klijenti oħra li mhumiex fil-grupp tagħhom.

Għaliex il-Hosts kollha issa huma meħtieġa li jimxu ma' dan il-proċess għat-tindif imtejjeb f'5 passi?
Minħabba li l-pandemija għadha għaddejja, importanti li lkoll kemm aħna nagħmlu l-parti tagħna biex inħarsu lil xulxin mill-COVID-19. Nifhmu li jaf ikun diffiċli li tibda tuża rutina tat-tindif ġdida u għalhekk ħloqna gwida għat-tindif dettaljata li fiha tista' ssib linji gwida, pariri tas-sigurtà u checklists approvati mill-esperti.

Il-klijenti kif se jkunu jafu li impenjajt ruħi li nimxi mal-proċess għat-tindif imtejjeb f'ħames passi?
Wara li l-Hosts jimpenjaw ruħhom li jimxu mal-proċess, l-impenn tagħhom għat-tindif imtejjeb se jintwera fuq il-paġna tal-listing tagħhom, sabiex il-klijenti jkunu jafu li l-Hosts qablu li jimxu ma' standard għat-tindif konsistenti. Hemm xi affarijiet li għandek tkun taf:

• Biex l-impenn għat-tindif imtejjeb tagħhom jintwera fuq il-paġna tal-listing tagħhom, il-Hosts se jkollhom jaqblu li jimxu mal-proċess għat-tindif imtejjeb f'5 passi għal-listings tagħhom kollha bejn żjara u oħra tal-klijenti
• Il-Hosts tal-kmamar privati se jkollhom jimxu wkoll ma' gwida oħra bħala parti mill-proċess tat-tindif
• Wara li tkun impenjajt ruħek li timxi mal-proċess, l-impenn tiegħek għat-tindif imtejjeb se jibda jintwera fuq il-paġna tal-listing tiegħek fi żmien 24 siegħa

Airbnb kif se tivverifika li l-Hosts qed jimxu mal-proċess tat-tindif?
Il-Hosts huma meħtieġa jimxu mal-proċess għat-tindif imtejjeb f'5 passi. Is-sistema tar-reviews tagħna hija mod ieħor kif niċċekkjaw—jekk Host mhux qed isegwi r-rekwiżiti, il-klijenti jistgħu jsemmu dil-ħaġa fir-reviews tagħhom dwar l-ispazju. Jekk tkun sitwazzjoni li taqa' taħt il-Politika għall-Ħlas Lura lill-Klijenti tagħna, il-klijenti jistgħu wkoll jitolbu l-ħlas lura għaż-żjara tagħhom billi jikkuntattjaw lill-Għajnuna lill-Klijenti.

X'jiġri jekk ma naċċettax li nimxi mar-rekwiżiti tas-sigurtà għall-COVID-19?
Il-Hosts li joffru l-akkomodazzjonijiet se jsibu messaġġ fl-app jew fid-dashboard tagħhom li se jinkludi l-proċess għat-tindif imtejjeb f'5 passi u paġna fejn jistgħu jaċċettaw li jimxu mar-rekwiżiti tas-sigurtà għall-COVID-19. Jekk ma taċċettax li timxi mar-rekwiżiti, il-kont tiegħek jista' jiġi mwissi, sospiż u f'ċerti każijiet mneħħi mill-pjattaforma ta'Airbnb.

X'jiġri jekk klijent jirrapporta lil Host li jkun impenja ruħu li jimxi mal-proċess għat-tindif f'5 passi imma ma jkunx qed jirrispetta l-istandards?
Aħna nemmnu li l-biċċa l-kbira tal-problemi jistgħu jissewwew permezz ta' iktar edukazzjoni u għajnuna għall-Host. Madankollu, il-Hosts li jibqgħu jiksru jew li jiksbu bil-kbir l-istandards tat-tindif jistgħu jiġu mwissija, sospiżi u, f'ċerti każijiet, imneħħija mill-pjattaforma ta' Airbnb.

Se tiswieni iktar biex nimxi mal-proċess għat-tindif f'5 passi. Kif se nagħmel tajjeb għad-differenza?
Bħala Host, għandek l-għażla li żżid tariffa tat-tindif* mal-listing tiegħek, u l-ammont li titlob huwa kompletament f'idejk. Iż-żieda ta' tariffa għat-tindif—jew il-bidla fit-tariffa tiegħek jekk diġà għandek waħda—tista' tgħinek tagħmel tajjeb għaż-żieda fl-ispejjeż biex timxi ma' dawn ir-rekwiżiti.

Jien Host ta' kamra privata. Meħtieġ nimxi mal-proċess għat-tindif f'5 passi?
Iva, il-Hosts taż-żjarat meħtieġa jimxu mal-proċess għat-tindif f'5 passi. Wara li l-Hosts jimpenjaw ruħhom li jimxu mal-proċess, l-impenn tagħhom għat-tindif imtejjeb se jintwera fuq il-paġna tal-listing tagħhom. Nafu li l-Hosts b'żoni komuni għandhom sfidi uniċi għal dak li għandu x'jaqsam mat-tindif u t-tbegħid soċjali, għalhekk offrejnaiktar linji gwida.

