Mur 'il quddiem biex taċċessa r-riżultati suġġeriti

    Kif timxi mal-proċess għat-tindif f'5 passi ta' Airbnb

    Ikseb gwida dwar kif timplimenta l-proċess għat-tindif f'5 passi.
    Minn Airbnb f'did-data: 4 ta’ Ġun 2020
    Qari ta' 7 minuti
    Aġġornat f'did-data: 25 ta’ Ġun 2021

    Punti ewlenin

    • Il-proċess tat-tindif huwa magħmul minn ħames passi: ipprepara, naddaf, issanitizza, iċċekkja u erġa' qiegħed l-affarijiet

    • Peress li nafu li jaf ma jkunx faċli li tibda tuża rutina ġdida tat-tindif, tista' ssib iktar pariri, checklists apposta għalik u iktar informazzjoni fit-taqsima tat-tindif tat-tab Prestazzjoni

      tiegħek
      • Tista' wkoll tirreferi għall-gwida għat-tindif żviluppata mill-esperti ta' Airbnb biex il-proċess għat-tindif imtejjeb f'5 passi jiġi implimentat

      • Skopri iktar fil- gwida kompluta tagħna ta' kif għandek toħloq spazju adattat għall-klijenti

      Minħabba li l-indafa hija importanti iktar minn qatt qabel, il-Hosts tal-akkomodazzjonijiet jeħtieġ li jimpenjaw ruħhom biex jimxu mal-proċess għat-tindif imtejjeb f'5 passi ta' Airbnb—u aħna qegħdin hawn biex ngħinuk timxi mal-proċess. Dal-artiklu se jfehmek il-5 passi, u se jagħtik iktar linji gwida, pariri u suġġerimenti dwar l-aħjar prattiċi biex timxi ma' standard għat-tindif konsistenti. Dawn l-aħjar prattiċi huma bbażati fuq il-gwida għat-tindif imtejjeb li nkitbet bl-għajnuna tal-esperti tas-saħħa u tal-ospitalità li qed iżommu f'moħħhom il-benesseri tiegħek.

      Qabel tnaddaf, importanti li inti jew il-ħaddiema tat-tindif professjonali tiegħek tikkonsultaw mal-awtorità lokali tiegħek għal linji gwida dwar kemm irid jgħaddi ħin qabel tidħol fl-ispazju. Pereżempju, iċ-Ċentri tal-Kontroll u l-Prevenzjoni tal-Mard Amerikana tissuġġerixxi li tistenna għall-itwal ħin possibbli (mill-inqas ftit sigħat) wara li jitlaq il-klijent, qabel ma tidħol fl-ispazju peress li dan jista' jgħin biex inaqqas l-esponiment tiegħek għall-mikrobi. Biex tħalli biżżejjed ħin biex tlesti l-proċess tat-tindif, tista' wkoll tikkunsidra li żżid lqugħ bejn il-bookings billi taġġorna s-settings tiegħek għall-ħin ta' tħejjija.

      Biex ngħinuk tibda qed naqsmu miegħek l-aħjar mod ta' kif tuża l-proċess tat-tindif f'5 passi: ħejji, naddaf, issanitizza, iċċekkja u erġa' lesti.

