Żejjen il-post tiegħek b'mod li jolqot il-klijenti

Meta l-klijenti jidħlu f'The Beach Lodge ġewwa Hollywood Beach, California, ma jistgħux ma jifhmux mill-ewwel x'tip ta' persuna hi Tiffany Caliva-Talledo. L-attenzjoni għad-dettall u l-imħabba għad-disinn jispikkaw fil-mod ta' kif iżżejjen il-post tagħha⁠—fil-kuluri, fil-materjal u fl-istil personali tagħha. Billi kienet taħdem bħala direttur kreattiv, minn dejjem kienet toqgħod attenta għad-dettalji. Hawn taqsam is-sigrieti tagħha taf kif tirnexxi fuq Airbnb.

"Qabel irranġajna The Beach Lodge, il-post kien dar fi stat ħażin miżbugħa b'kulur aħdar ikrah. Kienet magħrufa bħala 'Dar id-Droga' u n-nies kienu jħaffu l-pass huma u għaddejjin minn quddiemha. Il-ġirien ħasbu li konna qed niġġennu meta xtrajniha imma jien ħassejt li did-dar kellha xi ħaġa speċjali—u dejjem emmint li meta nirranġawha, in-nies se jiġu joqogħdu fiha. Għamilt ħilti kollha biex irranġajtha—u naħseb li l-klijenti jerġgħu jibbukkjawha għax raw l-imħabba li biha ħdimt fuq id-dar."

Oħloq atmosfera
"Biex toffri esperjenza mill-aqwa, dejjem għandek tibda billi toħloq l-atmosfera addattata. Il-parir tiegħi lill-klijenti hu li meta jibdew ifasslu spazju, jibdew mill-emozzjoni u mhux mit-tema. Kif tixtieq li jħossuhom il-klijenti meta jidħlu ġewwa darek—komdi, ferħana, kalmi? Għal The Beach Lodge, minflok iffukajt fuq it-tema tal-baħar, ħsibt fil-kuluri, il-materjal u d-disinn: disinn magħmul minn kuluri delikati u arjużi, materjal li jfakkrek fir-ramel u ħafna xtieli meta tkun ġewwa l-post tħossok qisek tinsab fuq barra."

Fassal b'baġit f'moħħok
"M'għandekx għalfejn tonfoq ġidek kollu meta tiġi biex iżżejjen il-post tiegħek! Fis-swieq u l-ħwienet li jbiegħu bl-irħis kapaċi ssib oġġetti uniċi bi prezz tajjeb ħafna li jagħtu l-impressjoni li hemm storja sabiħa warajhom. Kulma jeħtieġlek tagħmel huwa li tqatta' ftit ħin tfittex. Jien inħobb infittex l-iktar dawk l-affarijiet li għandhom rabta mal-kultura Filippina u Asjatika, il-kultura tal-antenati tiegħi. L-oġġetti li tagħżel għall-ispazju tiegħek għandhom ikollhom tifsira biex b'hekk jgħinuk tirrakkonta l-istorja tad-dar tiegħek."

Esperimenta
"Parir ieħor li nagħti lill-klijenti tiegħi huwa li m'għandhomx jiddejqu jesperimentaw. Ibdel it-tiżjin. Ipprova affarijiet ġodda. Agħmel ftit bidliet kull staġun. Dan l-aħjar mod kif issib dak li jgħodd għall-każ tiegħek u dak li le. Għandek tqis l-ispazju tiegħek daqslikieku kien persuna tad-demm u l-laħam b'karattru uniku. Għandu jkun kapaċi jinbidel u jevolvi biex—bħalek—dejjem jaddatta għas-sitwazzjoni li jkun jinsab fiha."

Oħloq esperjenzi żgħar oħra fil-post tiegħek
"Inħobb ħafna nesperimenta bl-ispazju u bid-disinn b'modi mhux tas-soltu. Wieħed mill-pariri li nagħti huwa li toħloq esperjenzi żgħar oħra madwar id-dar tiegħek—ftit irkejjen fejn il-klijenti jistgħu jinqatgħu ftit għalihom u jaqraw ktieb. Ħalli ftit kutri, cushions u xi pittura f'dawn l-irkejjen biex tistieden lill-klijenti jqattgħu l-ħin fihom. Aħseb ftit fejn tista' toħloq dat-tip ta' rkejjen madwar l-ispazju tiegħek."

Ippersonalizza l-esperjenza
"Meta tkun tista', ipprova ppersonalizza ż-żjara tal-klijenti bi ftit affarijiet żgħar li jagħmlu differenza kbira. Jekk pereżempju xi ħadd isemmi li se jkun hemm festin ta' għeluq is-snin ta' xi ħadd, nipprova nħallilhom ftit pastini li nixtri mingħand id-dulċiera tal-post. Jekk jgħiduli li għandhom dieta vegana, inħallilhom lista' ta' ristoranti tal-post addattati għalihom. Jekk il-klijenti jkunu familja bit-tfal, nibdel il-lożor u l-imħaded għal lożor u mħaded b'materjal li jiflaħ iktar. Dawn l-affarijiet żgħar jagħmlu differenza kbira għall-klijenti. L-effett tagħhom se tarah fir-reviews li jiktbulek u fiż-żjarat li jerġgħu jibbukkjaw fil-listing tiegħek."

Agħtihom xi ħaġa li jistgħu jieħdu lura d-dar magħhom
"Nissuġġerixxi li tagħti lill-klijenti xi tifkira jew rigal żgħar biex iħossuhom speċjali u milqugħa mal-wasla tagħhom⁠—xi ħaġa bħal gift cards għan-negozji fil-qrib jew kartolini maħduma mill-artisti tal-post."

"Barra minn hekk, il-klijenti jistgħu jixtru l-affarijiet minn The Beach Lodge direttament jew mill-ħanut fuq l-internet li ħloqt. Fost l-affarijiet għall-bejgħ hemm ġagagi tal-banju u bjankerija tas-sodda li nħadmu b'mod li jħares l-ambjent u oġġetti vintage. Qed inbiegħ ukoll prodotti ta' ditti tal-post li s-sidien tagħhom huma nisa, xi ħaġa li nemmen ħafna fiha. Ma naqla' xejn minn fuqhom. L-importanti għalija huwa li n-nies isiru jafu b'dawn id-ditti. Nemmen li l-post tiegħi għandu jkun iktar minn post għall-vaganzi biss."

Ara li l-klijenti jkollhom x'jagħmlu fil-post
"Semmejna d-dar tagħna The Beach Lodge għax nemmnu li hija post li jilqgħek fejn in-nies jistgħu jinġabru flimkien. Fid-dar issib logħob tal-mejda, tapiti tal-yoga, materjal artistiku, BBQ, xugamani tal-baħar, roti, record player u ħafna u ħafna kotba. Vjaġġ huwa xi ħaġa li jgħinek tiftaħ moħħok u dawn l-attivitajiet jistgħu jgħinu lill-klijenti mhux biss jieħdu gost imma jiskopru wkoll xi ħaġa ġdida. Aħseb ftit dwar dawk il-kumditajiet li jistgħu jgħinu biex il-klijenti jkollhom esperjenza aħjar."

Żomm dejjem f'moħħok li huma affarijiet żgħar hekk li jagħmlu differenza kbira! Grazzi għal dad-dettalji żgħar, il-klijenti żgur se jindunaw bl-imħabba li biha ħdimt fuq l-ispazju tiegħek—u b'hekk iżżid iċ-ċans li iktar 'il quddiem jerġgħu jibbukkjaw il-post tiegħek.

Sir af iktar dwar kif issir Host