Mur 'il quddiem biex taċċessa r-riżultati suġġeriti

    L-Aġġornament tas-Sajf ta' Airbnb: x'għandek tkun taf bħala Host

    Qed inżidu AirCover għall-klijenti u qed noħolqu modi ġodda kif il-klijenti jistgħu jsibu l-listings tiegħek.
    Minn Airbnb f'did-data: 11 ta’ Mej 2022
    Vidjow ta' 7 minuti
    Aġġornat f'did-data: 11 ta’ Mej 2022

    Punti ewlenin

    Messaġġ mingħand Brian Chesky, CEO u wieħed mill-Fundaturi ta' Airbnb

    Kull dar li tellajtu fuq Airbnb hija dar unika. Imma matul l-aħħar 25 sena, il-mod tradizzjonali ta' kif wieħed jibbukkja vjaġġ kien qed jagħmilha diffiċli li dad-djar jinstabu. Dan għaliex in-nies kienu jfittxu skont id-dati u l-post li jixtiequ jżuru u kienu jsibu biss ir-riżultati li jaqblu ma' dak li jkunu fittxew.

    Imma issa l-affarijiet se jaħdmu mod ieħor—qed nagħmluha eħfef minn qatt qabel li n-nies isibu d-djar tagħkom grazzi għall-Kategoriji ta' Airbnb. Minn issa 'l quddiem, meta l-klijenti jiftħu Airbnb se nibdew nuruhom minnufih iktar minn 50 kategorija li bejniethom jiġbru iktar minn 4 miljun dar u li juru għaliex il-propjetajiet tagħkom huma speċjali—fosthom l-istil u l-kumditajiet li joffru, il-post fejn jinsabu u l-attivitajiet li l-klijenti jistgħu jagħmlu fil-qrib bħal pereżempju logħba golf, surfing u skiing.

    Anke jekk il-klijenti jfittxu destinazzjoni partikolari, aħna se nuruhom kategoriji bi djar oħra li probabbli qatt ma kienu jsibu. Nemmnu li kull dar u kull Host jista' jkollhom kategorija li tgħodd għalihom u għalhekk maż-żmien se nkomplu nżidu mal-kategoriji tagħna. U mhux hekk biss.

    Minħabba li numru dejjem ikbar ta' nies qed jibbukkjaw żjarat itwal, xtaqna nagħtuhom iktar għażliet għal dal-vjaġġi. Għalhekk qed inniedu Żjarat Maqsumin, faċilità ġdida u innovattiva li ssib żewġt idjar li jaqblu u toffri li taqsam iż-żjara tal-klijent bejniethom. Dil-faċilità tista' twassal għal żieda ta' 40% fin-numru ta' drabi li l-klijenti isibu d-djar tagħkom meta jkunu qed ifittxu għal żjarat itwal. Qed noffru wkoll ħarsien lill-klijenti tagħkom kollha permezz ta' AirCover, programm li bdejna noffru lill-Hosts matul il-ħarifa li għaddiet.

    Grazzi għal dal-faċilitajiet kollha f'aġġornament wieħed, dal-aġġornament jista' jitqies bħala l-ikbar bidla li seħħet fuq Airbnb fl-aħħar 10 snin.

    —Brian Chesky

    Kategoriji ta' Airbnb

    Qed inniedu mod ġdid kif tfittex li jiffoka fuq il-Kategoriji ta' Airbnb. Huma u jqallbu Airbnb, il-klijenti se jintwerew iktar minn 56 kategorija magħmula minn djar miġbura flimkien skont l-istil uniku tagħhom, il-post fejn jinsabu u l-attivitajiet li hemm qrib tagħhom.

    Il-kategoriji jiġbru flimkien postijiet b'veduti jew disinn mill-isbaħ, propjetajiet fuq lag jew qrib park nazzjonali u djar li joffru aċċess għal bliet ikoniċi jew korsi tal-golf. Dawn huma biss ftit mill-kategoriji li bejniethom jiġbru fihom 4 miljun dar unika li intom il-Hosts tellajtu fuq il-pjattaforma tagħna.

