Kif għandek iġġib ruħek meta tikseb review ħażina fuq Airbnb

Review ħażina taf tolqot fil-laħam il-ħaj. Kultant anki l-aqwa Hosts jaf jiksbu review ħażina mingħand xi klijent.

Dejjem se jkollok l-għażla li twieġeb pubblikament fuq il-listing tiegħek. Meta tagħti tweġiba kostruttiva, turi li qed tagħti kas l-kummenti u l-ħsibijiet tal-klijenti. Hemm ukoll affarijiet li tista' tagħmel biex tevita li jiktbulek review ħażina.

Meta tikteb tweġiba pubblika qasira b'ton edukat għal review ħażina, tista' tuża l-kumment biex turi kif qed ittejjeb l-ispazju tiegħek.

Il-klijenti jgħidulna li japprezzaw meta Host iwieġeb għall-kummenti għax dil-ħaġa turi li l-Host jaf jilqa' s-suġġerimenti u għalhekk iħossuhom iktar komdi jibbukkjaw miegħu.

Tista' twieġeb għal review fi żmien 30 jum minn meta tkun inkitbet. Dawn huma ftit pariri biex ngħinuk tikteb tweġiba mill-aqwa:

• Ibda billi turi lill-klijenti li fhimt x'qalulek u għidilhom grazzi. M'hemmx għalfejn tkun iktar kumplikata minn, pereżempju, "Grazzi tar-review tiegħek, Mary! Napprezzaw ħafna l-fatt li ħadt ftit ħin biex tgħidilna kif kien il-vjaġġ tiegħek."

• Spjega kif tejjibt l-ispazju tiegħek. Tista' pereżempju twieġeb, "Jiddispjaċina li s-sodod ma kinux komdi. Għalina importanti li l-klijenti jkunu jistgħu jorqdu raqda komda, għalhekk wara r-review tiegħek, żidna xi toppers fuq is-saqqijiet."

"Bħala klijent ma nistenniex li Host ikollu reviews perfetti, però jolqtuni ħafna iktar dawk li jieħdu l-kummenti kritiċi bis-serjetà u juru li lesti jtejbu l-mod kif jilqgħu n-nies," jgħid Andrew, Superhost ġewwa Berlin.

Ir-reviews jistgħu jitneħħew jekk jiksru l-Politika tar-Reviews tagħna. Jekk temmen li review tikser il-politika tagħna, tista' tirrappurtaha. Tista' wkoll titlobna nneħħu r-reviews miktuba bi tpattija—inkitbu meta nkitbu—minn klijenti li jiksru b'mod serju xi politika tagħna.

Meta twieġeb pubblikament għar-reviews tajba, tkun qed tgħin ukoll biex turi li int Host li twieġeb.

Jekk twieġeb biss għar-reviews ħżiena, se tkun qed tiffoka l-attenzjoni tal-klijenti iktar fuqhom. Wieġeb għar-reviews tajba wkoll. Taf tkun biżżejjed anki jekk twieġeb biss "Grazzi talli għażilt il-post tiegħi!"

Kultant review ħażina tkun tfisser biss li l-klijenti stennew affarijiet differenti. Kull darba li tilqa' klijent, din tista' tkun opportunità biex toffri ospitalità mill-aqwa u turi u kemm int kapaċi tilqa' n-nies b'mod inklussiv.

Għalkemm ma tistax tkun ċert li qatt mhu se jiktbulek review ħażina, hemm xi affarijiet li tista' tagħmel biex ittejjeb il-mod kif tilqa' l-klijenti tiegħek.

• Ħu ritratti preċiżi tal-ispazju tiegħek u uri l-benefiċċji u n-nuqqasijiet tiegħu.
• Ikteb deskrizzjoni tal-listing ġenwina u regoli tad-dar biex il-klijenti jkunu jafu x'għandhom jistennew.
• Irranġa d-deskrizzjoni tal-listing tiegħek biex tgħarraf lill-klijenti minn qabel bl-affarijiet li ssemmew fir-reviews il-ħżiena, speċjalment dawk li m'għandekx kontroll fuqhom (jekk pereżempju l-post tiegħek jinsab fi triq storbjuża).
• Uża l-kummenti li tirċievi biex ittejjeb il-listing tiegħek, pereżempju jekk klijent qallek li ma kienx hemm biżżejjed xugamani, ħalli iktar.
• Żomm kuntatt mal-klijenti bl-app ta' Airbnb matul iż-żjara tagħhom biex b'hekk, jekk ikun hemm xi problema, tkun tista' taħdem fuqha mill-ewwel.

L-informazzjoni f'dal-artiklu jaf laħqet inbidlet minn meta ġie ppubblikat.