Dawn huma l-Hosts ġewwa Florida li laqgħu lin-nies li kienu qed jaħarbu mill-uragan

Open Homes issa sar Airbnb.org

Il-programm Open Homes ta' Airbnb issa sar Airbnb.org, għaqda mingħajr skop ta' qligħ 501(c)(3) ġdida fjamanta. Grazzi talli bnejt il-komunità ta' Open Homes magħna. Ninsabu ħerqana li se tingħaqad magħna għal dal-kapitlu l-ġdid.

Meta Jason u Karen spiċċaw mifruda matul l-Uragan Michael, il-Hosts ta' Open Homes Bob u Juan għenuhom biex il-familja tagħhom terġa' tingħaqad.

F'Ottubru tal-2018, wara li maltempata tropikali nbidlet f'uragan ta' Kategorija-5 fuq il-Florida Panhandle, Jason u Karen ġabru lil uliedhom biex jaħarbu lejn Orlando.

"Peress li minn Florida, aħna drajnihom lill-uragani," jgħix Jason, li l-familja tiegħu tgħix ġewwa Fort Walton Beach, madwar ħames kilometri bogħod mill-kosta. "Ma tantx nagħtu kashom sakemm ma jkunux uragani ta' Kategorija 3 jew Kategorija 4. Biss meta dal-uragan laħaq Kategorija 5 ma domniex naħsbuha. Għażilna li naħarbu."

"Għalqu l-iskejjel għal jumejn, xi ħaġa mhux tas-soltu," tgħid Karen, għalliema tad-drama fi skola sekondarja tal-post. "Dak il-ħin fhimna kemm kienet serja l-ħaġa. U xtaqna nkunu flimkien, ma jmurx tiġri xi ħaġa katastrofika."

L-Uragan Michael miss l-art fil-qalba ta' Florida b'irjieħ ta' iktar minn 240km/siegħa. L-Uragan qala' l-bjut, għarraq it-toroq bl-ilma tal-baħar, qala' l-arbli tad-dawl u qiegħed ħafna viċinati fil-periklu. Dak iż-żmien, Jason safa' mwaħħal 10 sigħat 'il bogħod fuq vjaġġ tax-xogħol filwaqt li Karen kienet id-dar maż-żewġ subien tagħhom. Il-familja malajr fehmet li x-xelters tal-qrib kienu mimlija u l-lukandi kienu għaljin wisq.

"Iċċekkjajt l-apps tal-lukandi li kelli u sibt li l-lukandi kienu qed jimtlew malajr u l-prezzijiet kienu qed jogħlew mogħla s-sema u għalhekk ftaħt l-app ta' Airbnb tiegħi," jgħid Jason. "Kieku llum bħala parti mill-pjan tagħna biex naħarbu żgur niċċekkjaw Airbnb qabel niċċekkjaw il-lukandi. Meta t-tempesta tasal, m'għandekx għalfejn tispiċċa fit-triq int u tipprova taħrab. Iktar ma tistenna, iktar ikun hemm nies qed jippruvaw jaħarbu."

Fetaħ l-app ta' Airbnb fuq il-mowbajl tiegħu u telgħet notifika tistaqsih jekk hu jew familtu ntlaqtux mill-uragan. Kien hemm li sar jaf b'Open Homes, programm li jsib postijiet fejn toqgħod bla ħlas għan-nies milquta mid-diżastri. Id-dar li sab—post bi tlett ikmamar tas-sodda u tlett ikmamar tal-banju—stajt tasal għaliha bil-karozza u kienet f'post fejn il-familja reġgħet setgħet tiltaqa'.

Jason u Karen iltaqgħu fil-post fejn toqgħod ta' Airbnb tagħhom fil-qalba ta' Florida, eżatt fin-nofsinhar ta' Orlando—post popolari ħafna minħabba li jinsab qrib Disney World. Id-dar kellha atmosfera rilassanti bi stil ta' post ħdejn il-baħar, għamara lewn il-ħaġar prezzjuż u ħitan bi lwien ferrieħa.

