Kif tħejji spazju komdu li jilqgħek

Hu x'inhu t-tip ta' spazju li tellajt fuq Airbnb, inti u tlesti biex tilqa' l-ewwel klijenti tiegħek hemm ftit affarijiet żgħar li tista' tagħmel biex tagħmlu post iktar komdu u li jilqgħek.

Xi affarijiet magħżula u magħmula bi ħsieb jistgħu jgħinu lill-ispazju tiegħek jinħass iktar bħal dar li tilqgħek—u dal-affarijiet m'għandhomx għalfejn ikunu kkumplikati jew għaljin.

Hawn għandek xi ftit pariri fuq kif tiddisinja bi ħsieb:

• Żejjen b'oġġetti li juru int min int bħal, ngħidu aħna, affarijiet li tkun ġemmajt matul il-vjaġġi tiegħek
• Evita li tħalli ħafna spazju vojt għax jista' jinħass post bla ħajja u li jimbuttak
• Agħżel tema ta' kuluri u agħżel biċċiet tal-arti, tessuti u oġġetti oħra li jaqblu
• Nissuġġerulek iżżid oġġetti li jispikkaw fil-kamra, bħal lampa b'disinn mhux tas-soltu jew xi pultruna komda mdaqqsa
• Żejjen bix-xtieli u bil-fjuri biex tagħti ftit tal-ħajja

Għandek tħalli mill-inqas toilet paper, sapun, xugaman u mħadda għal kull klijent, u lożor għal kull sodda tal-klijenti.

Il-klijenti s-soltu jieħdu gost isibu wkoll:

• Xi xugamani, kutri u mħaded żejda
• Shampoo u conditioner
• Hair dryer
• Affarijiet bażiċi bħal kafè, te u kitla
• Prodotti bażiċi tat-tindif
  

Ikseb aktar informazzjoni dwar il-kumditajiet

Il-kamra tas-sodda hija l-post fejn il-klijenti tiegħek se jorqdu u jżommu l-affarijiet tagħhom, għalhekk importanti li tkun komda. Aħseb fuq dak li jgħinek tħossok daqslikieku qiegħed f'darek, fi spazju ta' ħaddieħor.

Tista', ngħidu aħna:

• Tħalli biżżejjed spazju għall-oġġetti personali billi toffri armarju bi kxaxen vojta, armarju b'xi spallieri vojta jew xkaffa għall-bagalji
• Tħalli komodina b'lampa fuqha ħdejn is-sodda biex il-klijenti jkunu jistgħu jqiegħdu n-nuċċali, il-mowbajl jew ktieb ħdejn is-sodda
• Tara li jkollok saqqu ta' kwalità, ftit imħaded żejda u kutri rotob ħalli jippreferu x'jippreferu, dejjem isibu xi ħaġa komda għalihom
• Iżżid ftit xtieli, mera, buqar u tazza għall-ilma, adattatur għal tipi ta' plugs differenti u ċarġer li jaqbad ma' ħafna mowbajls biex il-kamra tas-sodda tkun waħda li tilqgħek

Tgħin lill-klijenti tiegħek igawdu ż-żjara tagħhom billi tagħmel xi affarijiet oħra biex tkompli żżid mal-ospitalità mill-aqwa tiegħek.

1. Neħħi l-imbarazz. Jekk tgħix fl-istess spazju li taqsam mal-klijenti, importanti li taħseb ftit fuq x'affarijiet trid tħalli jiġru u dawk li aħjar tistiva. Meta torganizza u terfa' l-affarijiet tiegħek b'mod kreattiv tkun qed tgħin biex il-post tiegħek jinħass iktar spazjuż u li jilqgħek.

2. Agħti l-istruzzjonijiet. Għin lill-klijenti jifhmu kif iħaddmu l-appliances u l-faċilitajiet kollha li jkollhom disponibbli (bħal, ngħidu aħna, il-fireplace tal-gass, l-arja kkundizzjonata jew il-bieb tal-garaxx). Tista' tagħti dawn l-istruzzjonijiet mal-bqija tal-informazzjoni dwar id-dar tiegħek.

3. Qatta' lejl fil-post. Jekk kultant tqatta' lejl fl-ispazju tiegħek hemm imnejn li tifhem aħjar x'jonqos jew x'titjib hemm bżonn. L-ispazju jinħass kenni u wieħed li jilqgħek? Għandek kulma teħtieġ biex tħossok komdu/a u daqslikieku f'darek? Ibqa' ibdel l-affarijiet sakemm tista' twieġeb "iva" għal daż-żewġ mistoqsijiet.

4. Żomm l-ispazju nadif. Kemm jekk tnaddaf l-ispazju inti jew tqabbad lil xi ħadd jgħinek tnaddaf, importanti li d-dar tiegħek tkun dejjem nadifa u timxi ma' dan il-proċess għat-tindif f'ħames passi, qabel u wara kull klijent. Tista' żżid tariffa għat-tindif biex tagħmel tajjeb għall-ħin li tqatta' tnaddaf jew għall-ispejjeż ta' min jgħinek tnaddaf. Biex ngħinuk tħejji l-ispazju tiegħek għall-klijenti, ħloqna checklist li tista' tuża.