Ħarsa ġenerali lejn kif tilqa' n-nies fuq Airbnb

Xi Hosts jużaw id-dħul minn Airbnb biex ifaddlu għall-pensjoni tagħhom. Oħrajn jużaw id-dħul biex iħallsu għal xi proġett għal qalbhom. "Għal tliet snin kont kapaċi nistudja dwar it-tessuti fil-Kulleġġ tal-Arti ta' Morley," tgħid Tessa, Host ġewwa Londra. "Stajt nivvjaġġa u l-fatt li nilqa' n-nies għeni biex inħallas kċina ġdida." Huma x'inhuma l-għanijiet finanzjarji tiegħek, li tilqa' n-nies fuq Airbnb jaf ikun mod kif iddaħħal xi ħaġa tal-flus żejda. Sir af kif tibda, minn kif toħloq il-listing tiegħek sa kif titħallas.

Mela, x'hemm bżonn biex issir Host ta' Airbnb? L-ewwel jeħtieġ li jkollok spazju disponibbli biex taqsmu mal-vjaġġaturi. Kemm jekk għandek dar sħiħa, kamra żejda jew sufan sodda komdu, hemm ċans kbir li hemm klijent li se jkun qed ifittex spazju bħal tiegħek—l-importanti li toħloq listing ta' Airbnb onest u ġenwin biex il-vjaġġaturi jkunu jafu x'għandhom jistennew. U trid tkun lest/a toffri lill-klijenti tiegħek ospitalità mill-aqwa li normalment tfisser:

1. Ikkomunika b'mod ċar u fil-pront
2. Offri spazju nadif bil-kumditajiet bażiċi kollha meħtieġa għal żjara komda
3. Żid xi affarijiet oħra li taħseb li se jagħmlu l-ispazju tiegħek wieħed speċjali

Meta tilqa' n-nies fuq Airbnb tista' tirreklama darek mal-vjaġġaturi mingħajr obbligi ta' xejn—mingħajr ħlas għar-reġistrazzjoni jew tariffi tal-abbonament. U int tiddeċiedi r-rata ta' kull lejl li titlob. Tista' titlob prezzijiet personalizzati skont l-istaġuni, għal tmiem il-ġimgħa u għall-iljieli l-oħra kollha li għalihom tixtieq tagħżel int kemm titlob flus għalihom. Tista' żżid iktar tariffi bil-quddiem għal affarijiet bħal klijenti oħra li se jingħaqdu mal-booking jew għat-tindif tad-dar*. Jekk tixtieq ftit għajnuna biex tifhem kemm għandek titlob, Airbnb għandha l-għodod li jqabblu l-prezzijiet tiegħek mad-domanda u jissuġġerulek prezz kompetittiv għal kull lejl.

Wara li ttella' l-ispazju tiegħek fuq Airbnb, il-klijenti se jibdew jibagħtulek il-mistoqsijiet u l-bookings tagħhom. Airbnb tiġbor il-flus mingħand il-klijenti qabel jaslu. B'hekk, meta tilqa' n-nies, dejjem titħallas fil-ħin. Qatt mhu se jkollok għalfejn tiġbor il-flus direttament.

Tista' wkoll tagħżel kif se titħallas permezz ta' metodi tal-ħlas bħal PayPal jew depożitu dirett fil-kont tal-bank. Airbnb normalment tibgħatlek il-pagament tiegħek madwar 24 siegħa wara li l-klijent kellu jasal. Il-fondi jafu jdumu ftit jiem qabel jidħlulek fil-kont. Il-ħlas li tirċievi se jkun ir-rata ta' kull lejl tiegħek li minnha nnaqsu tariffa tas-servizz żgħira. Airbnb ma titlobx flus biex tipproċessa l-karti tal-kreditu għalhekk bħalma l-klijenti jistgħu jibbukkjaw bla xkiel, il-Hosts jistgħu jitħallsu mingħajr problemi wkoll.