Il-koppja Bob u Juan fetħu darhom għall-ewwel darba fl-2016 u minn dak iż-żmien 'l hawn laqgħu ħafna familji milquta mill-Uragani Irma u Michael. Il-koppja ilha flimkien għal iktar minn għaxar snin u miżżewġa għal seba' snin; Bob irtirat u jieħu ħsieb il-propjetajiet u Juan dal-aħħar fetaħ negozju fil-qasam tal-vjaġġi għan-nies LGBT iffukat fuq l-Ekwador. Sal-lum laqgħu iktar minn 2,000 ruħ minn iktar minn 35 pajjiż.

"Malli wasalna hemm ħassejtni li qiegħda fit-tieni dar tiegħi," qalet Karen. "Ovvjament kulħadd kien inkwetat dwar id-dar tagħna imma għallinqas dil-ħaġa għenitna nnaqqsu ftit mill-inkwiet. Il-pixxina kienet sorpriża sabiħa."

Għal tliet iljieli sakemm il-maltempata kompliet titqawwa, il-familja strieħet, ġiet f'tagħha u żammet għajnejha fuq l-aħbarijiet. "Kellna stress kbir fuqna imma ħassejna li xi ħadd kien qed jieħu ħsiebna," jgħid Jason. "U dan kollu grazzi għal app."

Minkejja li Bob u Juan kienu d-dar ġewwa Fort Lauderdale, xorta setgħu jagħtu sehemhom mill-bogħod. Juan kien f'kuntatt mill-qrib ma' Jason u ta' sikwit staqsieh kif kienu qed iħossuhom hu u familtu. "Xorta tinkwieta għan-nies li tilqa' ġewwa darek," jgħid Bob, "anki jekk taf li darek qed toffrilhom kenn minn sitwazzjonijiet agħar, xorta tittama li ma jiġrilhom xejn."

Is-soltu Jason u Karen jaħsbu għall-istaġun tal-urgani billi jaħżnu biżżejjed ikel li ma jeħżienx malajr u jimlew il-banju tagħhom bis-silġ u bl-ilma. "Jekk toqgħod tistenna sa dakinhar meta kulħadd imur jixtri, se ssib l-ixkafef vojta," tgħid Karen. "Lilna ssibilna l-batteriji, t-torċijiet u ċ-ċarġers tal-idejn għall-mowbajls tagħna biex inkunu preparati f'każ li jinqata' d-dawl."

Juan u Bob ħejjew ruħhom biex jilqgħu lill-familja ta' Jason u Karen bl-istess mod li kieku kienu jilqgħu lil kull klijent ieħor ta' Airbnb. "Meta nkunu qed nivvjaġġaw, ilkoll kemm aħna nixtiequ nsibu post fejn nistgħu nħossuna komdi," jgħid Juan, juri li din is-sitwazzjoni ma kienet bl-ebda mod differenti. "Post nadif, li fih tħossok milqugħ u li jkun sigur."

Meta Jason u Karen marru lura lejn darhom iktar tard dik il-ġimgħa, ma sabux ħsara kbira, iżda ħafna mill-membri tal-komunità tagħhom ma kinux daqshekk ixxurtjati. "Se ndumu s-snin biex nerġgħu niġu fuq saqajna u nibnu mill-ġdid," qalilna Jason. "L-aħbarijiet ma jsemmuhx iktar, iżda għad hemm nies li d-djar tagħhom għadhom imwaqqa' u qed jgħixu fi bliet tat-tined ġewwa Panama City." Mill-inqas 36 persuna mietu minħabba l-Uragan Michael, l-iktar uragan qerriedi fir-reġjun mill-1992.

"Il-fatt li tgħin lil ħaddieħor mingħajr ma tistenna xejn lura jimlik b'ċertu sodisfazzjon," jgħid Juan. "Mhux l-ewwel darba li Jason offra li jħallas u aħna għednielu: M'hemmx għalfejn. Nafu li kellek tħalli darek u nixtiequ ħafna li ngħinuk."

"Kieku qatt kellna nkunu fis-sitwazzjoni tagħhom nafu li riesaq uragan lejna," jgħidilna, "tkun xi ħaġa sabiħa li nkunu nistgħu nserrħu moħħna li għandna post fejn noqogħdu grazzi għal Open Homes."

L-informazzjoni li tinsab f'dal-artiklu jaf laħqet inbidlet minn meta ġie ppubblikat.