Kif jinħadmu r-rata tar-rispons u r-rata tal-aċċettazzjoni
Għal ħafna minnkom, il-hosting huwa importanti, imma għandkom ukoll ix-xogħol, il-familja u l-ħajja personali tagħkom li jżommukom okkupati ħafna. Għalhekk, probabbilment mhuwiex ta' prijorità għalikhom li toqogħdu attenti għal kemm qed twieġbu l-mistoqsijiet tal-klijenti malajr u li żżommu għajnejkom fuq il-perċentwali ta' talbiet għal bookings li qed taċċettaw vs. dawk li qed tirrifjutaw. Uħud minnkom staqsew dwar kif jinħadem eżatt dal-kalkolu, għaliex huwa importanti u kif tista' ttejjeb ir-riżultat mingħajr ħafna logħob—u aħna kuntenti ħafna li staqsejtuna! Ġbarnielkom it-tweġibiet mingħand in-nies li bnew dawn l-għodod għalhekk ejja naraw x'għandhom x'jgħidu.
X'inhi d-differenza bejn ir-rata tar-rispons u r-rata tal-aċċettazzjoni tiegħi?
- Ir-rata tar-rispons tiegħek tkejjel kemm twieġeb b'mod konsistenti fi żmien 24 siegħa għall-mistoqsijiet u t-talbiet għall-bookings tal-klijenti. Tista' ssib ir-rata tar-rispons tal-aħħar 365 jum tiegħek billi tagħfas fuq it-tab Kif sejjer u mbagħad tagħfas fuq Rekwiżiti Bażiċi.
- Ir-rata ta' aċċettazzjoni tiegħek iżżomm kont ta' kemm-il darba taċċetta jew tirrifjuta bookings. Il-mistoqsijiet tal-klijenti ma jitqisux meta tinħadem ir-rata ta' aċċettazzjoni tiegħek. Tista' tara r-rata ta' aċċettazzjoni tal-aħħar 365 jum tiegħek billi tagħfas fuq it-tab tal-Kif sejjer u mbagħad tagħfas fuq Rekwiżiti Bażiċi.
Għar-rata ta' rispons tiegħi, jgħoddu biss l-ewwel messaġġ/mistoqsija jew jgħoddu wkoll il-messaġġi kollha ta' wara f'konverżazzjoni?
Aħna nqisu biss tweġiba fi żmien 24 siegħa mill-ewwel messaġġ jew mistoqsija tal-klijent. Il-messaġġi ta' wara f'dik il-konverżazzjoni ma jaffettwawx ir-rata ta' rispons tiegħek.
Kif tintlaqat ir-rata ta' aċċettazzjoni tiegħi jekk inwieġeb mistoqsija minflok napprova, napprova minn qabel jew nirrifjuta talba għal booking?
It-tweġiba fil-qosor hi din: Jekk klijent jibgħatlek talba għal booking u inti twieġeb mistoqsija biss mingħajr ma tapprova jew tirrifjuta qabel jiskadi ż-żmien tat-talba, dan jitqies bħala rifjut.
Ejja nidħlu ftit iktar fid-dettall. Importanti li żżomm f'moħħok id-differenza bejn mistoqsija u booking. Mistoqsija hija biss messaġġ—forsi qed tiġi mitlub tiċċara xi ħaġa dwar il-kumditajiet, id-dati jew ir-Regoli tad-Dar. Il-klijent jista' jkun imħajjar joqgħod għandek u jista' anki jistaqsi xi ħaġa bħal: "Nixtieq nibbukkja d-dar tiegħek; nista' inġib il-kelb miegħi?" Din mhix talba għal booking. Hija mistoqsija. Tista' twieġeb mistoqsija billi tagħti tweġiba, approvazzjoni minn qabel jew tirrifjuta. Meta tirrifjuta mistoqsija tkun qed turi lill-klijent li l-ħtiġijiet tiegħu ma jaqblux mal-ispazju tiegħek u tkun qed tħeġġu jfittex listing ieħor. Iżda l-ebda waħda minn dawn l-azzjonijiet ma taffettwa r-rata ta' aċċettazzjoni tiegħek direttament. Jekk wara mistoqsija tapprova l-booking minn qabel u l-klijent jibbukkja l-ispazju tiegħek, dan jitqies bħala aċċettazzjoni. Jekk tapprova minn qabel u l-klijent ma jibbukkjax, dan ma jkollu l-ebda effett fuq ir-rata ta' aċċettazzjoni tiegħek. U jekk tirrifjuta talba, ir-rata ta' aċċettazzjoni tiegħek ma tiġix affettwata.
