Kif tibni l-istorja tiegħek

Is-Superhosts Tereasa u David jafu x'saħħa għandhom l-istejjer. Bħala ġenituri, konservazzjonisti, diretturi kreattivi, kittieba u sidien ta' Camp Wandawega ġewwa Elkhorn, Wisconsin, huma tgħallmu kif jużaw l-istejjer biex jibnu rabta man-nies. "Hekk kif bdejna niskopru u nippubblikaw l-istorja tal-post—post fejn kien jinbiegħ l-alkoħol illegali fis-snin 20, post fejn jiltaqgħu l-mafjużi, burdell, post għall-vaganzi tas-sajf għar-refuġjati tal-komunità Latvjana kif ukoll l-istorja tagħna ġewwa dal-post—innutajna li dawn l-istejjer kienu jogħġbu ħafna lill-pubbliku," tgħid Tereasa.

Hawnhekk se jaqsmu ftit pariri fuq kif issib u tirrakkonta l-istorja tad-dar tiegħek.

Tereasa: "Anke jekk l-ispazju tiegħek mhux post fejn kien jinbiegħ l-alkoħol illegalment xi mitt sena ilu, xorta tista' ssib storja x'tirrakkonta. Biex issib l-istorja tal-post tiegħek, ibda billi tistaqsi:

• X'inhi l-istorja tad-dar tiegħek?
• X'esperjenzi toffri lill-klijenti l-belt tiegħek (li ma jistgħu jsibu mkien iktar)?
• X'inhuma dawk l-affarijiet interessanti li forsi s-soltu lanqas biss tagħti kashom?

Aħseb u fittex ftit u semmi dik l-informazzjoni fil-listing tiegħek."

David: "Minbarra l-kmamar tas-sodda u l-kmamar tal-banju, hemm ħafna iktar affarijiet li tista' ssemmi fil-listing tiegħek. In-nies jixtiequ jkunu jafu minn fejn jistgħu jixtru kikkra kafè tajba, jixtiequ jkunu jafu liema huma l-postijiet li tħobb iżżur—għalhekk aqsam magħhom dak li jagħmel l-esperjenza fil-post tiegħek tant unika. Il-klijenti qed ifittxu li jibnu rabta u l-istejjer huma għodda tajba biex tmissilhom qalbhom u tqarribhom lejk."

David: "Wara l-ewwel ftit bookings bdejna nifhmu kemm hu importanti li l-klijenti jkunu jafu eżatt x'għandhom jistennew biex ma jisfawx diżappuntati. Allura ħloqna d-"Dikjarazzjoni tal-Aspettattivi Baxxi" tagħna. Mod divertenti ta' kif nispjegaw lill-klijenti l-istil ta' ħajja rurali tal-ispazju tagħna. Dal-manifest jispjega lin-nies x'għandhom jistennew—ġeneralment ħafna insetti fitti, ħlejjaq tal-bosk u nuqqas ta' arja kkundizzjonata—għalhekk jekk qed tfittex lożor Eġizzjani u l-lussu tal-ħajja moderna, dal-post wisq probabbli ma jgħoddx għalik."

Tereasa: "Aħna nemmnu fl-onestà. U l-kliem li nużaw biex niddeskrivu l-ispazju tagħna huwa xhieda ta' dan. Iddeċidejna li nkunu ġenwini man-nies. Nużaw ton umoruż imma fl-istess waqt totalment ġenwin. Nitkellmu b'mod tant esaġerat li tista' ssejjaħlu komiku u naħseb li dil-ħaġa turi lill-klijenti li aħna simpatiċi. M'għandekx għalfejn tkun taf iżżewwaq il-kliem biex tkun qrib tal-klijenti—biżżejjed li tiddeskrivi l-post tiegħek b'mod sempliċi."

David: "Jien u nqalleb Airbnb, nieħu gost nara l-personalità tal-Host fil-mod ta' kif jiddeskrivi l-post tiegħu. Nixtieq inkun naf li għandek sens tal-umoriżmu u li int persuna ma' min nista' nqatta' l-ħin—iktar u iktar jekk se nkun qed naqsam l-ispazju miegħek. Tippruvax tpinġi kollox ward u żahar. Tippruvax tgħid li int l-aqwa fid-dinja f'xi ħaġa. Is-simpatija u l-onestà huma l-iktar affarijiet importanti għax in-nies iridu jħossuhom komdi meta jibbukkjaw il-post tiegħek."

Tereasa: "Biex tħajjar iktar nies jibbukkjaw il-post tiegħek, tella' u ħu ħsieb id-dar tiegħek fuq il-midja soċjali. Infatti ħafna nies jiltaqgħu magħna fuq il-midja soċjali. Isibu r-ritratti tagħna fuq Instagram—għodda tajba ħafna biex tibni udjenza u ttihom ħjiel tal-esperjenzi li jistgħu jgħixu meta jibbukkjaw il-post tagħna. Ftit pariri:

• Ipprova aqsam dawk il-mumenti tal-ħajja li n-nies se jkunu jixtiequ jgħixu. Uri ktieb fejn is-sodda, kikkra kafè bil-fwar tiela' minnha quddiem tieqa li tagħti fuq veduta sabiħa—aqsam ritratti ta' dat-tip.
• L-istil u l-kwalità tar-ritratti huma importanti ħafna biex tirrakkonta l-istorja tiegħek. Irrakkonta storja sabiħa li tiġbdek!"

David: "Ma temminnix jekk ngħidlek imma ħafna nies li jżuru Wandawega, l-ewwel ħaġa li jkunu jixtiequ jagħmlu hija li jieħdu r-ritratt tagħhom bħal xi ritratt li jkunu raw fuq Instagram. Instagram isir album tat-tifkiriet—u mod kif taqsam l-ispazju tiegħek mal-pubbliku. Ħafna drabi jaf ikun ir-raġuni għaliex in-nies ibbukkjaw il-post tiegħek."

David: "Fil-bidu għamilna ħafna żbalji. Iżda tgħallimna ma naqtgħux qalbna għax il-ħajja rari tiġik kif tkun qed tistenna. Pereżempju, fejn jidħlu l-istejjer indunajna li m'għandniex naqsmu wisq dettalji. Għalkemm in-nies jieħdu gost jisimgħu dwar il-burdelli, il-mafja u l-qtil, normalment ma jixtiqux ikunu jafu fejn kienu qed isiru dal-affarijiet—iktar u iktar jekk ikollhom jorqdu hemm. Maż-żmien tinduna x'japprezzaw, x'ma japprezzawx u x'iridu jkunu jafu dwaru n-nies."

Tereasa: "Għalina l-fatt li ma naqtgħux qalbna jfisser li nqisu kull xkiel bħala opportunità biex nikbru. Hekk biss titgħallem."

Tereasa: "Meta bdejna l-avventura tagħna kien hemm żmien fejn kelli biża' kbir li naqsam ir-ritratti ta' kif kien il-post qabel. Ħsibt li ħadd ma kien se jibbukkja magħna għax ir-ritratti kienu juru post fi stat ħażin ħafna. Iżda r-ritratti ta' kif kien il-post qabel u kif inhu issa kienu wħud mill-iktar ritratti popolari."

David: "In-nies japprezzaw l-onestà. Iridu jifhmu kif jaħdmu l-affarijiet. Nerġa' nirrepeti, qed ifittxu rabta personali għalhekk tiddejjaqx taqsam magħhom partijiet mill-avventura tiegħek bħala Host. Sakemm tkun dejjem onest/a, tiddejjaqx taqsam l-istorja tiegħek magħhom."

Sir af iktar dwar kif issir Host