      L-ewwel pass: Ħejji ruħek għal tindif aktar sikur

      • Rewwaħ il-kmamar qabel u waqt li tkun qed tnaddaf. L-awtoritajiet regolatorji bħall-Għaqda Dinjija tas-Saħħa (WHO) u ċ-Ċentri għall-Kontroll u l-Prevenzjoni tal-Mard tal-Istati Uniti (CDC) jissuġġerixxu li, qabel tnaddaf, tiftaħ il-bibien u t-twieqi li jagħtu fuq barra u li tuża l-fannijiet biex iżżid iċ-ċirkolazzjoni tal-arja fl-ispazju. Rewwaħ l-ispazju għall-itwal żmien possibbli qabel u waqt li tkun qed tnaddaf.
      • Ixtri l-prodotti tat-tindif it-tajba. Nissuġġerixxu li tuża biss diżinfettanti u sanitizers li huma rreġistrati mal-aġenzija governattiva rilevanti tiegħek (eż. l-Aġenzija Ewropea għas-Sustanzi Kimiċi jew l-Aġenzija għall-Ħarsien tal-Ambjent tal-Istati Uniti).
      • Aqra u ifhem il-linji gwida tas-sigurtà tal-kimiċi tiegħek. Dejjem aqra t-tikketti tal-prodotti li tkun qed tuża biex tkun taf x'inhuma l-ingredjenti attivi tagħhom u kif tużahom kif suppost.
      • Aħsel idejk bis-sapun u l-ilma għal mill-inqas 20 sekonda. Jekk dan ma jkunx possibbli, uża sanitizer tal-idejn magħmul minn mill-inqas 60% alkoħol, u kellem lill-aġenzija tal-gvern lokali tiegħek għall-iktar linji gwida riċenti.
      • Ilbes tagħmir protettiv. Qabel tidħol fl-ispazju, nissuġġerulek tilbes tagħmir protettiv bħal ingwanti li jintremew wara li jintużaw, fradal jew ġagagi u maskri jew għata tal-wiċċ tad-drapp.
      • Oħroġ iż-żibel kollu. Meta tibda hekk tkun qed tevita li żibel maħmuġ jikkontamina l-ispazju tiegħek wara li jkun tnaddaf. Ara li tagħmel borża ġdida fil-laned taż-żibel kollha, biex tagħmilha eħfef biex tarmi t-tissues u żibel ieħor.
      • Iġbor il-bjankerija maħmuġa kollha mill-ispazju. Ħafna Hosts qalulna li l-ħasil tal-ħwejjeġ hija waħda mill-iktar attivitajiet li tieħu ħin bejn żjara u oħra. Iġbor il-bjankerija maħmuġa kollha malli tidħol fl-ispazju, u evita li ċċaqlaqha ħafna għax tista' tferrex il-mikrobi.
      • Aqla' l-plakka minn mad-dawl qabel tibda tnaddaf. Għas-sigurtà tiegħek u biex tħares l-installazzjonijiet, tinsiex taqla' l-appliances minn mad-dawl qabel tibda tnaddafhom. L-appliances bil-plakka mqabbda imma "mitfija" xorta jkunu mqabbdin mal-elettriku sakemm ma taqlax il-plakka kompletament. Tista' wkoll titfi s-salvavita.

      Tfakkira dwar is-sigurtà: Nissuġġerulek li tilbes tagħmir protettiv nadif qabel tidħol fi spazju. Jekk tagħti titwila t-tikketti kollha tas-sigurtà tkun tista' tifhem kif tuża l-kimiċi tat-tindif kif suppost.

      It-tieni pass: Neħħi t-trab u l-frak

      Meta tnaddaf tkun qed tneħħi l-mikrobi u l-ħmieġ minn fuq l-uċuħ—pereżempju, billi tuża ċarruta niedja bis-sapun biex timsaħ il-bank tal-kċina jew il-cooker. Importanti li tlesti dal-pass qabel tissanitizza l-ispazju tiegħek.

      • Aħsel il-bjankerija bl-ogħla temperatura li tista' tuża skont l-istruzzjonijiet tal-manifattur. Tinsiex taħsel idejk qabel tmiss il-bjankerija nadifa.
      • Aħsel il-platti kollha u battal id-dishwasher. Importanti taħsel il-platti li ġew użati mill-klijenti biex tgħin jinżamm standard ta' iġjene għoli. Jekk m'għandekx dishwasher aħsel il-platti b'ilma sħun u sapun tal-platti antibatteriku. Biex tevita l-kontaminazzjoni bejn ħaġa u oħra, ibda billi ddur l-ispazju tiegħek u tiġbor il-platti minn kull kamra.
      • Farfar l-ispazju, u iknes jew għaddi l-art bil-vacuum cleaner. Meta tkun qed tfarfar, ibda minn fuq għal isfel biex tiżgura li ma jkunx hemm iktar trab jidher. Iknes l-art li mhux mgħottija b'tapit u għaddi t-tapiti bil-vacuum cleaner.
      • Naddaf l-uċuħ iebsin bis-sapun u bl-ilma. Imsaħ kull wiċċ biex tneħħi l-ħmieġ, iż-żjut, it-trab u l-mikrobi. L-uċuħ ibsin jinkludu affarijiet bħall-bankijiet tal-kċina, l-imwejjed, is-sinkijiet, il-vetrini u l-art. Meta taħsel l-art, ibda mir-rokna ta' wara tal-kamra u ersaq 'il quddiem, u wara, armi l-ilma f'sink li jkun għadu ma tnaddafx.

      • Naddaf l-uċuħ rotob skont l-istruzzjonijiet tal-manifattur tagħhom. Uċuħ rotob bħalma huma t-tapit, il-bjankerija tas-sodda u t-tappizzerija. Jekk ikunu maħmuġin, neħħi l-ħmieġ jew il-frak li jkun jidher bil-galbu mbagħad naddafhom bid-deterġenti tat-tindif apposta. Jekk tkun tista' tagħmel hekk, aħsel l-oġġetti fil-magna tal-ħasil skont l-istruzzjonijiet tal-manifattur tal-prodott.

      Tfakkira dwar is-sigurtà: Biex tevita t-tixrid tal-mikrobi, tmissx wiċċek sakemm tkun qed tnaddaf.