Qabbadt persuna biex tnaddafli l-post tiegħi. Kif nista' niżgura timxi mar-rekwiżiti meħtieġa?
Għandek taqsam il-proċess għat-tindif f'5 passi, il-gwida għat-tindif u r-riżorsi l-oħra taċ-Ċentru tar-Riżorsi mal-persuna li qed tnaddaflek il-post tiegħek—u ara li taqbel li timxi ma' dawk l-istandards. Jeħtieġlek taqbel ma' kull pass f'isem il-persuna li qed tnaddaflek il-post tiegħek u tieħu r-responsabbiltà li din qed timxi mal-passi meħtieġa.

Hemm bżonn ta' lqugħ bejn il-bookings jekk nimpenja ruħi li nimxi mal-proċess għat-tindif imtejjeb f'5 passi?
Jekk jogħġbok żomm f'moħħok li meta timpenja ruħek li timxi mal-proċess għat-tindif f'5 passi, tkun qed taqbel ukoll li timxi skont il-liġijiet tal-post fejn jinsab il-listing. Dan jinkludi li timxi ma' kull waħda mil-linji gwida tas-sigurtà u tat-tindif l-oħra maħruġa mill-aġenzija tal-gvern responsabbli mill-post fejn jinsab il-listing tiegħek, bħal pereżempju kemm għandek tistenna qabel tidħol fi spazju. Pereżempju ċ-Ċentri tal-Kontroll u l-Prevenzjoni tal-Mard Amerikana (CDC) tissuġġerixxi li tistenna għall-itwal ħin possibbli (mill-inqas ftit sigħat) wara li l-klijent joħroġ mill-post. Jekk tixtieq toħloq ilqugħ bejn il-bookings, tista' tagħmel hekk mis-settings tiegħek. Meta tħalli iktar ħin bejn iż-żjarat mhux biss inaqqas ir-riskju ta' kuntatt mal-mikrobi—imma jtik ukoll iktar ħin wara biex tnaddaf, tissanitizza u tħejji l-ispazju tiegħek bejn klijent u ieħor.

Jien norganizza Esperjenza ta' Airbnb. Għandkom xi rekwiżiti għat-tindif għalija wkoll?
Iva. Jekk tilqa' n-nies f'pajjiż jew reġjun fejn reġgħu bdew l-esperjenzi wiċċ imb wiċċ, ħloqna sett ta' linji gwida għat-tindif u suġġerimenti u rekwiżiti għas-saħħa u s-sigurtà apposta għalik.

Minbarra r-rekwiżiti, għandkom xi linji gwida oħra dwar kif tilqa' n-nies u tivvjaġġa matul il-pandemija tal-COVID-19?
Minbarra r-regoli tas-sigurtà għall-COVID-19, dawn huma passi oħra li l-Hosts u l-klijenti għandhom jieħdu meta jilqgħu n-nies u jivvjaġġaw matul dan iż-żmien:

• Ara li taħsel idejk ta' spiss u evita li tmiss wiċċek
• Tivvjaġġax u tilqax nies jekk kont qrib xi ħadd marid bil-COVID-19 jew jekk għandek xi sintomi tal-COVID-19
• Għal iktar informazzjoni, jekk jogħġbok aqra l-linji gwida tas-saħħa u s-sigurtà għall-Hosts u għall-klijenti, u ara li timxi mar-rekwiżiti li obbligat/a timxi magħhom fil-post fejn jinsab il-listing

Kif nista' nżomm ruħi aġġornat/a dwar il-liġijiet u l-linji gwida tal-post fejn jinsab il-listing?
Is-sitwazzjoni qed tkompli tevolv, u ċerti regoli u rakkomandazzjonijiet (bħal kemm għandek tistenna qabel tidħol fi spazju) jistgħu jvarjaw skont fejn qed tilqa' n-nies. Jekk jogħġbok immarka l-artiklu taċ-Ċentru tal-Għajnuna tagħna għal aktar informazzjoni dwar il-liġijiet u l-linji gwida tat-tindif fir-reġjun tiegħek. Tista' terġa' taqra wkoll din il-paġna tar-riżorsi għall-aħħar avviżi dwar l-ivvjaġġar, ir-restrizzjonijiet u għal gwida dwar il-maskri u t-tbegħid soċjali fiż-żona fejn jinsab il-listing tiegħek.

Nisperaw li dar-riżorsi jkunulek ta' għajnuna int u tqis x'tista' tirranġa fir-rutina tat-tindif tiegħek. Napprezzaw kemm il-Hosts qed jagħtu kas li jiżguraw is-sigurtà u l-kumdità tal-klijenti f'dan iż-żmien diffiċli.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.

*Ħlief għall-Hosts li joffru l-akkomodazzjonijiet ġewwa ċ-Ċina kontinentali. Sir af aktar