Kif taqla' l-flus fuq Airbnb

Jekk int jew xi ħadd li taf għandkom xi kamra żejda, it-tieni post jew appartament x'tikru meta tkunu qed tivvjaġġaw, Airbnb tagħmilhielkom eħfef li ttellgħu l-ispazju tagħkom u tilħqu n-nies minn madwar id-dinja kollha. Imma kif tista' ddaħħal il-flus fuq Airbnb?

1. Ibda billi ttella' l-ispazju tiegħek—m'għandek għalfejn tħallas xejn u Airbnb tiġbor biss perċentwali żgħira tal-prezz ta' kull lejl tal-listing tiegħek
2. Agħżel ix-xorta ta' Host li tixtieq tkun (se nagħtuk iktar dettalji hawn taħt)
3. Ifhem kemm tixtieq titlob flus

Għadek ma tafx jekk jgħoddx għalik li tilqa' n-nies? Dawn il-5 Hosts għażlu li jaqsmu xi jfisser għalihom li jilqgħu n-nies flimkien ma' xi pariri fuq kif tilqa' n-nies.

Elise, Superhost ġewwa Atlanta li hija wkoll fotografu u sid ta' negozju żgħir ta' suċċess, kienet qed tfittex idea kreattiva ġdida. Biex tkun tista' tagħmel hekk, bdiet kull tant żmien tilqa' n-nies fid-dar ċkejkna tagħha. Dil-ħaġa mhux biss għenitha biex tħallas għall-idea tagħha imma għenitha wkoll tagħmel tajjeb għall-flus li sselfet għad-dar.

Meta Elise u żewġha ma jkunux qed jużaw id-dar ċkejkna tagħhom fil-masġar, jużawha biex jilqgħu l-klijenti fiha. Id-dar ċkejkna hija mod ieħor kif il-koppja jdaħħlu xi ħaġa tal-flus biex ikunu jistgħu jħallsu għall-vjaġġi tagħhom u jixtru dar ċkejkna oħra.

Il-pariri tal-ospitalità ta' Elise:

• Aqbad u ibda—qatt mhu se ssib iż-żmien ideali imma ma tiswiekx flus biex ittella' l-post tiegħek fuq Airbnb
• Evita l-ispejjeż billi titlob lil sħabek u lil tal-familja jgħinuk kif jistgħu—ngħidu aħna, biex issewwi xi vit iqattar jew biex jgħinuk iżżejjen il-post
• Jekk ma tgħixx qrib l-ispazju tiegħek, sib lil xi ħadd li jista' jgħinek tieħu ħsieb il-proċess taċ-checkin

Għal Shinya, membru tal-Bord Konsultattiv tal-Hosts u Superhost part-time ġewwa Osaka, il-Ġappun, meta jilqa' n-nies ikun qed jieqaf ftit mix-xogħol full-time tiegħu bħala direttur tan-negozju tal-familja fil-qasam tal-fibri naturali.

"Nieħu gost ħafna nilqa' n-nies," jgħidilna Shinya. "Dil-ħaġa tgħinni niltaqa' man-nies minn madwar id-dinja kollha—opportunità li x-xogħol ma jagħtinix."

Shinya beda jilqa' n-nies fl-2016 wara li rranġa t-tieni dar tal-familja tiegħu. Id-dar tinsab fl-istess propjetà bħad-dar ewlenija tiegħu u għalhekk għalih eħfef li jħejji l-ispazju bejn klijent u ieħor filwaqt li jkompli bix-xogħol tal-uffiċċju tiegħu.

"Wara x-xogħol inqatta' ħini nwieġeb lill-klijenti u nara li għandhom dak kollu li jeħtieġu," jgħidilna Shinya. "Importanti li l-klijenti jħossuhom li hemm xi ħadd qed jieħu ħsiebhom għax dil-ħidma hija xi ħaġa li tferraħni ħafna."

Il-pariri tal-ospitalità ta' Shinya:

• Investi l-ewwel dħul fl-ispazju tiegħek biex tħajjar iktar klijenti jibbukkjawh u żżid il-bookings
• Qabbad lil xi ħadd inaddaf il-post bejn klijent u ieħor matul dawk il-ġimgħat meta ma tkunx tista' tagħmel hekk int
• Uża l-app ta' Airbnb biex tkunlek eħfef twieġeb il-messaġġi tal-klijenti

Starr, Superhost ġewwa Charlotte, North Carolina xtaqet xi ħaġa ġdida fil-ħajja għax kienet għejiet tipprova tlaħħaq mat-tfal u mal-karrieri li jaqtgħulek nifsek fil-finanzi u fis-suq tal-propjetà. Billi hi u żewġha Brian kienu dejjem iqattgħu tmiem il-ġimgħa jistrieħu f'post għall-vaganzi fil-qrib, għażlu li anki huma joħolqu post bħal dak.

