Mur 'il quddiem biex taċċessa r-riżultati suġġeriti

    Modi ġodda kif il-klijenti jistgħu jiskopru l-listing tiegħek

    Skopri xi tfisser għall-Hosts l-ikbar bidla li saret fuq Airbnb fl-aħħar 10 snin.
    Minn Airbnb f'did-data: 11 ta’ Mej 2022
    Qari ta' 4 minuti
    Aġġornat f'did-data: 11 ta’ Mej 2022

    Punti ewlenin

    L-isbaħ vjaġġi ħafna drabi jibdew minn xewqa li tmur xi mkien ġdid. Biex jagħżlu fejn, meta għandhom jivvjaġġaw u biex jorganizzaw kollox, il-vjaġġaturi ta' sikwit jużaw l-internet. Għalhekk qed inniedu mod kompletament ġdid għall-klijenti biex jiskopru Airbnb u jsibu listings mill-aqwa bħal tiegħek.

    L-Aġġornament ta' Airbnb: Sajf 2022 huwa l-ikbar bidla fuq Airbnb tal-aħħar 10 snin. Id-disinn il-ġdid jenfasizza l-listings li jagħmlu parti minn 56 Kategorija ta' Airbnb biex b'hekk tkun eħfef għall-klijenti li jsibu u jibbukkjaw postijiet li ma kinux jafu li jeżistu u jdaħħal fis-seħħ ukoll faċilità ġdida bl-isem ta' Żjarat Maqsumin, faċilità li tagħti l-opportunità lill-klijenti jaqsmu żjarat itwal bejn żewġt idjar.

    Bħala Host tista' tieħu kemm tista' minn dal-bidliet billi tara li l-listing tiegħek huwa komplut b'dettalji preċiżi, disponibbiltà aġġornata u ritratti ta' kwalità għolja.

    Iktar modi kif il-listing tiegħek jista' jinstab

    Id-disinn il-ġdid ta' Airbnb jgħin lil-listing tiegħek—kemm jekk hu kamra maqsuma mal-oħrajn, kamra privata jew spazju sħiħ—biex jinstab iktar qabel minn iktar klijenti huma u jippjanaw il-vjaġġ tagħhom.

    Il-klijenti jistgħu jsibu l-listing tiegħek grazzi għal:

    • Kategoriji ta' Airbnb. Kull darba li l-klijenti jiftħu l-app, aħna se nuruhom postijiet fejn toqgħod mill-aqwa li jistgħu jibbukkjaw minnufih u li huma disponibbli fil-futur qarib.
    • Żjarat Maqsumin. Ir-riżultati tat-tiftix għal żjarat ta' sebat iljieli jew iktar issa se jibdew joffru lill-klijenti l-għażla li jaqsmu l-vjaġġ tagħhom bejn żewġ spazji.
    • Flessibbiltà ikbar. Il-klijenti jistgħu jfittxu għal postijiet fejn toqgħod mingħajr dati u destinazzjonijiet partikolari—grazzi għall-faċilitajiet li nedejna s-sena l-oħra—jew se jkunu jistgħu jfittxu b'iktar dettall skont il-ħtiġijiet tagħhom.

    Kif jaħdmu l-Kategoriji ta' Airbnb

    Meta l-klijenti jiftħu Airbnb, fuq nett aħna se nuruhom il-kategoriji b'ġabriet ta' listings miġbura apposta skont l-istil, il-post fejn jinsabu u l-attivitajiet li hemm qrib tagħhom. Il-kategoriji jiġbru fihom postijiet fejn toqgħod b'faċilitajiet bħal veduti mill-isbaħ jew kċejjen ta' kok, postijiet qrib lag jew park nazzjonali jew postijiet maħsuba għal min irid jilgħab il-golf jew jagħmel is-surfing.

    Meta l-klijenti jfittxu għal postijiet fejn toqgħod f'destinazzjoni personali aħna se nuruhom ir-riżultati kif konna nagħmlu qabel bl-unika differenza li se jkunu miġbura taħt kategorija bl-isem Id-Djar Kollha. Imbagħad se jkunu jistgħu jiskopru kategoriji ġodda biex isibu djar mill-isbaħ fiż-żona li jkunu jixtiequ jibbukkjaw fiha (jew qrib tagħha).

    Listing jista' jintwera wkoll f'iktar minn kategorija waħda. Jekk dar qrib lag ikollha wkoll kċina ta' kok, minbarra fir-riżultati tat-tiftix għad-destinazzjoni tiegħek, il-listing jista' jintwera fil-Kategorija Lag kif ukoll fil-Kategorija Kċina ta' Kok.

    Waħda mill-iktar kategoriji speċjali li ħloqna hija Disinn, ġabra ta' iktar minn 20,000 dar magħżula għall-arkitettura ikonika u d-disinn ta' ġewwa sabiħ tagħhom. Il-Kategorija Disinn tiġbor fiha djar minn periti magħrufa bħal Frank Lloyd Wright u Zaha Hadid, propjetajiet li ssemmew fil-pubblikazzjonijiet li jiffukaw fuq id-disinn u spazji ta' Hosts li għamlu biċċa xogħol tajba ħafna bil-mod li bih iddisinjaw l-ispazju tagħhom.

    Id-disinn il-ġdid jenfasizza l-listings f'56 Kategorija ta' Airbnb fosthom Disinn, Kampanja u Treehouse.

    Dawn huma biss ftit mill-Kategoriji ta' Airbnb: Veduti Sbieħ, Bajja, Kampeġġ, Kċejjen ta' Kok, Kampanja, Spazji Kreattivi, Golf, Djar Storiċi, Bliet Ikoniċi, Parks Nazzjonali, Skiing, Surfing, Tropikali u Għelieqi tad-Dwieli.

