Kif tilqa' lill-ewwel klijenti tiegħek fuq Airbnb

Jaf ikollok xi mistoqsijiet dwar kif tħejji ruħek biex tilqa' l-ewwel klijenti tiegħek. Dawn huma xi ftit pariri biex ngħinuk toħloq esperjenza mingħajr xkiel.

Oħloq proċess faċli u addattat għal kulħadd. Mal-gwida tal-wasla tal-listing tiegħek żid id-direzzjonijiet għall-post tiegħek, metodu taċ-checkin u istruzzjonijiet taċ-checkin pass pass. Ħafna klijenti jippreferu jużaw l-kumdità tas-self checkin biex ikunu jistgħu jidħlu fil-post mingħajr ma jkollhom għalfejn joqogħdu jaqilgħuk.

Il-klijenti se jkunu jistgħu jiftħu l-istruzzjonijiet taċ-checkin mid-dettalji tal-vjaġġ tagħhom 48 siegħa qabel il-ħin taċ-checkin (jew 24 siegħa qabel jekk għandek politika ta' kanċellazzjoni flessibbli).

Kull klijent huwa differenti imma l-biċċa l-kbira tagħhom jistennew li jkollok aċċess għal ċerta informazzjoni u ċerti affarijiet. Agħmel hekk biex iż-żjara tal-klijenti tkun komda.

• Ixtri għadd kbir tal-prodotti bażiċi. Fosthom hemm xugamani, bjankerija, imħaded, sapun u toilet paper.

• Kun hemm għall-klijenti. Fassal pjan fuq kif issib tarf għall-problemi malajr u fakkar lill-klijenti li jistgħu jikkuntattjawk jekk tinqala' xi ħaġa.

• Żid l-informazzjoni dwar id-dar. Aqsam l-informazzjoni importanti bħal, ngħidu aħna, kif taqbad mal-internet u tuża l-appliances. Ħalli verżjoni stampata tal-informazzjoni dwar id-dar f'post fejn il-klijenti jkunu jistgħu jsibuha malajr.

• Żid gwida tal-ivvjaġġar. Aqsam il-pariri tal-post tiegħek fosthom dwar postijiet fejn tiekol, tixtri, tmur ġiti u tgawdi l-ambjent ta' barra.

Kull kuntatt li jkollok mal-klijenti huwa opportunità li tgħinhom jifhmu x'għandhom jistennew mingħandek u li turihom li jimpurtak mill-ħtiġijiet tagħhom.

• Oħloq ambjent li jilqgħek. Kun inklussiv/a biex tgħin lil kull klijent iħossu komdu fl-ispazju tiegħek. Ibda billi tistaqsi lill-klijenti x'jeħtieġu biex iħossuhom komdi.

• Ifhem lill-klijenti. Ipprova qis kull sitwazzjoni min-naħa tal-klijenti.

• Wieġeb mingħajr telf ta' ħin. Rata ta' rispons tajba tgħin biex il-listing tiegħek jintwera qabel fir-riżultati tat-tiftix ta' Airbnb. Uża l-app biex tikkomunika malajr u biex tħejji l-messaġġi awtomatiċi biex taqsam informazzjoni siewja f'mumenti importanti bħaċ-checkin.

Dawn huma xi kampjuni ta' messaġġi li tista' tħejji biex jintbagħtu awtomatikament f'xi ħinijiet. Dal-eżempji jużaw ix-shortcodes li jimlew awtomatikament id-dettalji tal-booking, tal-listing u tal-klijent. Għandek iddaħħalhom mill-menù dropdown għax mhux se jaħdmu jekk tiktibhom direttament.

Mal-wasla tagħhom il-klijenti jistennew li jsibu spazju nadif. Oħloq proċess għat-tindif li jiġbor fih it-tindif tal-uċuħ, l-artijiet u d-drappjiet kollha.

• Iċċekkja jkunx hemm tbajja', trab jew xagħar. L-iktar imkejjen li jintesew huma taħt is-sodda, fil-kxaxen u fuq l-għata tat-twieqi.

• Uża rwejjaħ newtrali. L-irwejjaħ qawwija jistgħu jdejqu lill-klijenti. Int u tnaddaf iftaħ it-twieqi u uża diżinfettanti ħfief li jistgħu jintużaw kullimkien.

• Neħħi jew aħżen l-oġġetti personali. Dil-ħaġa tista' tgħin biex il-post tiegħek jinħass iktar dħuli u organizzat.

Wara ċ-checkout, int u l-klijenti għandkom 14-il jum ċans biex tiktbu review dwar xulxin. Ir-reviews jinżammu moħbija sakemm kemm int kif ukoll il-klijenti tal-booking tiegħek tkunu ktibtu review jew ikunu għaddew l-14-il jum ċans biex tikteb ir-reviews. Il-klijenti jistgħu wkoll jagħtu punteġġ bl-istilel għall-esperjenza ġenerali u għal sitt kategoriji sekondarji: l-indafa, il-preċiżjoni, iċ-checkin, il-komunikazzjoni, il-post fejn jinsab il-listing u l-valur.

Ir-reviews tal-bidu huma importanti iktar. Ir-rating ġenerali tal-listing se jintwera fuq il-listing wara l-ewwel tliet reviews u jista' jaffettwa fejn jintwera l-listing tiegħek fir-riżultati tat-tiftix. Nissuġġerulek tibgħat messaġġ dakinhar taċ-checkout biex tfakkar lill-klijenti jiktbu review dwar iż-żjara tagħhom.

Ikteb reviews ġenwini u int u tikteb ir-reviews qis kliemek u uża l-istess standards għall-klijenti kollha. Dal-proċess jgħin biex titrawwem il-fiduċja bejn il-klijenti u l-Hosts.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.