Talba għal booking tfisser li l-klijent qed jitlob biex jibbukkja l-listing tiegħek uffiċjalment u qed jistenniek taċċetta jew tirrifjuta. Għal dak li għandu x'jaqsam mar-rata tal-aċċettazzjoni tiegħek, aħna nkejlu biss ir-riżultat tat-talba għall-booking aħħari u tista' tagħmel biss waħda minn tliet azzjonijiet: taċċetta, tirrifjuta jew tistenna sakemm jgħaddi l-ħin tat-talba. Jekk tistenna sakemm jiskadi l-ħin tat-talba—anki jekk twieġeb il-mistoqsijiet imma ma tieħu l-ebda azzjoni biex tapprova jew tirrifjuta talba fi żmien 24 siegħa—dan jitqies bħala rifjut.
Kif jaffettwawni bħala Host dawn ir-rati?
Mistoqsija tajba. It-tweġiba teknika hija li rati ta' rispons baxxi jistgħu jolqtu l-eliġibbiltà tiegħek għall-programm tas-Superhosts u r-rati ta' aċċettazzjoni jista' jkollhom impatt fuq l-eliġibbiltà biex issir Host ta' Plus. U l-Hosts li għandhom rati baxxi ħafna jistgħu jeħlu penali, inkluż li l-listings tagħhom jiġu sospiżi. Iżda importanti li wieħed iżomm f'moħħu li każijiet ta' nuqqas ta' tweġiba jew ta' ċaħda ta' talba għal booking ta' darba rari jwasslu biex tittieħed xi azzjoni. Inkunu ħafna iktar inkwetati meta naraw tendenza ta' nuqqas ta' tweġibiet jew ċaħdiet li tirrepeti ruħha.
Tista' taqsam pariri jew suġġerimenti mingħand nies b'esperjenza dwar kif inżomm ir-rati ta' rispons u aċċettazzjoni tiegħi għoljin?
Aħna naħsbu li l-Hosts huma fil-fatt l-esperti f'dan il-qasam, għalhekk aħna se naqsmu xi wħud mill-ideat tiegħek hawnhekk, iżda għar-rata ta' rispons, wieħed mill-aħjar modi kif tieħu ħsieb il-messaġġi meta tkun qed tivvjaġġa huwa li tuża l-app ta' Airbnb fuq il-mowbajl tiegħek. Nissuġġerulek ukoll biex forsi taħbi temporanjament il-listing tiegħek jekk taf li mhux se tkun tista' twieġeb il-messaġġi għal xi żmien. Jekk qiegħed fuq btala, qed tattendi konferenza twila tax-xogħol jew sempliċement għandek bżonn taqta' ftit, tista' sserraħ rasek għax taf li m'hemm l-ebda għaġla biex twieġeb jew li se ssib ħafna messaġġi jistennewk fl-inbox tiegħek.
Biex taħbi l-listing tiegħek ħalli ma jidhirx fir-riżultati tat-tiftix għal tul ta' żmien partikolari:
- Mur fuq Il-listings tiegħek u agħżel listing
- Ikklikkja fuq Dettalji tal-Listing
- Ħdejn Status tal-listing ikklikkja fuq Editja
- Taħt Status tal-listing, agħżel Moħbi mill-menu drop-down
- Daħħal id-dati tal-bidu u tat-tmiem u mbagħad ikklikkja fuq Issejvja
Il-listing tiegħek se jerġa' jiġi attivat awtomatikament meta ż-żmien li tkun għażilt ikun għadda. Il-jum qabel ma l-listing tiegħek jerġa' jiġi attivat, se nibagħtulek email biex infakkruk.