    Meta l-klijenti jfittxu għal destinazzjoni partikolari, ir-riżultati tat-tiftix se jintwerew f'kategorija bl-isem "Id-Djar Kollha". Se nuruhom ukoll iktar kategoriji, skont il-post, biex b'hekk ikunu jistgħu jiskopru djar mill-isbaħ fiż-żona fejn jixtiequ jivvjaġġaw jew mad-dawra tagħha. U listing jista' jintwera wkoll f'iktar minn kategorija waħda. Għalhekk jekk għandek dar ġewwa Lake Tahoe mgħammra bi kċina ta' kok, minbarra fir-riżultati tat-tiftix għal Lake Tahoe, il-listing jista' jintwera fil-Kategorija Lag u fil-Kategorija Kċina ta' Kok.

    Il-benefiċċji huma ikbar għal dawk li għandhom listings f'postijiet li mhux daqshekk popolari mat-turisti. Il-kategoriji jagħmluha eħfef għall-klijenti li jsibu postijiet fejn toqgħod uniċi li ma kinux se jsibu waħidhom. Ejja nieħdu mużiċist fil-bidu tal-karriera tiegħu li jfittex fil-Kategorija Spazji Kreattivi—jista' jsib dar ġewwa Georgia li toffri studio tal-mużika mgħammar b'kollox.

    Il-kategoriji jistgħu wkoll jgħinu jispiraw lill-klijenti jżuru postijiet ġodda. Fl-imgħoddi, xi ħadd li qed jibbukkja vaganza ġewwa r-Renju Unit kien ifittex biss postijiet ġewwa Londra jew bliet oħra li forsi jkun diġà sema' bihom. Illum dik l-istess persuna tista' tfittex skont il-kategorija li tinteressaha u taf titħajjar tibbukkja post fejn toqgħod f'dar fil-Kampanja qrib Oxford jew f'Dar Ċkejkna qrib Manchester.

    Id-djar jiġu riveduti qabel jiżdiedu ma' kategorija partikolari. Miljuni ta' listings attivi fuq Airbnb jiġu studjati bl-intelliġenza artifiċjali li tqis l-isem, id-deskrizzjoni, il-captions tar-ritratti, id-dejta li jagħtuna l-Hosts u r-reviews.

    Dal-kategoriji l-ġodda huma biss il-bidu ta' dal-mod il-ġdid kif il-klijenti jistgħu jiskopru l-listings. Maż-żmien se noħolqu iktar kategoriji li juru l-faċilitajiet uniċi u l-postijiet speċjali tal-propjetajiet tal-Hosts.

    X'tista' tagħmel bħala Host:

    • Il-post ta' fejn jintwerew il-listings fir-riżultati tat-tiftix se jkompli jiddependi minn numru ta' fatturi fosthom il-kwalità, il-prezz, il-popolarità, il-bogħod mill-post li jkun qed ifittex il-klijent f'każ ta' tfittxijiet għal listings f'post partikolari u l-kwalità tar-ritratti. Għalhekk ara li l-listing tiegħek jagħti informazzjoni aġġornata, kompluta u preċiża.
    • Il-listings li għandhom ritratti marbuta ma' kategorija partikolari, u li nemmnu li kapaċi jħajru lill-klijenti jiskopru dik il-kategorija, ġeneralment jintwerew f'post aħjar f'dik il-kategorija. Ara li ttella' ritratti ta' kwalità għolja għal-listing tiegħek.
    • Enfasizza l-faċilitajiet uniċi tal-post tiegħek mis-settings tal-listing—pereżempju l-valur storiku jew id-disinn tiegħu.
    • Sir af iktar dwar il-kategoriji ta' Airbnb.

    Żjarat Maqsumin

    Billi iktar klijenti qed ifittxu żjarat itwal, jaf jiġri li xi postijiet ma jkunux disponibbli għat-tul tal-vjaġġ kollu.

    Għalhekk jekk il-listing tiegħek ma kienx disponibbli għat-tul tal-vjaġġ tal-klijent kollu, il-klijent ma kienx se jsibu. Biex insolvu dil-problema ħloqna Żjarat Maqsumin, faċilità ġdida u innovattiva li tħalli lill-klijenti jaqsmu vjaġġ bejn żewġt idjar—b'hekk il-klijenti jintwerew 40% iktar listings meta jfittxu għal żjara ta' 14-il lejl jew iktar*.

