X'inhi l-Politika tal-Avvenimenti ta' Tfixkil Serji?

Is-sigurtà tal-Hosts u tal-klijenti hija l-ogħla prijorità tagħna. Għandna politika fis-seħħ biex meta ma tkunx tista' tilqa' n-nies minħabba diżastru naturali, emerġenza tas-saħħa pubblika jew xi ġrajja serja oħra, aħna nħarsu kemm lilek kif ukoll lill-klijenti tiegħek.

Dil-politika kienet tissejjaħ il-Politika taċ-Ċirkostanzi Attenwanti. Qed nibdlu l-politika u nibdlulha isimha biex tkun eħfef li tinftiehem.

Il-Politika tal-Avvenimenti ta' Tfixkil Serji l-ġdida se tidħol fis-seħħ għall-vjaġġi u l-Esperjenzi kollha li jibdew jew ikunu diġà bdew minn nhar is-6 ta' Ġunju 2024 'il quddiem, mingħajr ma nqisu d-data ta' meta sar il-booking.*

Il-politika tfisser kif se ġġib ruħha Airbnb b'rabta mal-kanċellazzjoniet u l-ħlasijiet lura meta jseħħu avvenimenti serji li jolqtu booking.

L-avvenimenti li ġejjin jaqgħu taħt il-politika tagħna jekk jolqtu l-post fejn jinsab il-listing, iseħħu wara l-booking u minħabba fihom il-booking fil-ġejjieni jew fis-seħħ jew ma jkunx jista' jintuża jew ma jkunx legali li jintuża:

• Epidemiji u emerġenzi tas-saħħa pubblika dikjarati. Fosthom hemm l-epidemiji, il-pandemiji u l-emerġenzi tas-saħħa pubblika dikjarati minn gvern. Il-mard endemiku jew li ħafna drabi marbut ma' dik iż-żona ma jaqax taħt din il-kategorija. Il-COVID-19 ma jaqax taħt il-Politika tal-Avvenimenti ta' Tfixkil Serji.
• Restrizzjonijiet fuq il-vjaġġi mħabbra mill-gvern. Fosthom hemm ir-restrizzjonijiet obbligatorji imposti minn aġenzija tal-gvern bħal, ngħidu aħna, ordni biex in-nies tħalli xi post partikolari. L-avviżi dwar l-ivvjaġġar u linji gwida oħra bħal dawn maħruġa mill-gvern ma jaqgħux taħt dil-kategorija.
• Għemil militari u ġlied ieħor. Fosthom kull għemil li jista' jitqies bħala gwerra, ġlied, invażjoni, gwerra ċivili, splużjoni, attakk b'bomba, ribelljoni, protesta vjolenti u qawmien kontra l-istat.
• Qtugħ serju u mifrux ta' servizzi essenzjali. Fosthom qtugħ ta' servizz tat-tisħin, tal-ilma u tad-dawl għal tul ta' żmien li jolqot il-biċċa l-kbira tad-djar f'post partikolari.
• Diżastri naturali. Fosthom diżastri naturali u avvenimenti serji oħra marbuta mat-temp. Dawk il-kundizzjonijiet naturali jew marbuta mat-temp li jseħħu ta' sikwit u li jistgħu jkunu mistennija f'post partikolari ma jaqgħux taħt dil-politika sakemm ma jwasslux għal xi kundizzjoni oħra li taqa' taħt dil-politika u li minħabba fiha l-booking ma jkunx jista' jintuża kollu. Ngħidu aħna, uragan ġewwa l-Messiku fi żmien l-uragani jaqa' taħt dil-politika biss jekk il-gvern joħroġ ordni biex in-nies iħallu djarhom.

