X'għandek tkun taf dwar is-sigurtà marbuta mal-monossidu tal-karbonju

Nafu kemm tieħu l-kumdità u s-sigurtà tal-klijenti tiegħek bis-serjetà. Għalkemm nafu li hemm ħafna affarijiet marbuta mas-sigurtà li għandek iżżomm f'moħħok meta tilqa' n-nies, nixtiequ naqsmu miegħek ftit pariri utli li tista' tibda tuża biex jgħinuk tiżgura s-sigurtà marbuta mal-monossidu tal-karbonju u n-nirien.

1. Twaħħal allarmi tal-monossidu tal-karbonju.
2. Aġġorna l-listing tiegħek biex turi li għandek allarm tal-monossidu tal-karbonju jew li ma teħtieġ l-ebda allarm għax l-ispazju tiegħek la għandu appliances li jaħarqu l-karburant u lanqas riskju ieħor marbut mal-monossidu tal-karbonju.

Dan huwa dak li għandek tkun taf dwar is-sigurtà marbuta mal-monossidu tal-karbonju kif ukoll dwar kif għandek tavża lill-klijenti tiegħek dwar il-miżuri li daħħalt fis-seħħ fl-ispazju tiegħek biex tinduna bil-monossidu tal-karbonju.

Il-monossidu tal-karbonju huwa gass velenuż, bla kulur u mingħajr ebda riħa. Jista' jinħoloq mill-appliances li jaħarqu l-karburant u li komunament issibhom ġewwa d-dar bħalma huma l-fran, il-cookers jew il-heaters tal-ilma—għalhekk importanti li l-Hosts kollha jifhmu r-riskju tal-avvelenament bil-monossidu tal-karbonju.

L-aċċidenti marbuta mal-monossidu tal-karbonju jistgħu jiġu evitati bi ftit edukazzjoni u ħsieb minn qabel. Nissuġġerulek twaħħal allarm tal-monossidu tal-karbonju jekk fl-ispazju tiegħek hemm xi waħda minn dawk li ġejjin:*

• Appliances (bħal pereżempju: cooker, forn jew dryer tal-ħwejjeġ) li jaħdmu b'dal-karburanti li ta' sikwit jintużaw fid-djar:
  • Faħam
  • Injam
  • Propan
  • Petrol
  • Gass naturali
  • Pitrolju
  • Żejt
  • Metan
• Fireplace tal-injam
• Garaxx mad-dar
• Ġeneratur qrib il-fetħa ta' bieb jew tieqa
• BBQ(s) tal-gass jew tal-faħam qrib in-naħa ta' barra ta' tieqa

Importanti żżomm f'moħħok li l-allarmi tad-duħħan ma jistgħux jintużaw bħala allarmi tal-monossidu tal-karbonju u bil-kontra. Biss tista' ssib allarmi li jindunaw kemm bid-duħħan kif ukoll bil-monossidu tal-karbonju. Li twaħħal allarm tad-duħħan li kapaċi jinduna wkoll bil-monossidu tal-karbonju mhux xi ħaġa kumplikata u tista' tgħin issalvja l-ħajjiet.

Tista' wkoll toħloq checklist biex tgħinek torganizza ruħek fejn jidħlu l-kwistjonijiet tas-sigurtà.

Dawn huma xi affarijiet li tista' tagħmel biex jgħinuk tnaqqas l-aċċidenti marbuta mal-monossidu tal-karbonju:

1. Fl-ispazju tiegħek waħħal allarmi tal-monossidu tal-karbonju li jaħdmu. L-esperti bħall-International Fire Chief Association u n-National Fire Protection Association jissuġġerixxu li twaħħal dat-tip ta' allarm f'kull sular u barra kull kamra tas-sodda biex b'hekk il-klijenti jkunu jistgħu jisimgħu l-allarm idoqq waqt li jkunu reqdin.
2. Ittestja l-allarmi tiegħek darba fix-xahar biex tara li jkunu qed jaħdmu. Il-batteriji jkollhom bżonn jinbidlu darba kull sena, ħames snin jew għaxar snin skont is-suġġerimenti tal-manifattur għalhekk iċċekkja d-data tal-manifattura fuq in-naħa ta' wara tal-allarm kif ukoll l-informazzjoni dwar il-prodott għal sid il-prodott għall-pariri.
3. Ara li l-appliances kollha fl-ispazju tiegħek twaħħlu skont l-istruzzjonijiet tal-manifattur u l-liġijiet tal-bini tal-post. Żomm f'moħħok li l-biċċa l-kbira tal-appliances li jaħarqu l-karburant għandhom jitwaħħlu min-nies professjonali.
4. Naddaf u spezzjoni ta' spiss l-apparat kollu li jaħraq il-karburant—il-fran, il-cookers, id-dryers kif ukoll iċ-ċmieni u l-ventilaturi. B'hekk tkun qed tgħin biex dawn jaħdmu u jkunu mqabbda kif suppost, ikollhom biżżejjed arja u ma jkollhomx xquq, sadid jew tbajja'.
5. Int u tuża fireplace jew xi apparat ieħor li jaħraq l-injam jew il-pellets, ara li ċ-ċumnija jew il-ventilatur ikunu miftuħa kif suppost. Tagħlaqhomx qabel in-nar ikun intefa' kollu.
6. Ara li ċ-ċmieni u l-ventilaturi tal-appliances (bħal heaters tal-ilma, fran u dryers) ikunu miftuħa u ma jkunux imblukkati.
7. Jekk toffri ċerti kumditajiet bħal ġeneraturi ta' emerġenza, BBQs jew heaters tal-ilma, ara li tagħti struzzjonijiet ċara lill-klijenti fuq kif għandhom jużawhom biex tiżgura li jinżammu biżżejjed 'il bogħod mit-twieqi miftuħa.
8. Agħti lill-klijenti n-numri tas-servizz tat-tifi tan-nar, tal-pulizija u tal-isptarijiet fil-qrib biex ikunu jistgħu jikkuntattjawhom f'każ ta' emerġenza.

