Pariri fuq kif tilqa' lill-klijenti bi ħtiġijiet tal-aċċessibbiltà
Bosta klijenti ta' Airbnb għandhom ħtiġijiet tal-aċċessibbiltà partikolari. In-nies b'mobbiltà limitata kultant jużaw il-bsaten jew is-siġġijiet tar-roti u għalhekk qabel jibbukkjaw ikunu jixtiequ jkunu jafu jekk il-post tiegħek jgħoddx għalihom.
Billi l-klijenti ta' sikwit jiffiltraw ir-riżultati tat-tiftix tagħhom skont il-faċilitajiet tal-aċċessibbiltà, l-ispazju tiegħek jista' jintwera f'iktar riżultati tat-tiftix meta ssemmi eżatt x'joffri—b'hekk tkun qed iżżid iċ-ċans li tikseb booking.
Airbnb issa għandha l-Kategorija Dħul mingħajr taraġ li turi spazji li kkonfermaw il-fatt li huma addattati għan-nies li jużaw siġġu tar-roti u li joffru mogħdijiet mingħajr ħġur għad-daħliet u għal mill-inqas kamra tas-sodda u kamra tal-banju waħda. Ara li żżid kull faċilità tal-aċċessibbiltà li hemm fil-listing tiegħek biex jekk il-post tiegħek jikkwalifika, jibda jintwera f'dil-kategorija l-ġdida.
Sophie Morgan—il-preżentatriċi tal-programmi tat-TV u l-attivista għan-nies b'diżabbiltà li tidher fil-vidjow t'hawn fuq—bdiet tilqa' n-nies fuq Airbnb għax xtaqet tiftaħ id-dar b'disinn speċjali tagħha għall-vjaġġaturi l-oħra bħalha. "Ħdimt ħafna biex għamilt dari aċċessibbli għalija," tgħidilna. "Naf li tista' tkun tajba għal ħafna nies oħra—l-iktar dawk b'xi diżabbiltà—u għalhekk nixtieq naqsamha mal-oħrajn."
Sophie tifhem li l-vjaġġi jistgħu jkunu iktar ibsin għan-nies bi ħtiġijiet tal-aċċessibbiltà imma xorta tipprova tegħleb dawk l-isfidi biex iddur id-dinja. "Ili fuq siġġu tar-roti għal dal-aħħar 19-il sena," tgħid. "Id-dinja ma ġietx imfassla għan-nies b'diżabbiltà imma b'daqshekk ma jfissirx li se naqta' qalbi milli nivvjaġġa."
Dawn huma xi linji gwida biex ngħinuk toħloq spazju li l-klijenti bi ħtiġijiet tal-aċċessibbiltà jistgħu jibbukkjaw b'moħħhom mistrieħ.
Żid il-faċilitajiet ta' aċċessibbiltà mal-listing tiegħek
Fost il-faċilitajiet li jistgħu jgħinu lill-postijiet tiegħek jispikka mal-klijenti hemm:
- Post tal-parkeġġ aċċessibbli
- Dawl mal-mogħdijiet li jagħtu għad-daħla
- Mogħdija għad-daħla għall-klijenti mingħajr għetiebi
- Daħla mingħajr għetiebi għall-klijenti
- Daħliet mingħajr għetiebi għall-kmamar
- Daħliet usa' minn 81 ċentimetru (32 pulzier)
- Doċċa mingħajr għetiebi
- Vireg biex iżżomm magħhom fid-doċċa u qrib it-toilet
- Siġġu tad-doċċa jew tal-banju
- Irfigħ imwaħħal mas-saqaf jew mobbli
- Irfigħ għall-pixxina
Sir af iktar dwar kif iżżid il-faċilitajiet tal-aċċessibbiltà mal-listing tiegħek
Uża r-ritratti biex turi l-aċċessibbiltà tal-ispazju tiegħek
Fil-vidjow t'hawn fuq, Sophie tissuġġerixxi li żżid "kemm jista' jkun ritratti" biex tgħin lin-nies b'diżabbiltà li jkunu qed jitħajru jibbukkjaw il-listing tiegħek jifhmu jekk il-post jgħoddx għalihom.
