Il-ħolqien ta' ħbiberija wara n-nirien

Open Homes issa sar Airbnb.org

Il-programm Open Homes ta' Airbnb issa sar Airbnb.org, għaqda mingħajr skop ta' qligħ 501(c)(3) ġdida fjamanta. Grazzi talli bnejt il-komunità ta' Open Homes magħna. Ninsabu ħerqana li se tingħaqad magħna għal dal-kapitlu l-ġdid.

Fl-għodwa tat-8 ta' Novembru 2018, Melissa Johnson, 8 xhur tqila, ħasbet li se torqod ftit iktar mis-soltu sakemm uliedha jħejju ruħhom għall-iskola. Hija tiftakar lil żewġha u lil bintha jitkellmu dwar is-sema—kienet lewn oranġjo—u ħasbu li forsi kien hemm xi nirien f'belt fil-qrib.

Nofs siegħa wara, bint Melissa ċemplitilha. "L-iskola għalqet dakinhar. Qomt u ħarist lejn is-sema—kienet tal-biżgħa," tgħid Melissa. "Kellha lewn ħamrani u oranġjo, qisha xena mill-Apokalissi. Imbagħad rajt ħafna rmied madwari."

Melissa u żewġha Trevor għexu ġewwa Paradise, California għal 14-il sena—imma daħlu ġewwa d-dar tagħhom ġimgħa biss qabel in-Nirien ta' Camp li laqtu l-istat tagħha. Dakinhar filgħodu "ħassejt xi ħaġa tgħidli li għandna nippakkjaw u naħarbu, għas-sigurtà tagħna".

Minbarra Melissa, Trevor u ż-żewġ uliedhom, il-grupp kien magħmul minn missier Trevor, żewġ Great Danes, poodle, qattus u fenek. Ippakkjaw kollox f'żewġ karozzi u Melissa ħaffet tħejji kollox għal uliedha.

"In-nies kienu qed jippanikjaw u jsuqu qishom imġienen. Kienet bħal xena tal-films. Ma tistenniex li se tgħaddi minn jew tara xi ħaġa daqshekk tal-biżgħa. Nirien fuq il-lemin, nirien fuq ix-xellug, nirien quddiemek, nirien warajk. Ħin minnhom ħassejtni qed insuq direttament ġon-nar—ma kontx naf qbadtx it-triq it-tajba jew fejn għandi mmur. Għaddejt il-ħin kollu nibki."

Fl-aħħar il-famìlja waslet Chico, California fejn setgħet toqgħod għand oħt Melissa imma sabet ruħha f'appartament ta' kamra tas-sodda waħda b'erba' familji joqogħdu fih. "Konna 15-il persuna u 18 jew 19-il annimal," tgħid Melissa. "Ommi raqdet fil-karozza tagħha imma xorta, l-appartament kien ippakkjat u kien fih biss ftit iktar minn 45 metru kwadru. Ma kienx komdu, l-iktar għalija li kont tqila. Allura kelli naħseb f'soluzzjoni oħra."

Ftit jiem wara li bdew in-Nirien ta' Camp, Cinde Dolphin kienet il-knisja u l-predikatur beda jitkellem fuq kif għandna niftħu qalbna beraħ għall-oħrajn. "Kien qed jgħidilna ma noqogħdux lura milli ngħixu u li fil-ħajja kultant trid tiftaħ qalbek għall-oħrajn, anki jekk mhux dejjem tkun l-iktar ħaġa komda," tgħid Cinde, imprenditriċi ġewwa Sacramento, California.

Cinde għaddiet ħajjitha kollha tgħin lin-nies, fost l-oħrajn bħala voluntiera fil-grupp tal-knisja tagħha, tieħu ħsieb żagħżugħ fis-sistema tal-fostering u torganizza kolazzjonijiet għan-nies mingħajr saqaf fuq rashom. "Jien u nisimgħu jitkellem bdejt naħseb, 'Ftit 'il bogħod minna, fil-Kontea ta' Butte, hemm dan-nirien u jien mhux qalbi miftuħa għalihom,' taf int? Nista' nibgħat ftit kutri jew t-shirts, imma kif nista' nagħti sehem ikbar fil-proċess?"

Ikkuntattjat lid-dipartiment tat-tifi tan-nar tal-post u qalulha bil-programm Open Homes. Cinde qatt ma kienet laqgħet il-klijenti ta' Airbnb qabel u d-dar tagħha ġewwa Sacramento b'dar għall-klijenti fl-istess propjetà mhix tagħha imma mikrija. Talbet permess lil sid il-kera, naddfet l-ispazju u tellgħatu fuq il-paġna tal-għajnuna f'każ ta' diżastru ta' Open Homes.

Cinde tgħid li, "F'inqas minn siegħa" irċeviet messaġġ mingħand Melissa. "L-ewwel ħaġa li qaltli—li mhu se ninsiha qatt—'Alla jibqa' jafulek'." Imbagħad Melissa qaltli ftit dwar familtha: li għandha tifel ta' 11-il sena, li l-kunjatu diżabbli. Qaltli, 'Ma nafux fejn se naqbdu nagħtu rasna. Aħna familja żgħira bi ftit klieb. Nafu li taf tkun problema, imma jekk lesta tilqgħana, nixtiequ ħafna li noqogħdu għandek. U bilħaqq, tqila u wasalt biex inwelled ukoll.' L-istorja tagħha missitli qalbi—ma naħisbx li kien hemm xi ħadd li seta' jgħidilha le."

