Għodod li tista' tuża biex tħajjar lill-klijenti jibbukkjaw bookings itwal
Punti ewlenin
Waħda minn kull ħames żjarat ibbukkjati fuq Airbnb hija ta' 28 lejl jew iktar*
Tista' tħajjar lill-klijenti jibbukkjaw żjarat itwal billi toffri skontijiet ta' kull xahar, kumditajiet popolari u dawra mad-dar bir-ritratti fuq il-listing tiegħek
Qed iseħħu bidliet kbar fl-industrija tal-ivvjaġġar—ix-xogħol mid-dar qed jagħti lil ħafna nies il-flessibbiltà li jqattgħu iktar żmien bogħod mid-dar. Qed ninnutaw l-istess xejriet fil-klijenti ta' Airbnb: Iktar minn 20% tal-iljieli bbukkjati fuq Airbnb is-sena l-oħra kienu jagħmlu parti minn żjara ta' 28 lejl jew iktar.*
Żjarat itwal jistgħu jgħinuk timla l-kalendarju tiegħek, tikseb dħul iktar stabbli u tnaqqas id-drabi li jkollok tħejji l-post tiegħek bejn klijent u ieħor biex b'hekk tnaqqas il-ħin li tqatta' tnaddaf u tikkomunika mal-klijenti. Hawn għandek xi għodod—u checklist—li tista' tibda tużahom minn issa biex jgħinuk tħajjar lill-klijenti jibbukkjaw żjarat itwal fil-listing tiegħek.
Settings tal-kalendarju
Iktar ma qed jikber in-numru ta' klijenti li qed ifittxu żjarat itwal, iktar qed issir diffiċli li l-klijenti jsibu spazju wieħed disponibbli għat-tul tal-vjaġġ kollu tagħhom. Waħda mill-faċilitajiet il-ġodda li qed inniedu bħala parti mill- Aġġornament tas-Sajf 2022 ta' Airbnb hija ż-Żjarat Maqsumin, faċilità li tħalli lill-klijenti li jibbukkjaw żjara ta' mill-inqas 7 ijiem jaqsmu ż-żjara tagħhom bejn żewġ listings.
Meta klijent ifittex il-listings ta' Airbnb b'dati flessibbli (għal ġimgħa jew xahar) jew għal dati partikolari, il-listings li jixtiebhu se jinġabru flimkien awtomatikament u se jintwerew bħala Żjara Maqsuma għad-dati li l-klijent ikun qed ifittex. Il-klijent imbagħad se jkun jista' jibbukkja ż-żewġ postijiet separatament.
Għall-Hosts, il-faċilità taż-Żjarat Maqsumin toffri iktar opportunitajiet biex il-listing tagħhom jinstab mill-klijenti. Fl-imgħoddi jekk klijent kien qed ifittex għal żjara ta' xahar imma l-listing tiegħek kien disponibbli biss għal ġimagħtejn matul dak iż-żmien, il-listing tiegħek ma kienx jintwera fir-riżultati tat-tiftix. Grazzi għal Żjarat Maqsumin, il-listing tiegħek jista' jintwera ma' listing ieħor biex il-klijent isib fejn joqgħod għad-dati kollha tal-vjaġġ tiegħu.
Biex tiżgura li l-listing tiegħek ikun jista' jintwera fir-riżultati tat-tiftix għall-klijenti li qed ifittxu żjarat ta' xahar, iċċekkja d-disponibbiltà tal-listing fis-settings tal-kalendarju tiegħek. Għal dal-klijenti, qiegħed l-ikbar numru ta' ljieli għal żjara għal mill-inqas 28 lejl. Tista' tqiegħed ukoll l-inqas numru ta' ljieli għal żjara.
Nissuġġerulek ukoll taġġorna s-settings l-oħra biex taċċetta żjarat itwal. Tista' tħalli lill-klijenti jibbukkjaw iktar bil-quddiem jew iżżid iż-żmien meħtieġ bejn booking u ieħor biex tħejji l-ispazju tiegħek għall-klijent li jmiss.