    Meta klijent ifittex għal vjaġġ ta' ġimgħa jew iktar, iż-Żjarat Maqsumin jintwerew awtomatikament fir-riżultati tat-tiftix. Il-klijent imbagħad se jkun jista' jagħżel bejn vjaġġ f'listing wieħed li jkun disponibbli għaż-żjara tiegħu kollha jew jagħżel li jaqsam il-vjaġġ bejn żewġ listings li jinsabu fl-istess destinazzjoni.

    Fl-imgħoddi jekk klijent kien qed ifittex għal żjara ta' xahar imma l-listing tiegħek kien disponibbli biss għal ġimagħtejn matul id-dati tiegħu, l-ispazju tiegħek ma kienx jintwera fir-riżultati tat-tiftix. Grazzi għal Żjarat Maqsumin, biex ngħinuk tikseb iktar klijenti, il-listing tiegħek jista' jintwera ma' listing ieħor biex flimkien ikunu disponibbli għad-dati kollha tal-vjaġġ tal-klijent.

    Għal kull Żjara Maqsuma nsibu mir-riżultati tat-tiftix żewġ propjetajiet tal-istess tip li jinsabu fl-istess żona u li joffru l-istess kumditajiet. Jekk pereżempju jkun hemm familja qed tfittex għal post b'faċilitajiet tal-aċċessibbiltà (bħal daħla mingħajr għetiebi u bibien wiesgħa), Żjarat Maqsumin turi żewġ listings li joffru dal-istess faċilitajiet.

    Meta ż-Żjarat Maqsumin jinfetħu fuq mappa, il-klijenti se jaraw linja animata bejn l-ewwel u t-tieni spazju biex mhux biss ikunu jafu kemm hemm bogħod bejn post u ieħor imma jkunu jafu wkoll f'liema postijiet se tibda u tintemm iż-żjara. Wara li klijent jagħżel Żjara Maqsuma, aħna se ngħinuh jibbukkja l-postijiet fejn toqgħod wieħed wieħed bi proċess ħafif—l-istess bħalma l-klijenti qed jibbukkjaw il-listings tiegħek bħalissa.

    X'tista' tagħmel bħala Host:

    • Il-listings se jkunu eliġibbli biex jintwerew bħala parti minn Żjara Maqsuma jekk ikunu disponibbli għal mill-inqas 3 iljieli wara xulxin għalhekk nissuġġerulek tirranġa d-disponibbiltà tal-kalendarju tiegħek.
    • Biex ikunu eliġibbli għal iktar Żjarat Maqsumin, nissuġġerixxu li tibdel l-itwal tul ta' żjara li taċċetta għal mill-inqas 7 iljieli.
    • Tagħmel tajjeb ukoll issemmi l-kumditajiet popolari li toffri għaż-żjarat itwal—wifi stabbli b'veloċità tajba ħafna, spazju għal ħidma fuq laptop u l-faċilitajiet tal-aċċessibbiltà.
    • Sir af iktar kif tista' tħajjar lill-klijenti li jixtiequ jibbukkjaw żjarat itwal jagħżlu l-listing tiegħek.

    AirCover—ħarsien għall-Hosts u l-klijenti kollha

    Airbnb mibnija fuq l-impenn tal-Hosts li joffru postijiet fejn toqgħod mill-aqwa għall-klijenti. Iktar ma jikber in-numru tal-klijenti li jiskopru postijiet ġodda fuq Airbnb, iktar nixtiequ nuruhom li jekk xi ħaġa tmur ħażin, int se taħdem magħhom biex issib soluzzjoni.

    Fil-każ rari li tinqala' xi problema barra l-kontroll tiegħek u ma tkunx tista' ssewwiha, Airbnb se tkun hemm biex tgħinek. Huwa għalhekk li qed noffru ħarsien ikbar għall-Hosts u l-klijenti kollha bħala parti minn AirCover. B'hekk se niżguraw li kulħadd ikun jista' jilqa' n-nies u jivvjaġġa b'moħħu mistrieħ fuq Airbnb.

