Ideat ħfief ta' kif iżżomm lill-klijenti li jibbukkjaw żjarat itwal kuntenti
Ħafna drabi l-klijenti li jibbukkjaw 28 lejl jew iktar ikunu qed ifittxu ħwejjeġ differenti minn dawk li jibbukkjaw biss għal tmiem il-ġimgħa. Meta tagħti lill-klijenti dak li qed ifittxu, mhux biss tkun qed tagħtihom esperjenza isbaħ imma tkun qed iżżid iċ-ċans li tikseb iktar reviews ta' ħames stilel.
Biex iżżomm lill-klijenti li jibbukkjaw żjara ta' xahar kuntenti, nissuġġerulek tipprova dawn l-affarijiet żgħar madwar ġimgħa wara l-wasla tagħhom.
Staqsi lill-klijenti x'jeħtieġu
Xahar huwa żmien twil biex tgħaddi mingħajr xi ħaġa li d-dar tużaha ta' sikwit imma li ma stajtx tippakkjaha u ġġorrha miegħek. Bħala Host tista' tistaqsi lill-klijenti tiegħek jekk jeħtiġux xi oġġetti essenzjali.
Hemm ċans li jkunu jixtiequ xi mħadda jew kutra żejda, xi umbrella jew xi ħaġa għall-kċina bħal toaster jew blender. Meta turi li lest/a taqsam dal-kumditajiet żgħar magħhom, taf tkun qed tagħmel differenza kbira fil-livell ta' kumdità tagħhom—u l-istess oġġett tista' tużah għall-klijenti oħra li jiġu warajhom.
Andrea, Superhost ġewwa Leavenworth, Washington tgħid li tħobb tħalli l-kċina mimlija bil-prodotti għaż-żjarat fit-tul. "Lill-klijenti tiegħi dejjem inħallilhom ħafna te tal-weraq, kafè, għadd ta' għażliet ta' kif iħejju l-kafè, ħwawar u żjut għat-tisjir."
Offri tindifa tal-post f'nofs iż-żjara
Lil ħafna klijenti togħġobhom l-idea ta' tindifa bla ħlas f'nofs iż-żjara tagħhom. Għalihom tkun xi ħaġa sabiħa u għalik taf tkun opportunità biex tagħmel xi xogħol żgħir ta' żamma bħal pereżempju tibdel il-batteriji, il-bozoz u l-filtri.
Annette, Superhost ġewwa San Francisco, dejjem tgħid lill-klijenti: "Billi se tkunu qed toqogħdu hawn għal mill-inqas xahar, hemm ċans li xi ħaġa tieqaf taħdem sew. Jekk jogħġobkom tippruvaw issewwu xejn intom, ikunu xi jkunu l-ħsarat. Avżawna minnufih u nieħdu ħsieb kollox aħna."
Int u tippjana tindifa tal-post f'nofs iż-żjara, ma tagħmilx ħażin li tgħid lill-klijenti min ikun se jidħol fl-ispazju, fi xħin u kemm bejn wieħed u ieħor dil-persuna se ddum hemm. Meta tgħidilhom eżatt x'għandhom jistennew tkun qed turi li l-privatezza u s-sigurtà tagħhom huma importanti għalik.
Tista' wkoll toffri li tnaddaf il-post iktar ta' sikwit għal tariffa biex b'hekk il-post tiegħek jinżamm nadif u dawk li jgħinuk tnaddaf ikunu jistgħu jdaħħlu xi ħaġa tal-flus.
Issuġġerixxi servizzi tal-post
Ħafna drabi l-klijenti mhux se jkunu jafu ż-żona tiegħek tajjeb daqsek. Tista' tgħinhom jieħdu kemm jistgħu miż-żjara tagħhom billi tibgħatilhom messaġġ jew taqsam magħhom gwida tal-ivvjaġġar bil-pariri lokali.
Iġbor lista qasira. Ibda mis-servizzi li taħseb li se jkunu jeħtieġu l-klijenti li jibbukkjaw żjarat fit-tul—pereżempju servizz għall-mixi tal-klieb, twassil tax-xirja jew tiswija tal-laptop. Meta tissuġġerixxi n-negozjanti tal-post tkun qed tibni rabta mal-klijenti u fl-istess waqt tgħin lill-komunità tiegħek.
Aqsam l-iktar postijiet li tħobb mal-klijenti, l-iktar dawk il-postijiet li ma tantx huma magħrufa u li taħseb li żgur se jogħġbuhom. Tinsiex issemmi l-festivals u l-avvenimenti pubbliċi l-kbar l-oħra li se jkunu qed iseħħu waqt iż-żjara tagħhom.
Kif toħloq esperjenza ftit iktar speċjali
Ħafna drabi tista' tagħmel affarijiet żgħar biex il-klijenti jħossuhom apprezzati. Tista' pereżempju tħallilhom kartolina bi ftit kliem sabiħ fl-intrata ("Grazzi talli bbukkjajtu miegħi") u xi rigal ħelu:
- Flixkun inbid tar-reġjun
- Ħobża friska
- Tifkira marbuta maż-żona
"Iktar ma jkunu żgħar u ħfief, iktar aħjar," tgħid Donna, Superhost ġewwa San Francisco. "Jien dejjem nagħżel li nħalli xi ħaġa tal-ikel biex b'hekk, jekk ikunu jridu, ikunu jistgħu jużawha minnufih." Xi oġġett tal-post jaf iferraħ lill-klijenti u għalhekk iżommu tifkira sabiħa tal-post tiegħek wara ż-żjara tagħhom.