Sir af iktar dwar kif taddatta s-settings tiegħek għaż-żjarat itwal
Prezzijiet personalizzati
Il-klijenti li jibbukkjaw żjarat itwal is-soltu jfittxu għal listings li joffrulhom skont. Tista' tagħżel li titlob prezz differenti skont ix-xahar tas-sena jew li titlob l-istess rata għax-xhur kollha.
Jekk pereżempju l-post tiegħek jinsab f'belt mal-baħar li jżuruha ħafna turisti fis-sajt, nissuġġerulek li tibdel il-prezz tiegħek għal dak iż-żmien tas-sena biex taddatta għad-domanda tal-post.
Għalkemm is-suġġeriment li tbaxxi l-prezz ta' kull lejl tiegħek jaf jinstema' stramb, jekk il-post tiegħek ikun battal għal madwar 20% tal-iljieli (kif jiġri jekk il-post tiegħek ikun ibbukkjat għal 24 lejl kull xahar), skont ta' 20% għal żjara fit-tul jaf jgħinek iddaħħal l-istess ammont ta' flus kull xahar.
Dal-istess skont jgħinek ukoll iżżomm il-listing tiegħek kompetittiv. Iktar minn nofs il-listings madwar id-dinja kollha joffru skontijiet għaż-żjarat ta' xahar jew iktar.** Tista' toffri skont jew tagħżel prezz għal bookings ta' xahar mit-taqsima Prezzijiet u disponibbiltà tas-settings tal-listing tiegħek, minn brawżer.
Dettalji tal-listing
L-ewwel nett ara li d-deskrizzjoni tal-listing tiegħek issemmi l-faċilitajiet tal-aċċessibbiltà tal-ispazju tiegħek u li taċċetta żjarat itwal. Tista' wkoll iżżid dawra mad-dar b'ritratti ta' kwalità biex il-klijenti jkunu jistgħu jifhmu aħjar x'għandhom jistennew li jsibu.
Imbagħad aħseb ftit fuq kif il-ħtiġijiet tal-klijenti jafu jinbidlu matul iż-żjara tagħhom. Biex tħajjar lill-klijenti li qed ifittxu żjarat itwal jibbukkjaw il-listing tiegħek, ara li mal-listing tiegħek żidt il-kumditajiet kollha li toffri fil-post tiegħek.
Ħafna drabi l-klijenti jfittxu għal kumditajiet popolari bħal kċina mgħammra sew, konnessjoni tal-internet stabbli jew postijiet li jaċċettaw il-pets. Tista' żżid il-kumditajiet fid-dettalji tal-listing billi tagħfas fuq Editja u timmarka l-kaxxa ħdejn kull kumdità li toffri fl-ispazju tiegħek.
Jekk immarkajt il-kaxxa ħdejn Wifi, nissuġġerulek tivverifika u tippubblika l-veloċità tal-konnessjoni disponibbli fl-ispazju tiegħek biex b'hekk tħeġġeġ lill-klijenti li beħsiebhom jaħdmu jew jistudjaw waqt il-vjaġġ tagħhom jibbukkjaw il-post tiegħek. Tista' tagħmel dil-ħaġa billi tagħfas fuq Żid id-dettalji u tagħmel it-test tal-veloċità tal-wifi.
*Skont dejta interna miġbura minn Airbnb minn madwar id-dinja kollha, wieħed minn kull ħamest iljieli bbukkjati fl-2021 kien parti minn żjara ta' 28 lejl jew iktar.
**Skont dejta interna li Airbnb kienet ġabret sal-31 ta' Diċembru tal-2021.
L-informazzjoni li tinsab f'dal-artiklu jaf laħqet inbidlet minn meta ġie ppubblikat.
Punti ewlenin
Waħda minn kull ħames żjarat ibbukkjati fuq Airbnb hija ta' 28 lejl jew iktar*
Tista' tħajjar lill-klijenti jibbukkjaw żjarat itwal billi toffri skontijiet ta' kull xahar, kumditajiet popolari u dawra mad-dar bir-ritratti fuq il-listing tiegħek