Għal iktar dettalji dwar is-sigurtà marbuta mal-monossidu tal-karbonju tista' taqra l-materjal edukattiv li joffru l-International Association of Fire Chiefs u n-National Fire Protection Association.

Meta ssemmi li għandek allarmi tal-monossidu tal-karbonju u tad-duħħan fil-listing tiegħek tkun qed tgħin isserraħ moħħ il-klijenti għax b'hekk ikunu jafu li tagħti kas saħħithom.

Tista' taġġorna dad-dettalji billi tniżżel il-paġna sakemm issib Tagħmir tas-sigurtà fit-taqsima Sigurtà tal-klijenti tal-listing tiegħek. Jekk l-ispazju tiegħek ma jeħtieġ l-ebda allarm tal-monossidu tal-karbonju għax m'għandekx appliances li jaħarqu l-karburant jew ebda riskju ieħor marbut mal-monossidu tal-karbonju, hemm kaxxa li tista' timmarka biex turi dil-ħaġa.

Billi l-klijenti jistgħu wkoll jiffiltraw ir-riżultati tat-tiftix tagħhom biex isibu listings li joffru allarmi tal-monossidu tal-karbonju u tad-duħħan, meta żżomm il-listing tiegħek aġġornat jaf tkun qed tgħin biex tħajjar iktar nies jiftħuh. Jekk m'għandekx allarmi tad-duħħan jew tal-monossidu tal-karbonju, dil-ħaġa se tintwera fuq il-paġna tal-listing tiegħek u fl-emails li nibagħtu lill-klijenti qabel iż-żjara tagħhom.

Importanti tiżgura li l-meter tal-gass tad-dar qatt ma jkun miksi bis-silġ jew bil-borra. It-tagħmir tal-gass jeħtieġ li jkollu biżżejjed arja biex jaħraq il-gass mingħajr periklu u biex irewwaħ l-appliances sew.

Is-silġ u l-borra jistgħu jagħmlu l-ħsara lill-meters u lill-pajpijiet u jwasslu għall-ħruġ tal-gass. Dawn huma ftit pariri fuq kif tevita sitwazzjonijiet ta' periklu maqsuma magħna mill-U.S. National Fire Protection Association:

• Uża xkupa minflok pala biex tneħħi s-silġ u l-borra minn mal-meter tal-gass.

• Tagħtix daqqiet ta' sieq jew daqqiet oħra fuq il-meter tal-gass biex tneħħilu s-silġ u l-borra.

• Jekk tuża magna għat-tneħħija tal-borra, ara li tonfoħ il-borra 'l bogħod mill-meter tal-gass.

• Ofroq mogħdija li tagħti għall-meter tal-gass f'każ li xi ħaddiem tal-ewwel għajnuna jkun jeħtieġ aċċess għalih.

• Jekk il-meter miksi bis-silġ u ma tistax tneħħi s-silġ, avża minnufih lill-kumpanija tal-gass.*

Ċerti kumpaniji tal-gass joffru wkoll kaxxa għall-meter tal-gass u jiġu jwaħħluhielek huma stess—ma tagħmilx ħażin tistaqsihom.

*Dil-lista hija biss gwida u ma toffrix informazzjoni kompluta. Jekk jogħġbok qis is-sitwazzjoni unika tal-propjetà tiegħek u ċċekkja xi jgħidu l-liġijiet u l-esperti ta' kontra n-nirien tal-post.

L-informazzjoni f'dal-artiklu jaf laħqet inbidlet minn meta ġie ppubblikat.