Hawn għandek xi pariri li l-Hosts qasmu bejniethom fiċ-Ċentru tal-Komunità fuq kif iżżomm ir-rata ta' rispons tiegħek għolja:
- Agħżel ħin li matulu, ta' kuljum, twieġeb it-talbiet u l-mistoqsijiet
- Jekk m'intix disponibbli u ma tridx taħbi l-listing tiegħek, itlob lil co-Host jew lil xi ħadd minn sħabek biex iwieġbu f'ismek
- Iffranka l-ħin billi tikteb minn qabel it-tweġibiet għall-iktar mistoqsijiet komuni. Fittex il-messaġġ "Uża Messaġġ Issejvjat" li jintwera f'kull konverżazzjoni attiva li għandek ma' klijent. Tista' toħloq, tuża u terġa' tuża t-tweġibiet minn hemmhekk.
- Jekk għandek ħafna x'tagħmel jew jekk in-negozju tal-ospitalità tiegħek sejjer tajjeb ħafna, nissuġġerulek tqabbad assistent virtwali
Għar-rata ta' aċċettazzjoni tiegħek, ara li l-kalendarju u l-preferenzi u s-settings tal-booking tiegħek ikunu preċiżi u aġġornati. Pereżempju, jekk ma tistax taċċetta talbiet għal dakinhar stess, aġġorna l-listing tiegħek biex juri ż-żmien li teħtieġ bejn booking u ieħor. Il-Hosts qalulna wkoll li jsibuha komda li jżommu r-Regoli tad-Dar tagħhom aġġornati biex il-klijenti jifhmu x'jistgħu u x'ma jistgħux jagħmlu qabel jibagħtu talba għal booking. Għandek ċans iżgħar li tirċievi talbiet li ma tistax taċċettahom jekk tispjega b'mod ċar ħafna x'qed tistenna.
X'qed tagħmel Airbnb biex tevita li tippenalizza r-rata ta' aċċettazzjoni tal-Hosts meta jirrifjutaw talbiet mhux tajbin jew illegali?
Nifhmu li xi kultant tista' tirċievi talbiet li jiksru b'mod ċar ir-Regoli tad-Dar tiegħek jew li fil-fatt huma kampanji kummerċjali moħbija f'talbiet għall-bookings. Dawn jistgħu jqiegħduk f'pożizzjoni skomda li jkollok tirriskja li taffettwa b'mod negattiv ir-rata ta' aċċettazzjoni tiegħek meta ma jkunx hemm xejn aħjar x'tagħmel. Għalhekk l-ewwel ħaġa li rridu nagħmlu hija li ngħinuk tavżana meta jkun hemm xi problema. Qed nistudjaw kif l-aħjar nagħmlu hekk, u għalkemm għalissa għad m'għandniex faċilità x'inħabbru, ninsabu assolutament konxji ta' din il-problema.
Irridu niżguraw li tħossok kapaċi tiddeċiedi lil min tilqa' f'darek u li inti tkun komdu/a bil-klijenti li joqogħdu għandek. Aħna nifhmu li trid tinżamm responsabbli biss għal talbiet għal booking serji u aħna impenjati biex niżguraw li dan iseħħ.
In-numri huma biss parti mill-istorja
Għalkemm tajjeb li żżomm ir-rati ta' rispons u ta' aċċettazzjoni f'moħħok, il-kejl ta' dawn l-affarijiet mhuwiex importanti—fil-fatt dawn huma biss indikaturi tal-ospitalità li inti qed turi lill-klijenti tiegħek u r-rabta li tkun qed tibni meta jikkuntattjawk. Int tħalli l-impatt tiegħek fuq l-esperjenza tal-klijent minn meta jikkuntattjak jew jitlob booking, u l-komunità tal-Hosts bir-raġun hija kburija bil-fatt li tagħti sens ta' merħba u appartenenza għan-nies li joqogħdu fil-listings ta' Airbnb. Għalhekk, iva, jekk jogħġbok agħmel ħiltek biex twieġeb malajr u tgħin lill-klijenti meta jkunu qed jippruvaw isibu listing tajjeb għall-ħtiġijiet tagħhom; iżda kun af li n-numri huma mod wieħed biss kif turi l-mod li bih tilqa' n-nies għandek.
L-informazzjoni jaf li laħqet inbidlet minn meta ġie ppubblikat l-artiklu.