    Dawn il-kategoriji huma biss il-bidu għal dal-mod il-ġdid kif tfittex—mod li jgħin lill-klijenti jiskopru iktar postijiet minn qatt qabel. Maż-żmien se noħolqu iktar kategoriji li juru l-faċilitajiet uniċi u l-postijiet speċjali tal-propjetajiet tal-Hosts. Nemmnu li l-kategoriji huma l-futur u hemm kategorija għal kull dar u kull Host ta' Airbnb.

    Id-djar jiġu riveduti qabel jiżdiedu ma' kategorija partikolari. Miljuni ta' listings attivi fuq Airbnb jiġu studjati bl-intelliġenza artifiċjali li tqis l-isem, id-deskrizzjoni, il-captions tar-ritratti u r-reviews tal-klijenti. Għalhekk importanti li tara li l-informazzjoni tal-listing tkun dejjem kompluta u aġġornata.

    Kif jaħdmu ż-Żjarat Maqsumin

    Il-klijenti jistgħu jqallbu—u jibbukkjaw—il-listings kollha bil-flessibbiltà li jixtiequ. Il-faċilità Żjarat Maqsumin tagħti lill-Hosts l-opportuntità li jkunu parti mill-vjaġġ tal-klijenti.

    Meta klijent ifittex għal vjaġġ ta' mill-inqas ġimgħa, iż-Żjarat Maqsumin se jintwerew awtomatikament fir-riżultati tat-tiftix. Huma u jqallbu l-Kategorija Id-Djar Kollha, il-klijenti se jkollhom l-għażla li jaqsmu l-vjaġġ tagħhom bejn żewġt idjar li jinsabu fl-istess destinazzjoni.

    Il-faċilità Żjarat Maqsumin turi 40% iktar listings fir-riżultati tat-tiftix meta klijent ifittex għal żjarat ta' 14-il jum jew iktar.*

    Fl-imgħoddi jekk klijent kien qed ifittex għal żjara ta' xahar imma l-listing tiegħek kien disponibbli biss għal ġimagħtejn matul dak iż-żmien, il-listing tiegħek ma kienx jintwera fir-riżultati tat-tiftix. Grazzi għal Żjarat Maqsumin, il-listing tiegħek jista' jintwera ma' listing ieħor biex il-klijent isib fejn joqgħod għad-dati kollha tal-vjaġġ tiegħu.

    Għal kull Żjara Maqsuma nsibu mir-riżultati tat-tiftix żewġ propjetajiet tal-istess tip li jinsabu fl-istess żona u li joffru l-istess kumditajiet. Jekk pereżempju jkun hemm familja qed tfittex għal dar sħiħa b'faċilitajiet tal-aċċessibbiltà bħal daħla mingħajr għetiebi u bibien usa' minn 82ċm, Żjarat Maqsumin se ssib żewġ listings li joffru dal-istess faċilitajiet.

    Meta l-klijenti jibbukkjaw Żjara Maqsuma, il-Hosts jirċievu talbiet għall-booking separati. Bħalma jiġri fil-każ ta' bookings oħra, il-prezz u r-regoli tad-dar tiegħek jibqgħu fis-seħħ għan-numru tal-iljieli bbukkjati.

    X'tista' tagħmel biex tgħin lil-listing tiegħek jispikka

    Il-faċilitajiet il-ġodda ta' Airbnb juru d-dar tiegħek lil iktar nies f'iktar postijiet minn qatt qabel. Dawn huma biss ftit affarijiet li tista' tagħmel biex tgħin lil-listing tiegħek jispikka:

    1. Enfasizza dak li jagħmel il-post tiegħek speċjali billi tuża ritratti ta' kwalità għolja. Ritratti deskrittivi—kemm jekk meħuda minn fotografu professjonali kif ukoll jekk bl-ismartphone tiegħek—jistgħu jgħinu biex iħajru lill-klijenti jibbukkjaw il-listing tiegħek.
    2. Iċċekkja l-lista ta' kumditajiet u faċilitajiet—u ara jekk hemmx xi ħaġa ġdida. Żid jew aġġorna kull ħaġa li toffri fil-post tiegħek u żomm f'moħħok l-iktar kumditajiet popolari mal-klijenti—b'hekk il-listing tiegħek ikun jista' jintwera fil-kategoriji t-tajba.
    3. Agħmel it-test tal-veloċità tal-wifi. Aċċess stabbli għall-internet huwa importanti biex il-klijenti jserrħu moħħhom li se jkunu jistgħu jaħdmu u jikkomunikaw sew matul iż-żjara tagħhom.
    4. Qis jekk il-listing tiegħek hux aċċessibbli għall-vjaġġaturi kollha. Żid ir-ritratti u d-dettalji tal-faċilitajiet tal-aċċessibbiltà—bħal pereżempju d-daħliet mingħajr għetiebi u l-bibien wisgħin—biex taddatta l-listing tiegħek għall-klijenti bi ħtiġijiet speċjali.

    Meta żżid id-dettalji tal-post kollha mal-listing, żgħar kemm huma żgħar, tista' tkun qed tgħin biex il-listing tiegħek jintwera lil iktar nies. Il-klijent jaf ikun qed ifittex post eżatt bħal tiegħek.

    *Skont dejta ta' prova interna li Airbnb kellha nhar l-14 ta' April 2022.

    L-informazzjoni li tinsab f'dal-artiklu jaf laħqet inbidlet minn meta ġie ppubblikat.

    Punti ewlenin

    Airbnb
    11 ta’ Mej 2022
    Dan kien ta' għajnuna għalik?