      It-tielet pass: Issanitizza b'diżinfettant

      Li tissanitizza jfisser li tuża l-kimiċi biex tnaqqas in-numru ta' mikrobi u batterji. Hawnhekk neħtieġu li l-Hosts kollha jissanitizzaw l-iktar uċuħ li jintmessu. Biex nagħtu eżempju, il-Hosts jistgħu jissanitizzaw il-pumijiet tal-bibien, l-iswiċċijiet tad-dawl u l-armarji billi jisprejjaw dawn l-uċuħ b'diżinfettant kimiku.

      • Wara li tnaddaf wiċċ iebes, sprejjah b'diżinfettant. Ara li tissanitizza l-iktar uċuħ li jintmessu fl-ispazju (bħall-pumijiet tal-bibien u l-iswiċċijiet tad-dawl). Ara li tissanitizza t-tagħmir elettroniku skont l-istruzzjonijiet tat-tindif tal-manifattur tal-prodott.
      • Tixxuttax id-diżinfettant qabel jgħaddi l-ħin muri fuq it-tikketta tal-prodott. It-tikketta tal-prodott se tispjegalek kemm se jkun hemm bżonn jgħaddi ħin qabel tixxotta l-prodott biex il-kimiċi jissanitizzaw wiċċ kif suppost. B'hekk tkun qed tagħti biżżejjed ħin lill-kimiċi biex joqtlu kemm jista' jkun mikrobi.
      • Ħalli l-uċuħ jinxfu waħedhom. Jekk tixxotta d-diżinfettant qabel il-ħin li suppost kellu jagħmel fuq wiċċ partikolari, m'hemmx garanzija li l-prodott ikun qatel il-patoġeni li jgħid li kapaċi joqtol.

      Tfakkira dwar is-sigurtà: Ara li timxi mal-istruzzjonijiet tat-tikketti tas-sigurtà biex tiżgura ruħek li qed tuża l-kimiċi tat-tindif kif suppost.


      Ir-raba' pass: Iċċekkja ċ-checklists tiegħek għal kull kamra

      Se jkollok aċċess għal checklists għat-tindif apposta għalik skont it-tip ta' listing tiegħek. Kun żgur/a li tagħti titwila lejn l-aħjar prattiċi msemmija f'kull checklist għal kull kamra, u aqsamhom mat-tim tal-hosting jew mal-professjonisti tat-tindif tiegħek.

      • Iċċekkja sew li l-uċuħ li l-aktar jintmissu ġew sanitizzati kollha. Indirizza kull ħaġa li setgħet inqabżet.
      • Ħu nota ta' kwalunkwe problema ta' manutenzjoni jew affarijiet neqsin. Waqt li tkun qed tgħaddi biex tara li lestejt kollox, ħu nota tal-affarijiet kollha li jridu jinbidlu, jimtlew mill-ġdid jew jiġu stokkjati mill-ġdid.

      Il-ħames pass: Lesti l-kamra mill-ġdid

      Biex tevita li l-affarijiet jiġu kontaminati minn xulxin, importanti li tlesti t-tindif u s-sanitizzazzjoni ta' kamra qabel tkun lesta għall-klijent li jmiss.

      • Armi u aħsel il-prodotti tat-tindif tiegħek. Armi l-prodotti li ma jistgħux jerġgħu jintużaw bħalma huma l-wipes diżinfettanti. Ara li tnaddaf ukoll l-għodod kollha li tkun użajt. Aħsel iċ-ċraret tat-tindif bl-ogħla temperatura li tista' tuża għal dak il-materjal.
      • Kif tlesti tnaddaf neħħi b'mod sigur kull ħaġa li użajt biex tnaddaf. Armi jew aħsel it-tagħmir protettiv skont il-linji gwida ta' kif għandek tużah.
      • Aħsel idejk bis-sapun u l-ilma għal mill-inqas 20 sekonda. Jekk ma tkunx tista' tagħmel hekk, uża sanitizer tal-idejn magħmul minn mill-inqas 60% alkoħol u ara xi jgħidu l-aħħar linji gwida tal-aġenzija tal-gvern tal-post fejn jinsab il-listing tiegħek.
      • Ifli kull kamra biex tiżgura li tkun lesta biex tilqa' l-klijent li jmiss. Immaġina li int il-klijent u dieħel fl-ispazju għall-ewwel darba.
      • Ħejji l-prodotti tat-tindif għall-klijenti tiegħek. Il-klijenti qalulna li jridu l-possibbiltà li jnaddfu l-post huma stess waqt li jkunu qed joqogħdu f'listing bħal listing tiegħek. Agħti lill-klijenti tiegħek il-possibbiltà li jagħmlu hekk billi tħallilhom iktar prodotti għat-tindif bħal pereżempju sanitizer tal-idejn, xugamani tal-karti li jintremew wara li jintużaw, sprej jew wipes diżinfettanti u sapun tal-idejn.
      • Erġa' ixtri l-prodotti għat-tindif li użajt. Ara li tiċċekkja d-dati ta' skadenza u tixtri mill-ġdid il-prodotti li tkun użajt biex b'hekk tħejji kollox għall-klijent li jmiss.