Cinde wieġbet minnufih u, f'inqas minn 24 siegħa, Melissa u familtha waslu ġewwa Sacramento. Billi kienet l-ewwel darba li qed tilqa' n-nies, Cinde ma kinitx taf eżatt kif għandha tħossha. "Kont anzjuża għax qatt ma kont ilqajt barranin ġewwa dari. Qabel ftaħt il-bieb kont qed naħseb, 'Nittama li naf x'qed nagħmel. Jien mara, ngħix waħdi f'did-dar u forsi qed nagħmel ħmerija...' Imma meta ftaħt il-bieb u rajt lil Melissa, mill-ewwel fhimt li kont qed nagħmel tajjeb li ngħinha."

Melissa wkoll qaltilna li kienet anzjuża. "Ma tkunx taf ma' xiex se tħabbat wiċċek u wara li konna għaddejna minn sitwazzjoni kerha bħal dik, ma konniex qed nifhmu x'qed jiġri madwarna," qaltilna. "Imma Cinde u t-tbissima tagħha għenuna nħossuna milqugħin u nessewna ftit mill-inkwiet. Mill-ewwel fhimna li kienet mara qalbha tajba ħafna."

Cinde ħejjiet xi affarijiet fid-dar tal-klijenti biex tgħin lill-familja tħossha komda fosthom li ħallietilhom xugamani nodfa, xi żewġ heaters żgħar u ftit kokkotina. "Ippruvajt naħseb f'dak li tista' tkun teħtieġ meta tmur toqgħod f'post ġdid u ħsibt ftit, 'Issa x'se nagħmel?'"

Iż-żewġ nisa qattgħu ftit ħin jikkomunikaw dwar kif jorganizzaw ruħhom u għalhekk Melissa kienet taf x'għandha tistenna fejn jidħol l-ispazju. "Cinde qaltilna li l-ispazju ma tantx kien kbir imma għaliha ma kienx problema la ma kienx problema għalina. Aħna ovvjament naddattaw kullimkien. Il-post kien ħelu ħafna—kien hemm sodda sufan u kamra tal-banju żgħira. Ħassejtni qisni kont id-dar."

Cinde qalet lil sħabha ta' Facebook li kienet qed tilqa' xi nies li tilfu kollox fin-Nirien ta' Camp. Il-ġirien ħejjew l-ikliet ta' filgħaxija u sħabha għamlu ġabra ta' ħrieqi, lbies u playpen għat-tarbija li Melissa kienet qed tistenna. "Sħabi ħadu ħsieb kollox," tgħid Cinde. "Naħseb li importanti li tkun taf lill-familja li tkun qed tgħin—ħafna nies ikunu jixtiequ jaraw l-effett li l-għajnuna tagħhom tkun qed tħalli."

Għalkemm il-familja ta' Melissa qagħdet hemm għal tlett iljieli biss qabel sabet post ieħor għal żmien itwal, iż-żmien li qattgħu ma' Cinde għenhom biex jistrieħu u jħejju ruħhom għall-passi li jmiss. "Ħsibt li kienu se jaslu għandi jibku u mimlija ansjetà," tgħidilna Cinde. "Imma minflok l-attitudni tagħhom kienet waħda ta', 'Grazzi. Se nerġgħu niġu f'tagħna u ninsabu kuntenti li sibna post fejn nistgħu nistrieħu ftit.' Kienet opportunità biex jerġgħu jqumu fuq saqajhom u jifhmu li bil-mod il-mod kollox se jerġa' lura għal li kien."

Illum il-familja ta' Melissa tgħix f'appartament f'Carmichael, madwar 20 minuta bogħod minn fejn toqgħod Cinde. Annette, it-tarbija ta' Melissa twieldet ħamest ijiem wara li sabu l-post il-ġdid u Cinde u Melissa jikkomunikaw ta' sikwit sal-lum fejn jaqsmu dak li qed jiġri f'ħajjithom u r-ritratti tat-tarbija.

Dal-aħħar Cinde qabbdet lil Melissa taħdmilha fuq proġett għan-negozju tagħha biex b'hekk tista' taħdem ftit sigħat kuljum u fl-istess waqt tkun tista' tieħu ħsieb it-tarbija tagħha. Melissa tgħid li Cinde "mara speċjali. Ħalliet impatt fuq ħajti. Qatt mhu se ninsa l-qalb tajba tagħha u li kienet hemm għalina. Dejjem baqgħet hemm għalina u dejjem toffri li tgħinna meta jkollna bżonn daqqa t'id."

U għalkemm Melissa u Trevor għadhom jippruvaw ifasslu mill-ġdid il-post tagħhom ġewwa Paradise, il-ħsieb dejjem jibqa' li jerġgħu lura fil-belt tagħhom. "Ma nistax ngħid li għadni nqis id-dar bl-istess mod li kont inqisha qabel in-nirien," tgħid Melissa. "Għalija issa d-dar hija fejn hemm il-familja tiegħek. Darek tista' tkun kullimkien."

Ingħaqad ma' komunità li dejjem tikber u li tgħinek taqsam mal-oħrajn fi żminijiet ta' bżonn.

L-informazzjoni li tinsab f'dal-artiklu jaf laħqet inbidlet minn meta ġie ppubblikat.