Kif iż-żjarat itwal jistgħu jgħinu n-negozju tal-ospitalità tiegħek imur aħjar

Taf tkun strateġija tal-ospitalità għaqlija li tilqa' ż-żjarat itwal. Il-listings li jaċċettaw bookings ta' 28 lejl jew iktar jistgħu jdaħħlu iktar flus minn listings li ma jaċċettawx dat-tip ta' żjarat.*

Iż-żjarat itwal jistgħu jgħinuk ukoll timla l-kalendarju tiegħek iktar malajr, iwasslu għal inqas xogħol marbut mat-tħejjija tal-listing bejn żjara u oħra u joffru flessibbiltà ikbar fil-mod kif tilqa' n-nies meta mqabbla ma' bookings iqsar.

Dan kif dal-benefiċċji ewlenin taż-żjarat itwal jistgħu jgħinu n-negozju tal-ospitalità tiegħek.

Żjarat ta' 28 lejl jew iktar jistgħu jimlew il-kalendarju tiegħek iktar malajr u b'inqas bookings meta mqabbla ma' żjarat iqsar. Jistgħu jgħinu wkoll biex ikollok inqas iljieli battala bejn booking u ieħor għax ikollok inqas klijenti qed jagħmlu ċ-checkin u ċ-checkout tagħhom.

Kalendarju mimli żjarat fit-tul jista' jwassal għal dħul iktar stabbli biex ikollok idea aħjar ta' x'tista' tistenna li ddaħħal kull xahar. Bħala regola ġenerali, il-flus li ddaħħal jintbagħtulek bħala ħlas wieħed kull 30 jum.

Tista' tħajjar iktar nies jibbukkjaw dat-tip ta' bookings billi toffri skontijiet ta' kull xahar. Tista' toffri skont fiss għal kull żjara ta' mill-inqas 28 lejl jew tista' toffri prezz personalizzat skont ix-xahar tas-sena.

Xi ħaġa oħra li tista' tagħmel hija li tgħarraf lill-komunità tiegħek li qed toffri żjarat itwal. Xi Hosts jaqsmu l-links għal-listings tagħhom mal-kumpaniji u l-universitajiet tal-post għax il-ħaddiema, l-apprendisti jew l-istudenti tagħhom jafu jkunu qed ifittxu post fejn joqogħdu għal ftit taż-żmien.

Żjarat itwal jistgħu jħaffulek il-ħidma tiegħek meta tilqa' n-nies. Inqas klijenti normalment ifissru inqas ħidma tħejjija bejn booking u ieħor u inqas xogħol biex tieħu ħsieb il-bookings tal-listing tiegħek, l-iktar fejn jidħlu l-messaġġi mal-klijenti u t-tindif tal-ispazju tiegħek.

Qis kemm tibgħat messaġġi biex tagħti merħba lill-klijenti kollha li tilqa' f'xahar u ara kemm tista' tiffranka xogħol jekk ikollok klijent wieħed li joqgħod għal 28 lejl. Żjara itwal tista' tnaqqas bil-kbir ix-xogħol meħtieġ biex twieġeb lill-klijenti tiegħek fil-ħin u tispjegalhom l-affarijiet.

Meta jkollok klijent li jibbukkja żjarat itwal ifisser li ma jkollokx għalfejn tnaddaf il-post tiegħek daqshekk ta' spiss biex tħejji l-post għal klijenti ġodda. Għall-indafa matul żjarat itwal, xi Hosts iħallu l-prodotti tat-tindif fil-post biex il-klijenti jkunu jistgħu jużawhom filwaqt li Hosts oħra joffru servizz fejn inaddfu l-post kull tant żmien.

"Minn meta faqqgħet il-pandemija, il-klijenti li jaħdmu mid-dar, il-familji u dawk li jgħixu minn fuq l-internet bdew jibbukkjaw iż-żewġ spazji tiegħi għal żjarat itwal—kultant anke għal sitt ġimgħat," jgħid Omar, Superhost ġewwa l-Belt tal-Messiku. "Noffri tindifa tal-ispazju darba fil-ġimgħa—nagħmlilhom lożor nodfa, inħallilhom il-prodotti bażiċi li jeħtieġu u nara li l-affarijiet sejrin sew."

F'ċerti komunitajiet fejn jeżistu limitazzjonijiet fuq il-kirjiet għal żmien qasir, taf tkun idea tajba li taċċetta l-bookings ta' 28 lejl jew iktar. Ara li l-inqas u l-itwal żmien li għalih tista' tiġi bbukkjata żjara jkun skont il-liġijiet u r-regolamenti tal-post fejn jinsab il-listing.

Jekk il-listing tiegħek jinsab f'żona li taċċetta kemm bookings qosra kif ukoll bookings itwal, nissuġġerulek li kull tant żmien tibdel is-settings biex taddattahom għas-sitwazzjoni tiegħek. B'hekk tkun tista' tieħu kemm tista' mid-domanda tal-istaġun taż-żona tiegħek u fl-istess waqt tkun qed tgħin tħajjar lill-klijenti jibbukkjaw l-iljieli jew il-ġimgħat disponibbli bejn iż-żjarat ta' kull xahar fil-listing tiegħek.

Għażla oħra hija li tikri d-dar tiegħek meta tkun qed tivvjaġġa. Maggie, Co-Host ġewwa Northampton, Massachusetts għenet lill-ġenituri tagħha jilqgħu n-nies waqt li kienu qed iqattgħu x-xtiewi tagħhom ġewwa Puerto Rico. Tgħidilna li qabel bdew jagħmlu hekk, il-post kien jitħalla battal għal xhur sħaħ.

Iż-żjarat fit-tul jafu jkunu mod għaqli ta' kif timla l-kalendarju tal-listing tiegħek u ta' kif ittejjeb il-ħidma tiegħek bħala Host—kemm jekk taċċetta biss żjarat fit-tul kif ukoll jekk dawn huma biss parti mill-istrateġija tiegħek.