    F'Novembru tal-2021 nedejna AirCover għall-Hosts—ħarsien komplut, bla ħlas għall-Hosts kollha u disponibbli biss fuq Airbnb. AirCover għall-Hosts joffri sa $1M USD f'Ħarsien mill-ħsara għall-Hosts u sa $1M USD f'Assigurazzjoni għar-responsabbiltà tal-Hosts.**

    Issa, jekk tinqala' problema serja matul żjara ta' klijent u ma tkunx tista' ssolviha, AirCover joffri 4 tipi ta' ħarsien lil kull klijent matul iż-żjara tiegħu:

    1. Garanzija għall-Ħarsien tal-Booking: Fil-każ rari li jkollok tikkanċella booking fi żmien 30 jum miċ-checkin, aħna se nsibu lill-klijent dar tal-istess livell jew aħjar minnha a spejjeż tagħna jew nagħtuh flusu lura.
    2. Garanzija taċ-Checkin: Jekk klijent ma jirnexxilux jagħmel iċ-checkin fil-post li jkun ibbukkja u ma jirnexxilekx issolvi l-problema—pereżempju l-klijent la jkun jista' jidħol fil-propjetà u lanqas ikun jista' jikkuntattjak—għat-tul taż-żjara oriġinali tiegħu se nsibulu dar tal-istess livell jew aħjar minnha a spejjeż tagħna jew nagħtuh flusu lura.
    3. Garanzija tal-Eżattezza tal-Booking: Jekk f'xi ħin matul iż-żjara tiegħu l-klijent jinduna li l-ispazju tiegħek mhux kif kien imwiegħed—pereżempju l-friġġ tieqaf taħdem u ma jirnexxilekx isewwiha malajr jew hemm inqas kmamar tas-sodda milli l-klijent kellu jsib—il-klijent se jkollu tlitt ijiem ċans biex jirrapporta l-problema u aħna se nsibulu dar tal-istess livell jew aħjar minnha a spejjeż tagħna jew nagħtuh flusu lura.
    4. Linja tas-Sigurtà 24 Siegħa Kuljum: Jekk klijent qatt iħoss li mhux sigur, se nagħtuh aċċess biex jaqbad malajr ma' aġenti tas-sigurtà mħarrġa apposta, lejl u nhar.

      Ikseb id-dettalji kollha ta' kif AirCover iħares il-booking ta' kull klijent u tal-eċċezzjonijiet marbutin miegħu.

      Kemm infakkruk li AirCover huwa inkluż dejjem u bla ħlas, kemm għalik kif ukoll għall-klijenti tiegħek. Huma disponibbli wkoll direttament mill-app u l-websajt ta' Airbnb biex b'hekk tkun eħfef għall-klijenti li jikkuntattjawk jew jiksbu l-għajnuna tal-Għajnuna tal-Komunità jekk jiġu bżonnha.

      X'tista' tagħmel bħala Host:

      • Kompli żomm kuntatt mal-klijenti tiegħek—int l-aħjar persuna biex tgħin lill-klijenti.
      • Sib it-tweġibiet għall-mistoqsijiet dwar AirCover għall-klijenti.
      • Jekk għadek m'għamiltx hekk, sir af iktar dwar il-benefiċċji li joffri AirCover għall-Hosts.

      *Skont dejta ta' prova interna li Airbnb kellha nhar l-14 ta' April 2022

      **Il-Ħarsien mill-ħsara għall-Hosts, l-Assigurazzjoni għar-responsabbiltà tal-Hosts u l-Assigurazzjoni għar-responsabbiltà tal-Esperjenzi la jħarsu lill-Hosts li jilqgħu n-nies permezz ta' Airbnb Travel, LLC u lanqas lill-Hosts ibbażati ġewwa ċ-Ċina kontinentali u l-Ġappun għax f'dal-każijiet dawn huma mħarsa mill-Polza għall-Ħarsien tal-Hosts taċ-Ċina, l-Assigurazzjoni tal-Hosts tal-Ġappun u l-Assigurazzjoni għall-Protezzjoni tal-Esperjenzi tal-Ġappun. Il-programm Ħarsien mill-ħsara għall-Hosts mhux marbut mal-Assigurazzjoni għar-responsabbiltà tal-Hosts. Żomm f'moħħok li l-limiti tal-ħarsien qed jintwerew kollha bil-munita USD u hemm regoli, kundizzjonijiet u esklużjonijiet oħra.

      L-informazzjoni li tinsab f'dal-artiklu jaf laħqet inbidlet minn meta ġie ppubblikat.

      Punti ewlenin

      Airbnb
      11 ta’ Mej 2022
      Dan kien ta' għajnuna għalik?