      Tfakkira dwar is-sigurtà: Dejjem żomm il-prodotti kimiċi f'post fejn ma jintlaħqux mit-tfal.

      Impenja ruħek li timxi ma' standards ogħla għat-tindif

      Issa li taf kif jaħdem il-proċess tat-tindif f'5 passi, wasal iż-żmien biex taġġorna r-rutina li qed tuża bħalissa u tibda tuża dat-tekniki għal kull kamra tal-ispazju tiegħek. Nifhmu li taf tkun diffiċli tibda tuża rutina tat-tindif ġdida u għalhekk ħloqna gwida għat-tindif li fiha tista' ssib linji gwida, pariri tas-sigurtà u checklists approvati mill-esperti bil-ħsieb li jgħinuk tibda tuża l-proċess għat-tindif imtejjeb f'5 passi ta' Airbnb. Qed neħtieġu li l-Hosts tal-postijiet fejn toqgħod jimxu mal-proċess għat-tindif imtejjeb f'5 passi ta' Airbnb bejn żjara u oħra.

      Wara li l-Hosts ikun impenjaw ruħhom li jimxu mal-proċess għat-tindif f'5 passi, l-impenn li jkunu ħadu għat-tindif imtejjeb se jintwera fuq il-paġna tal-listing tagħhom biex il-klijenti jkunu jafu li l-Hosts qablu li jimxu ma' standard għat-tindif konsistenti.

      Jekk jogħġbok żomm f'moħħok li r-rekwiżiti tat-tindif jistgħu jinbidlu maż-żmien skont l-aħħar żviluppi fil-pariri tal-esperti. Il-proċess għat-tindif imtejjeb f'5 passi ta' Airbnb huwa bbażati fuq informazzjoni xjentifika li dejjem qed tiġi aġġornata u l-idea wara l-gwida hija li nagħtu prijorità lis-saħħa u l-benesseri kemm tal-Hosts kif ukoll tal-klijenti.

      Nifhmu li li tibda tuża proċess ġdid fir-rutina tax-xogħol tiegħek jieħu ż-żmien, għalhekk qed naħdmu fuq materjal edukattiv u karatteristiċi ġodda għas-servizz tagħna biex ngħinuk timxi ma' dal-istandards b'mod iktar effettiv u preċiż. Żur it-taqsima tat-tindif tat-tab Perspettivi tiegħek għal iktar materjal edukattiv, pariri u checklists għat-tip ta' post tiegħek. Għal-linji gwida dettaljati, tista' wkoll tniżżel il-gwida għat-tindif.
      L-informazzjoni li tinsab f'dal-artiklu jaf laħqet inbidlet minn meta ġie ppubblikat. Il-proċess għat-tindif imtejjeb f'5 passi joffri lista ta' rekwiżiti sempliċi biex tnaddaf il-listing tiegħek. Għal iktar informazzjoni fuq kif twettaq dawk il-passi, jekk jogħġbok aqra l-gwida għat-tindif ta' Airbnb kollha. Bħala Host jaf ikollok tieħu xi miżuri oħra biex tħares lilek innifsek, lit-timijiet tiegħek u lill-klijenti, u għandek dejjem tiċċekkja u timxi mal-liġijiet u l-linji gwida li obbligat/a timxi magħhom fil-post fejn jinsab il-listing tiegħek. Airbnb mhix responsabbli għal xi korrimenti jew mard li jistgħu jseħħu wara li tkun imxejt ma' dal-proċess għat-tindif. Biex taqra r-regoli u l-linji gwida għat-tindif għall-post fejn tilqa' n-nies, jekk jogħġbok immarka dal-artiklu taċ-Ċentru tal-Għajnuna.

      Punti ewlenin

      • Il-proċess tat-tindif huwa magħmul minn ħames passi: ipprepara, naddaf, issanitizza, iċċekkja u erġa' qiegħed l-affarijiet

      • Peress li nafu li jaf ma jkunx faċli li tibda tuża rutina ġdida tat-tindif, tista' ssib iktar pariri, checklists apposta għalik u iktar informazzjoni fit-taqsima tat-tindif tat-tab Prestazzjoni

        tiegħek
        • Tista' wkoll tirreferi għall-gwida għat-tindif żviluppata mill-esperti ta' Airbnb biex il-proċess għat-tindif imtejjeb f'5 passi jiġi implimentat

        • Skopri iktar fil- gwida kompluta tagħna ta' kif għandek toħloq spazju adattat għall-klijenti
        Airbnb
        4 ta’ Ġun 2020
        Dan kien ta' għajnuna għalik?