Pariri dwar it-tindif mingħand Hosts b'esperjenza

Post nadif jista' jwassal għal reviews tajbin ħafna. Min-naħa l-oħra, in-nuqqas ta' ndafa hija waħda mir-raġunijiet ewlenin għal reviews ħżiena skont id-dejta ta' Airbnb. Ipprova dal-pariri li tawna Hosts b'esperjenza fuq kif iżżomm il-post tiegħek nadif tazza.

Kemm jekk qed tnaddaf int kif ukoll jekk qed tqabbad lil xi ħadd biex jgħinek, importanti ħafna li l-ispazju tiegħek ikun nadif tazza bejn kull żjara u oħra.

"Importanti li jkollok checklist għall-klijenti biex ix-xogħol isir dejjem kif suppost," tgħid Juliette, membru tal-Bord Konsultattiv tal-Hosts ġewwa Nairobi, il-Kenja. "Checklist tgħinhom jidraw il-proċess. It-tindif li jsir kif suppost jagħmel differenza kbira."

Jekk tqabbad lil xi ħadd jgħinek tnaddaf, l-ewwel agħmel it-tindifa int biex tifhem eżatt x'jeħtieġ li jsir u x'għandek iżżid maċ-checklist. Ara li tħalli biżżejjed ħin bejn booking u ieħor biex tagħmel biċċa xogħol sew. Inkella tista' tqabbad żewġ persuni jnaddfu jew tifhem x'għandek tagħmel f'każ li min inaddaflek il-post ma jkunx jista' jgħinek xi darba minnhom.

Int u tnaddaf għall-klijenti jeħtieġlek toqgħod iktar attent/a minn meta tkun qed tnaddaf għalik. Nissuġġerulek tagħmel tindifa fil-fond kull tant żmien biex ix-xogħol ta' tindif bejn booking u ieħor ikun eħfef u jieħu inqas ħin.

Juliette tinsisti kemm hu importanti li tiffoka fuq ċerti żoni int u tnaddaf.

• Ibda miż-żoni li l-iktar jintużaw. "Il-kċina u l-kmamar tal-banju importanti ħafna għax huma l-iktar spazji li jintużaw," tgħid Juliette. Wara li l-kmamar tal-banju jkunu nodfa tazza, min jgħinha tnaddaf jgħaddi għall-kċina u biex jaħsel il-platti kollha. "Nagħmlu tindifa fil-fond," tgħidilna.
• Imbagħad ikun imiss il-kmamar tas-sodda. Min jgħinha tnaddaf jiftaħ il-kxaxen kollha u jħares taħt is-sodod biex jiżgura li l-klijenti ta' qabel ma jkunu nsew xejn warajhom. "Imbagħad niftħu t-twieqi u naħslu l-bjankerija kollha," tgħidilna.
• U fl-aħħar induru għas-sodod. Dan x'tagħmel Juliette għas-sodod. "Is-saqqijiet u l-imħaded ikunu mgħottija bi bjankerija apposta biex tħarishom u aħna nibdlu s-sett kollu," tgħidilna.

Aħseb bħal klijent. Tammi, Host ġewwa Seattle tgħidilna li pereżempju, "Il-purtiera tad-doċċa spiss tintesa. Għandi purtiera tal-plastik u bejn żjara u oħra dejjem nisprejjaha u nimsaħha. Nibdilha wkoll madwar darba kull xahar jew xahrejn."

Lanqas m'għandek tinsa' dawk l-affarijiet li jintmissu ta' sikwit bħall-iswiċċijiet tad-dawl. "Dawk jistgħu jitħammġu ħafna u lanqas biss tinduna bihom għax tkun drajthom," jgħid Adam, Host ġewwa Atlanta. "Malajr tnaddafhom bi ftit spirtu."

L-ebda klijent ma jieħu gost isib ix-xagħar ta' ħaddieħor fl-ispazju li jikri. Sue u John, Hosts ġewwa Salt Lake City għandhom parir fuq kif tara li ma tħallix xagħar fil-post: "Wara li naħslu l-lożor kollha, nużaw romblu għal kontra t-tnietex fuq il-lożor, l-investi u l-kutri".

Laura, Hosts ġewwa Cottonwood, Arizona tissuġġerixxi li ma tużax mopp. "Inżel għarkupptejk u aħsel l-art tal-kamra tal-banju bi xkupilja u ċarruta tal-mikrofibra," tgħidilna. "Ix-xogħol ikun eħfef, isir iktar malajr u b'hekk ma tħallix xagħar." Tinsiex tnaddaf is-serpentini tal-kamra tal-banju bejn żjara u oħra.

Hawnhekk għandek ftit ideat mingħand Hosts b'esperjenza:

• Ibda billi tħaddem il-magna tal-ħasil. "L-ewwel ħaġa li nagħmel hija li niġbor il-lożor u x-xugamani kollha u naħsilhom bil-magna tal-ħasil biex jilħqu jinħaslu sakemm inkun qed innaddaf," tgħidilna Emma-Kate minn San Francisco. "Hekk taħli inqas ħin."
• Illostra l-art tal-injam. "L-art tiegħi tal-injam. Nillostraha ta' sikwit biex meta l-klijenti jidħlu fil-post, isibu art sabiħa," tgħid Tammi minn Seattle. "Min jaraha mill-ewwel jifhem li l-post huwa nadif."
• Itfi t-tarf tat-toilet paper. "Dejjem nara li nitwi t-tarf tat-toilet paper," tgħid Emma-Kate. "Hija xi ħaġa żgħira imma l-klijenti jħossu li l-post tħejja għalihom u li jimpurtak minnhom."
• Erġa' imla l-bottijiet tas-sapun u tax-xampù. "Dejjem isbaħ meta l-kumditajiet tal-kamra tal-banju jinħassu li huma ġodda," jgħid Alex minn San Francisco. "Meta l-klijenti jsibu bott mimli u magħluq, iħossu li huma l-ewwel nies li se jużawh."