Biex niżguraw li l-listings huma addattati għall-klijenti bi bżonnijiet speċjali, nissuġġerixxu li l-Hosts iżidu l-captions mar-ritratti tagħhom. Tista' pereżempju tikteb caption taħt ritratt ta' kamra tal-banju b'vireg biex iżżomm magħhom biex tgħarraf lill-klijenti li hija l-unika kamra tal-banju aċċessibbli tad-dar.
Ħu ritratti minn irkejjen differenti biex tgħin lill-klijenti jifhmu jekk l-ispazju tiegħek jgħoddx għalihom jew le. Pereżempju żid ritratti li juru b'mod ċar fejn jinsab il-post tal-parkeġġ aċċessibbli fil-propjetà tiegħek.
Qabel tiżdied mal-listing tiegħek, kull faċilità tal-aċċessibbiltà tiġi riveduta biex niżguraw li r-ritratti tagħha huma skont il-linji gwida għar-ritratti ta' Airbnb. Jekk ir-ritratti tiegħek ma jurux sew dil-faċilità, nistgħu nitolbuk ittella' ritratti ġodda jew tneħħi l-faċilità mil-listing tiegħek.
Sir af iktar dwar kif tieħu r-ritratti tal-faċilitajiet tal-aċċessibbiltà
Kif tħejji għall-wasla tal-klijenti tiegħek
Jekk jiktiblek xi klijent bi ħtiġijiet tal-aċċessibbiltà, tagħmel tajjeb jekk tistaqsi ftit mistoqsijiet qabel jibbukkja biex b'hekk il-klijent ikun jista' jifhem jekk il-post tiegħek jgħoddx għalih.
Tista' pereżempju tistaqsihom:
- Għandek xi mistoqsijiet partikolari dwar l-ispazju?
- Hemm xi ħaġa li nista' nagħmel biex iż-żjara tiegħek tkun iktar komda?
Qabel jasal klijent bi ħtiġijiet tal-aċċessibbiltà, aħseb ftit dwar l-aħħar ftit bidliet żgħar li tista' tagħmel fl-ispazju tiegħek biex tkunlu eħfef li jmur minn post għal ieħor. Xi ftit ideat:
- Ċaqlaq l-għamara bħalma huma s-siġġijiet u l-imwejjed biex toħloq mogħdija usa' fil-postijiet li se jużaw il-klijenti
- Neħħi kemm jista' jkun xkiel għas-sockets tal-elettriku
- Qiegħed l-affarijiet tad-dar, bħal pereżempju l-platti u x-xugamani, f'postijiet li jistgħu jintlaħqu aħjar
Oħloq gwida tal-ivvjaġġar inklussiva u interessanti
Il-gwida tal-ivvjaġġar hija l-opportunità li taqsam mal-klijenti pariri dwar il-viċinat u tagħti xhieda tal-ospitalità tiegħek. Int u żżid is-suġġerimenti tiegħek għall-postijiet fejn jistgħu jieklu, għall-postijiet li jistgħu jżuru u għall-affarijiet li jistgħu jagħmlu fuq barra, ipprova idħol f'moħħ il-vjaġġatur bi ħtiġijiet tal-aċċessibbiltà.
Pereżempju nissuġġerulek li ssemmi jekk ristorant għandux rampa jew le, li ssemmi xi mogħdijiet għall-mixi li għandhom kisja tal-art lixxa u li taqsam mal-klijenti l-informazzjoni dwar it-trasport pubbliku. Meta tagħti dal-pariri tkun qed tagħmel l-ispazju tiegħek iktar interessanti għal numru ikbar ta' klijenti.