Grazzi għall-esperjenza li kellhom miksuba matul is-snin jaħdmu flimkien fuq it-tiswija tad-djar u x-xiri u l-bejgħ tal-propjetà, il-koppja ttantaw xortihom u tellgħu wieħed mill-postijiet tagħhom fuq Airbnb. Illum qed jilqgħu n-nies f'ħames postijiet li jagħmlu parti mill-boutique hotel u l-ispazju għall-mistrieħ il-ġdid tagħhom, l-Old Haigler Inn, fiż-żona ta' Charlotte.

Starr fl-aħħar setgħet tħalli xogħolha fil-qasam tal-finanzi u taħdem biss fuq in-negozju tal-ospitalità tagħhom. "Kburija li qed nagħti lill-familji post fejn jistgħu jqattgħu l-ħin flimkien," tgħid Starr hi u tiddeskrivi n-negozju li qed jikber tagħha.

Il-pariri tal-ospitalità ta' Starr:

• Billi l-prezz li titlob se jkun f'idejk, ibda bi prezz irħis u ibda żidu wara li tikseb ftit reviews tajbin
• Ifhem x'qed jitolbu l-Hosts l-oħra taż-żona tiegħek
• Aħdem kemm se tqumlek flus biex tħejji l-ispazju tiegħek bejn klijent u ieħor u żid it-tariffi skont dak in-numru

"Dejjem xtaqt nilqa' l-vjaġġaturi u nurihom il-belt tiegħi u għalhekk għażilt li nipprova nuża Airbnb," jgħidilna Parth, Host ġewwa Kaunas, il-Litwanja. "L-appartament tiegħi jinsab f'post tajjeb ħafna u għandu kamra tal-mistednin."

Lil Parth tant għoġbu x-xogħol li meta waħda minn sħabu talbitu jkun il-Co-Host tagħha għal għadd ta' postijiet, ma damx jaħsibha wisq u qabel bil-qalb. "Għandi ħinijiet tax-xogħol flessibbli ħafna u għalhekk nista' nwettaq il-ħidma ta' Co-Host—li nara li t-tindif isir sew u li nikkomunika mal-klijenti—skont ma jkun meħtieġ," jgħidilna.

Parth jagħti importanza kbira lill-ħidma ta' Co-Host—għax m'għadux jilqa' n-nies fl-ispazju tiegħu—u kuntent ħafna li għandu l-opportunità li jagħmel hekk. "Grazzi għal Airbnb, niltaqa' ma' ħafna nies tal-ġenn," jgħidilna. "Dejjem nisħaq li m'għandekx għalfejn ittella' l-ispazju tiegħek biex tkun parti minn dil-komunità tal-ospitalità."

Il-pariri tal-ospitalità ta' Parth:

• Ikteb deskrizzjoni tal-listing ġenwina biex il-klijenti mhux biss ikunu jafu x'għandhom jistennew li jsibu imma jħallulek reviews mill-aqwa
• Itlob l-għajnuna tal-professjonisti mħarrġa fejn jidħlu t-taxxi u r-regolamenti tal-post fejn jinsab il-listing
• Agħżel il-metodu tal-ħlas fejn tixtieqna nibagħtulek il-pagamenti, jew il-ħlasijiet kif insejħulhom aħna (għalkemm Airbnb tibgħatlek il-ħlasijiet 24 siegħa wara li l-ħin li fih il-klijenti kienu mistennija jagħmlu ċ-checkin, il-ħlas jaf jieħu sa 7 ijiem biex jasal skont il-metodu tal-ħlas li tkun għażilt u l-post fejn toqgħod)

M'għandekx għalfejn ittella' post fejn toqgħod biex tilqa' n-nies fuq Airbnb. Għadd ta' nies madwar id-dinja qed jingħaqdu mal-komunità ta' Airbnb bħala Organizzaturi tal-Esperjenzi. Dan-nies ma jagħtux post fejn toqgħod għall-klijenti—minflok jilqgħu attivitajiet divertenti li matulhom il-vjaġġaturi jistgħu jifhmu l-kultura tal-post.

"L-Esperjenza tiegħi jisimha Music mentorship with a Grammy winner," jgħidilna Burt. "Norganizza sessjonijiet privati fl-istudio tal-mużika tiegħi fejn ngħin lin-nies jitħarrġu fil-ħiliet tal-produzzjoni u l-inġinerija tal-mużika, fl-istil tar-rap, fil-ħiliet bħala kantanti, bħala kittieba tal-lirika u bħala DJs u iktar."

Għal Burt, il-fatt li jmexxi Esperjenza jfisser li jista' jdaħħal xi ħaġa tal-flus hu u jgħin lill-oħrajn irawmu l-potenzjal kreattiv tagħhom.

"Meta tmexxi Esperjenza fuq Airbnb, tkun qisek qed tmexxi n-negozju tiegħek," jgħidilna Burt. "Id-differenza hi li meta tibda negozju, l-ewwel jeħtieġlek tissellef il-flus jew tikseb liċenzja u toħroġ xi ħaġa tal-flus minn butek—xi ħaġa li tista' żżomm ħafna nies lura. Fuq Airbnb tista' tibda b'idea u $10 [USD] biss."

Tixtieq issir taf iktar dwar kif iddaħħal il-flus bħala Host ta' Airbnb?