Jekk avveniment jaqa' taħt dil-politika:

• Il-Hosts jistgħu jikkanċellaw il-booking mingħajr tariffi jew konsegwenzi oħra. Il-kalendarju tal-listing tiegħek se jiġi mblukkat għad-dati li tkun ikkanċellajt.
• Il-klijenti se jkunu jistgħu jikkanċellaw il-booking u jieħdu flushom jew kreditu tal-ivvjaġġar lura; tgħid x'tgħid il-politika ta' kanċellazzjoni tal-listing. Jekk ikun il-klijenti li jikkanċella, id-dati tal-booking se jkunu jistgħu jiġu bbukkjati minn klijenti oħra.
• Il-Host mhux se jitħallas tal-booking jekk il-klijent jew il-Host jikkanċellaw il-booking.
• Il-Hosts u l-klijenti jistgħu jikkanċellaw il-bqija tal-iljieli ta' booking, anki jekk il-klijenti jkunu diġà għamlu ċ-checkin.

Jekk avveniment ma jaqax taħt dil-politika:

• Il-klijent se jkun jista' jikkanċella skont il-politika ta' kanċellazzjoni tal-listing.
• Il-Host se jkun jista' jikkanċella skont il-Politika ta' Kanċellazzjoni mill-Hosts li tista' twassal għal xi tariffi jew konsegwenzi oħra.
• Tgħid x'tgħid il-politika ta' kanċellazzjoni, il-Hosts u l-klijenti xorta jistgħu jilħqu ftehim ieħor għal ħlas lura.

Qed nibdlu u nagħtu isem ġdid lill-politika biex nagħtu widen għall-kummenti u l-ħsibijiet li qasmu magħna l-Hosts u l-klijenti. Fost ir-raġunijiet għaliex qed inwettqu dil-bidla hemm li xi Hosts ma kinux qed jifhmu jekk temp ħażin ħafna imma li jista' jkun mistenni jew avveniment li ma jħallix lill-klijenti jivvjaġġaw kinux jaqgħu taħt dik il-politika.

Dawn huma l-bidliet ewlenin:

• Dil-politika se tgħodd biss għall-avvenimenti li jolqtu l-post fejn jinsab il-listing ibbukkjat. Il-politika mhix se tibqa' tgħodd għall-avvenimenti li ma jħallux lill-klijent jivvjaġġa biex jibda l-booking tiegħu.
• L-avvenimenti marbuta mat-temp li setgħu kienu mistennija fil-post fejn jinsab il-listing mhumiex kundizzjonijiet imħarsa taħt dil-politika sakemm ma jwasslux għal kundizzjoni oħra li taqa' taħt il-politika bħal, ngħidu aħna, restrizzjoni fuq il-vjaġġi imposta mill-gvern jew qtugħ serju u mifrux tas-servizzi essenzjali.

Il-Politika ta' Kanċellazzjoni mill-Hosts m'għandhiex x'taqsam mal-Politika tal-Avvenimenti ta' Tfixkil Serji. Skont il-Politika ta' Kanċellazzjoni mill-Hosts, Airbnb tista' taħfer it-tariffi, u kultant il-konsegwenzi l-oħra, jekk Host jikkanċella minħabba xi raġunijiet tajba li l-Host ma kellux kontroll fuqhom (bħal, ngħidu aħna, infaqgħet xi katusa). Il-Politika ta' Kanċellazzjoni mill-Hosts titlob li l-Hosts jilqgħu l-bookings ikkonfermati li jkunu kisbu.

Iż-żewġ politiki jitolbu li l-Hosts jikkanċellaw jekk il-post tagħhom ma jkunx addattat biex joqogħdu n-nies fih jew jekk ma jkunx għadu jaqbel mal-post li bbukkjaw il-klijenti. Ngħidu aħna, jekk il-listing tiegħek isemmi li hemm pixxina imma wara tempesta qalila l-pixxina tal-listing ma tkunx tista' tintuża, qabel iċ-checkin jeħtieġlek tikkanċella l-booking jew tilħaq ftehim mal-klijenti.

*Ħlief għal xi utenti oħra li Airbnb tkun għarrfithom mod ieħor.

Dil-politika u d-deċiżjonijiet meħuda minn Airbnb b'rabta magħha bl-ebda mod ma jnaqqsu l-jeddijiet mogħtija lill-Hosts u lill-klijenti mil-liġijiet u r-regolamenti tal-post fejn jinsab il-listing.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.