L-impatt ta' Airbnb.org fl-2022

L-2022 kienet sena ta' kisbiet rekord għal Airbnb.org. Grazzi għall-ħidma mal-Hosts u l-għaqdiet umanitarji minn madwar id-dinja kollha, Airbnb.org sabet post fejn toqgħod għal żmien qasir bla ħlas għal iktar minn 140,000 persuna. Dan-numru ikbar mill-għadd ta' nies li għenna fid-disa' snin ta' qabel.

Il-ġenerożità tal-Hosts u d-donaturi għenet biex ngħinu:

• Lir-refuġjati li ħarbu mill-Ukrajna wara l-invażjoni tar-Russja
• Lir-refuġjati Afgani li waslu fl-Amerika ta' Fuq
• Lill-familji madwar l-Amerika t'Isfel li kellhom iħallu djarhom minħabba nuqqas ta' stabbiltà politika u ekonomika
• Lill-komunitajiet ġewwa l-Istati Uniti tal-Amerka li ntlaqtu mill-Uragani Ian u Fiona

Airbnb.org hija għaqda mingħajr skop ta' qligħ li mhix immexxija minn Airbnb. Il-ħsieb li ta bidu għall-għaqda nibet fl-2012 meta Host fetħet djarha għan-nies li kienu ntlaqtu mill-Uragan Sandy. Matul l-aħħar 10 snin, il-ħidma tagħha kompliet tikber biex issib postijiet fejn joqogħdu dawk li kellhom jaħarbu minn pajjiżhom, lill-ħaddiema tal-għajnuna, lir-refuġjati, lil dawk li qed ifittxu ażil u lill-ħaddiema li jinsabu fuq quddiem fil-ġlieda kontra l-COVID-19.

Wara li r-Russja invadiet l-Ukrajna fi Frar tal-2022, iktar minn 6 miljun persuna ħallew l-Ukrajna biex ifittxu post sigur. Kien l-ikbar ċaqliq ta' refuġjati fl-Ewropa minn żmien it-Tieni Gwerra Dinjija 'l hawn.

Airbnb.org impenjat ruħha li ssib post fejn toqgħod għal żmien qasir għal 100,000 minnhom. Waslulna donazzjonijiet minn 95 pajjiż u għexieren ta' eluf ta' Hosts irreġistraw biex joffru post fejn toqgħod bla ħlas jew bi prezz imraħħas. Din l-għajnuna għenet biex Airbnb.org tkun tista' taħdem ma' għaqdiet minn madwar l-Ewropa u l-Amerika ta' Fuq kollha biex issib postijiet fejn ir-refuġjati setgħu joqogħdu.

Il-kriżijiet jolqtu aħar lil dawk in-nies li huma storikament emarġinati. Fl-2022, Airbnb.org kompliet bil-ħidma tagħha biex tgħin lil dal-komunitajiet.

Pereżempju Black Women for Black Lives u Global Empowerment Mission ħadmu ma' Airbnb.org biex jgħinu lill-istudenti Afrikani li kienu qed jistudjaw ġewwa l-Ukrajna. Xi agenziji tal-gvernijiet ma kinux qed iqisu l-istudenti barranin bħala refuġjati u ħafna minn dal-istudenti ħabbtu wiċċhom mar-razziżmu huma u jippruvaw iħallu l-Ukrajna u jitolbu l-għajnuna f'pajjiżi oħra.

Imsieħba oħra, l-Organization for Refuge, Asylum and Migration (ORAM), ħadmet mar-refuġjati LGBTQ+ mill-Ukrajna li kienu qed iħabbtu wiċċhom mad-diskriminazzjoni. Ġewwa Berlin ORAM laqqgħet lil Dima, raġel omosesswali minn Kyiv, ma' Mary, Amerikana li toqgħod ġewwwa Berlin u li tellgħet l-appartament tagħha fuq Airbnb.org. Mal-wasla tiegħu ġewwa l-Ġermanja, Mary offriet lil Dima spazju sigur (kif juri l-vidjow t'hawn fuq).

Bosta għaqdiet umanitarji oħra, bħala parti mill-ħidma tagħhom offrew il-postijiet fejn toqgħod ta' Airbnb.org. Fost dawn insibu lil:

• HIAS ġewwa l-Ekwador li tgħin lil nies bħal Daniela, li familtha kellha taħrab mill-vjolenza tal-Kolombja. HIAS issibilhom Hosts bħal Mery, li tgħix f'viċinat ta' Quito fejn imorru jgħixu ħafna refuġjati. HIAS tħarreġ lill-Hosts fuq kif għandhom jilqgħu n-nies li għaddew minn trawma u tagħti għajnuniet oħra sakemm dar-refuġjati jkunu qed joqogħdu għand il-Hosts.
• Community Sponsorship Hub, l-ewwel għaqda ġewwa l-Istati Uniti tal-Amerka li xogħolha huwa biss li ssib iktar nies lesti jilqgħu r-refuġjati ġewwa djarhom. Grazzi għall-Programm Sponsor Circle, ħadmet mal-ġirien f'ħafna bliet biex jibdew jilqgħu r-refuġjati ġejjin mill-Afganistan u l-Ukrajna.
• Insight Ukraine, għaqda li taħdem fil-qasam tad-drittijiet tal-bniedem mal-persuni LGBTQ+, għenet eluf ta' nies biex iħallu l-Ukrajna u jsibu post fejn joqogħdu, kura tas-saħħa tal-moħħ u tobba mhux preġudikati kontra l-persuni LGBTQ+ fiż-żoni fejn marru joqogħdu.
• Münchner Freiwillige toffri punti tal-għajnuna għan-nies li jkunu qed jaslu Munich mill-Ukrajna u tgħinhom b'ħafna servizzi, fosthom anki biex isibu post fejn joqogħdu.

Lill-Hosts, lid-donaturi u lill-imsieħba tagħna li ngħaqadtu magħna f'dal-moviment dinji biex fi żmien ta' kriżi kulħadd ikun jista' jħossu milqugħ, nixtiequ ngħidulkom grazzi.