Kif jaħdem it-tiftix fuq Airbnb
Punti ewlenin
Il-prezz, il-kwalità u l-popolarità tal-listing tiegħek jaffettwaw il-post fejn jintwera fir-riżultati tat-tiftix tal-klijenti
Ipprova iftaħ iktar dati fuq il-kalendarju tiegħek biex jinstab ħafna iktar drabi meta l-klijenti jkunu qed ifittxu
Ħloqt u ppubblikajt il-listing tiegħek u issa tixtieq li n-nies isibuh. Kif se jsibuh? Dawn huma xi ftit affarijiet li tista' tagħmel biex ittejjeb il-post fejn jintwera l-listing tiegħek fir-riżultati tat-tiftix.
Ifhem l-affarijiet bażiċi
L-algoritmu ta' Airbnb juża ħafna fatturi biex jifhem kif għandu juri l-listings fir-riżultati tat-tiftix. Mhux kull fattur jitqies l-istess. Il-prezz, il-kwalità u l-popolarità ta' listing għandhom effett kbir fuq kif jintwera dak il-listing.
L-algoritmu jagħti importanza kbira lill-prezz totali ta' listing qabel it-taxxi (imma bit-tariffi u l-iskontijiet kollha maħduma) u lill-kwalità tal-listing meta mqabbel ma' listings oħra bħalu fl-istess żona. Ir-ritratti, ir-reviews tal-klijenti u l-karatteristiċi l-oħra ta' listing jgħinuna nifhmu l-kwalità tiegħu.
Meta titlob prezz kompetittiv u dejjem toffri servizz ta' kwalità għolja tkun qed tgħin biex ittejjeb il-post fejn jintwera l-listing għax il-listings li joffru l-aħjar valur f'reġjun partikolari normalment jintwerew qabel listings oħra fir-riżultati tat-tiftix.
Aħdem biex il-listing isir dejjem iktar popolari
L-algoritmu ta' Airbnb iqis il-popolarità tal-listing tiegħek skont numru kbir ta' fatturi. Fosthom hemm kemm il-klijenti jibbukkjaw il-listing tiegħek ta' sikwit, kemm tinfetaħ il-paġna tal-listing tiegħek u kemm-il persuna tkun żiedet il-listing tiegħek mal-favoriti tagħha.
L-iktar listings popolari normalment jintwerew qabel listings oħrajn fir-riżultati tat-tiftix. Biex tgħin iżżid l-interess mill-klijenti nissuġġerulek:
- Toffri l-iktar kumditajiet imfittxija mill-klijenti bħal wifi b'veloċità tajba, self checkin u parkeġġ bla ħlas.
- Tiddeskrivi dak li jagħmel l-ispazju tiegħek uniku b'mod dettaljat biex il-klijenti jkunu jistgħu jifhmu eżatt x'għandhom jistennew.
- Ittella' ritratt ta' kwalità għolja biex tgħin tħajjar lill-klijenti jibbukkjaw il-listing tiegħek. Ritratti ta' kwalità jistgħu jtejbu l-post li fih jintwera l-listing tiegħek għal kategorija partikolari.
Agħmel iktar dati disponibbli
L-algoritmu ta' Airbnb jqis affarijiet bħad-disponibbiltà tal-listing tiegħek, kemm iddum biex twieġeb għall-mistoqsijiet u kemm taċċetta bookings ta' sikwit. Iktar ma tiftaħ dati fuq il-kalendarju tiegħek, iktar għandek ċans li l-listing tiegħek ikun disponibbli għad-dati li jkun qed ifittex klijent u għalhekk jintwera fir-riżultati tat-tiftix tiegħu.
Affarijiet li tista' tagħmel biex ittejjeb il-post fejn jintwera l-listing tiegħek fir-riżultati tat-tiftix:
- Wieġeb għat-talbiet tal-bookings fi żmien 24 siegħa. Evita li tirrifjuta t-talbiet għall-bookings ta' sikwit.
- Uża l-Booking Immedjat biex il-klijenti jkunu jistgħu jsibu l-listing tiegħek meta jiffiltraw ir-riżultati tat-tiftix bil-listings li joffru dik l-għażla. Dil-faċilità tħalli lill-klijenti jibbukkjaw il-post tiegħek minnufih (mingħajr ma jkollhom għalfejn jistennewk taċċetta t-talbiet tagħhom) u għalhekk il-konfermi min-naħa tiegħek jintbagħtu iktar malajr.
- Naqqas in-numru ta' restrizzjonijiet li torbot mal-bookings, bħal pereżempju l-inqas u l-itwal tul għal żjara.
Offri ospitalità mill-aqwa
Il-post fejn il-listing tiegħek jintwera fir-riżultati tat-tiftix jitjieb maż-żmien hekk kif dejjem iktar, bħala Host, tibda tifhem aħjar kif toffri u tmur lil hinn dak li l-klijenti jistennew li jsibu wara li jaqraw id-deskrizzjoni tal-listing tiegħek.
Iktar ma tagħti dettalji preċiżi dwar il-post tiegħek u tikkomunika ċar mal-klijenti, iktar għandek ċans li tikseb ratings u reviews tajbin dwar iż-żjarat tal-klijenti fil-post tiegħek. Dil-ħaġa tista' tgħinek ukoll biex tevita li l-klijenti jilmentaw mal-għajnuna tal-klijenti, xi ħaġa li tista' twassal biex il-listing tiegħek jintwera iktar tard fir-riżultati tat-tiftix.
L-algoritmu jqis ukoll jekk intix Superhost—l-isem li nagħtu lil Host b'esperjenza u b'ratings għolja—jew jekk għandekx xi wħud mir-rekwżiti (jew kollha kemm huma) biex tkun tista' ssir Superhost. Fost dawn ir-rekwiżiti hemm fatturi bħal jekk tweġibx malajr għat-talbiet għall-bookings mingħand il-klijenti u li kemm jista' jkun ma tikkanċellax il-bookings.
Il-klijenti se jkollhom l-għażla li jiffiltraw ir-riżultati tat-tiftix tagħhom biex isibu biss listings ta' Superhosts.
Skopri iktar grazzi għall-gwida tagħna dwar kif toħloq listing li jirnexxi
L-informazzjoni li tinsab f'dal-artiklu jaf laħqet inbidlet minn meta ġie ppubblikat.
Punti ewlenin
Il-prezz, il-kwalità u l-popolarità tal-listing tiegħek jaffettwaw il-post fejn jintwera fir-riżultati tat-tiftix tal-klijenti
Ipprova iftaħ iktar dati fuq il-kalendarju tiegħek biex jinstab ħafna iktar drabi meta l-klijenti jkunu qed ifittxu