Kif toffri żjarat siguri għall-klijenti li jibbukkjaw kmamar privati jew kmamar maqsuma mal-oħrajn
Punti ewlenin
Ara li jkollok regoli tad-dar dettaljati u li jispjegaw min se jkun hemm fl-ispazju
Ara li l-ispazji privati jkollhom serratura
Aġġorna l-listing u r-regoli tad-dar tiegħek
Ara li l-ispazji privati jkunu privati
U anke jekk tinstema' ovvja, importanti ħafna li l-klijenti tiegħek ikunu jistgħu jsakkru l-kamra privata tagħhom u kull kamra tal-banju li jkollhom aċċess għaliha. Jekk il-kamra tas-sodda ta' fejn se jorqdu l-klijenti m'għandhiex bieb li jissakkar, żid serratura biex lill-klijenti tiegħek isserrħilhom moħħhom.
Il-kmamar privati jew maqsuma mal-oħrajn li għandhom tieqa għandhom ikollhom ukoll il-purtieri jew blinds biex il-klijenti jkunu jistgħu jirrilassaw u jkunu komdi. M'hemmx għalfejn ikunu purtieri jew blinds lussużi jew speċjali—l-importanti li jkunu kapaċi jgħattu sew it-twieqi tal-kamra tal-klijent.
Spjega mill-bidu nett min se jkun fl-ispazju tiegħek
Fil-listing tiegħek spjega ċar min se jkun hemm fl-ispazju tiegħek—kemm jekk klijenti oħra, co-Hosts jew sħabek—u kemm toffri kmamar privati jew maqsuma mal-oħrajn. Wara li klijent jibbukkja l-ispazju tiegħek, ibgħatlu messaġġ u għidlu jekk hux se jkun hemm ħaddieħor li se joqgħod jew iżur il-propjetà tiegħek sakemm ikun qed joqgħod għandek.
Jekk pereżempju għandek żewġt ikmamar privati u f'kull kamra se jkun hemm klijent, tista' tibgħat messaġġ lil kull klijent biex tavżah li se jkun hemm xi ħadd ieħor fil-kamra l-oħra.Tista' tikteb xi ħaġa bħal, "Fil-kamra privata li hemm ħdejn tiegħek se nkun qed nilqa' żagħżugħ mill-Ingilterra". Il-klijenti japprezzaw jekk ikunu jafu min se jkun qed joqgħod fl-istess spazju. Ovvjament taqsam l-ebda informazzjoni personali dwar il-klijenti tiegħek jekk ma jkunux tawk permess tagħmel hekk.
Agħti regoli tad-dar dettaljati
Fil-każ ta' spazji maqsumin mal-oħrajn, regoli tad-dar ċari jistgħu jgħinu biex kulħadd jifhem x'inhu mistenni minnu. Il-Hosts tal-kmamar privati jew tal-kmamar maqsuma mal-oħrajn jagħmlu tajjeb jekk iwieġbu dal-mistoqsijiet fir-regoli tad-dar tagħhom:
- Matul liema ħinijiet m'għandux isir storbju?
- X'inhu u x'mhux disponibbli biex jintuża minn kulħadd?
- X'inhi l-politika tiegħek fejn jidħlu l-alkoħol u d-drogi?
- X'għandhom ikunu jafu dwar il-privatezza l-klijenti tiegħek? Pereżempju, matul il-lejl għandhom jagħlqu l-blinds biex il-klijenti l-oħra ma jkunux jistgħu jħarsu fil-kamra tagħhom?
Għin lill-vjaġġaturi li qed jivvjaġġaw waħidhom iħossuhom komdi
Aħna nħeġġu lill-vjaġġaturi li jkunu se joqogħdu f'kamra privata jew maqsuma mal-oħrajn biex jistaqsu iktar mistoqsijiet dwar iż-żjara tagħhom u għalhekk inħeġġuk tweġibhom b'empatija u b'mod ċar biex tgħin isserrħilhom moħħhom.
Il-klijenti li jkunu qed jivvjaġġaw waħidhom jafu, pereżempju, jistaqsuk dwar:
- Is-sigurtà tal-viċinat. Għandek xi pariri tas-sigurtà għaż-żona tiegħek?
- Klijenti oħra. X'tista' tgħid dwar nies oħra li jafu jkunu qed joqogħdu fil-propjetà matul iż-żjara tal-klijent?
- Privatezza. X'livell ta' privatezza jistgħu jistennew li jkollhom fl-ispazju tiegħek il-klijenti?
Għas-sigurtà ta' kulħadd, kun responsabbli
Jekk qed tilqa' n-nies ġewwa darek, importanti li tagħmel għażliet għaqlin u l-istess ħaġa tgħodd għall-klijenti tiegħek. Għalhekk ma tagħmilx ħażin li pereżempju żżid politika dwar l-alkoħol u d-drogi fir-regoli tad-dar u li terġa' tfakkar lill-klijenti dwarha b'messaġġ qasir wara li jkunu bbukkjaw l-ispazju tiegħek.
Il-fatt li tikkomunika b'mod ċar, b'informazzjoni li tinftiehem malajr, dwar dak li tistenna mill-klijenti u dwar dak li għandhom jistennew mingħandek bħala Host se jgħinek issib il-klijenti li jgħoddu għall-ispazju tiegħek. U l-fatt li tkompli tispjega l-affarijiet lill-klijenti meta jaslu fl-ispazju tiegħek se jgħinhom biex iħossuhom komdi—u se jgħin lilek biex tikseb reviews ta' 5 stilel.
Punti ewlenin
Ara li jkollok regoli tad-dar dettaljati u li jispjegaw min se jkun hemm fl-ispazju
Ara li l-ispazji privati jkollhom serratura
Aġġorna l-listing u r-regoli tad-dar tiegħek